កីឡា

គ្រូបង្វឹកក្លឹបគុនខ្មែរស៊ុបពើហ្វៃ ត្រៀមអ្វីខ្លះហោះទៅជប៉ុនជាមួយកូនសិស្សទាំង៥នាក់…

បានផុស

២ ម៉ោង មុន

នៅ

ថ្ងៃពុធ ២១ ឧសភា ២០២៥

ដោយ

គ្រូបង្វឹកក្លឹបប្រដាល់គុនខ្មែរស៊ុបពើហ្វៃ ចំពោះការត្រៀមទុកសម្រាប់សិស្សគុនទាំង៥នាក់ដែលប្រកួតនៅប្រទេសជប៉ុនលើកនេះគឺសំលៀកបំពាក់ការពារត្រជាក់ ចំណែកម្ហូបអាហារអាចទិញ និងធ្វើខ្លួនឯងឲ្យពួកគេទទួលទាននៅទីនោះតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពផេកលោក Soeur Vannak

លោក ផាត សូដា បានឲ្យដឹងថា មានតែកីឡាករ គ្រឿម សុវណ្ណឃីម ម្នាក់ប៉ុណ្ណោះដែលធ្លាប់ជិះយន្តហោះ និងធ្វើដំណើរផ្លូវឆ្ងាយរាប់ម៉ោង។ ចំណែកកីឡាករថ្នាល ៤នាក់ផ្សេងទៀតនោះមិនធ្លាប់ទេ ដូច្នេះលោកបារម្ភខ្លះដែរខ្លាចសិស្សជួបការលំបាក និងភ័យខ្លាចពេលជិះយន្តហោះប៉ះពាល់ដល់សុខភាពមុនឡើងប្រកួត។

ចំពោះការត្រៀមទុកវិញ លោក ផាត សូដា គឺផ្ដោតលើសំលៀកបំពាក់សម្រាប់ពួកគេពាក់ការពារត្រជាក់ប៉ះពាល់ដល់សុខភាព។ ចំណែកចំណីអាហារវិញគ្រោងទិញ ត្រី សាច់ នៅប្រទេសជប៉ុននោះតែម្ដងដើម្បីចំអិនឲ្យពួកគេនៅពេលមិនអាចទទួលទានអាហារជប៉ុនបាន។

លោក ផាត សូដា

ក្រៅតែពីការត្រៀមលើសំលៀកបំពាក់ ឬអាហារហើយនោះ គ្រូបង្វឹកក្លឹបគុនខ្មែរស៊ុបពើហ្វៃរូបនេះថា ក្បាច់ស្នៀត កម្លាំង បានបង្ហាត់បង្រៀនដល់សិស្សគុនទាំង៥រូបនោះអស់ហើយ។ ដោយសារខាងកម្មវិធីតម្រូវឲ្យពាក់ឯកសណ្ឋានការពារច្រើនដូចជាអាវ កែងដៃ ក្បាល ជើង ដូច្នេះលោកផ្ដោតបង្ហាត់សិស្សឲ្យខំវាយយកពិន្ទុប៉ុណ្ណោះខុសពីទម្លាប់វាយកន្លងទៅកាលនៅខ្មែរ។

រូបភាពផេកលោក Soeur Vannak

បញ្ជាក់ដែរថា លោក ផាត សូដា និងសិស្សគុនថ្នាល៥រូបរបស់ខ្លួនរួមមាន រិទ្ធី គីងកុង, រិទ្ធី សុធារិន, រិទ្ធី លីហ៊ួ, រិទ្ធី បូរិន្ធ និង គ្រឿម សុវណ្ណឃីម នឹងចេញដំណើរទៅប្រទេសជប៉ុននៅថ្ងៃនេះ ដើម្បីចូលរួមការប្រកួតនៅថ្ងៃទី២៥ ខែឧសភា ឆ្នាំ២០២៥។ ថ្នាលគុនខ្មែរទាំង៥នាក់នេះនឹងត្រូវប៉ះម្ចាស់ក្បាច់គុនជប៉ុនទាំងអស់៕

អត្ថបទដោយ៖ នួន ស៊ីណា