កីឡា

ក្រុម U19 នារីកម្ពុជា ប៉ះ ម៉ាឡេស៊ី ម៉ោង៣ថ្ងៃនេះនៅវៀតណាម

បានផុស

១៧ វិនាទី មុន

នៅ

ថ្ងៃចន្ទ ៩ មិថុនា ២០២៥

ដោយ

ក្រុមបាល់ទាត់ជម្រើសជាតិនារីកម្ពុជាអាយុក្រោម១៩ឆ្នាំ (U19) ត្រូវប៉ះ ក្រុមនារីម៉ាឡេស៊ី បើកឆាកវគ្គសន្សំពិន្ទុពូល B ពានរង្វាន់ ASEAN U19 Girls’ Championship ឆ្នាំ២០២៥ វេលាម៉ោង៣រសៀលថ្ងៃនេះនៅប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនារីកម្ពុជា ស្ថិតនៅពូល B សុទ្ធតែមានក្រុមខ្លាំងដូចជា ថៃ ឥណ្ឌូណេស៊ី និង ម៉ាឡេស៊ី។ នៅថ្ងៃនេះដែរ ក្រុមនារីថៃ ប៉ះក្រុមឥណ្ឌូណេស៊ី វេលាម៉ោង៣រសៀលដូចគ្នា។ ចំណែកពូល A មានម្ចាស់ផ្ទះ វៀតណាម មីយ៉ាន់ម៉ា ឡាវ និងទីម័រខាងកើត។ ក្រុមលេខ១ និងលេខ២នៃពូលទាំងពីរត្រូវឡើងទៅកាន់វគ្គពាក់កណ្តាលផ្តាច់ព្រ័ត្រ បន្ទាប់ពីចប់វគ្គសន្សំពិន្ទុក្នុងពូល។

ពាននារីអាស៊ានអាយុក្រោម១៩ឆ្នាំនេះ ត្រូវបានបង្កើតឡើងកាលពីឆ្នាំ២០១៤ ប៉ុន្តែរហូតដល់ពេលនេះទើបរៀបចំការប្រកួតបាន៤លើកប៉ុណ្ណោះគិតទាំងឆ្នាំ២០២៥។ កាលពីឆ្នាំ២០១៤ ថៃធ្វើម្ចាស់ផ្ទះ ដោយក្រុមនារីថៃជាជើងឯក។ ឆ្នាំ២០២២ ឥណ្ឌូណេស៊ីជាម្ចាស់ផ្ទះ ដោយក្រុមអូស្ត្រាលី ជាជើងឯក និងឆ្នាំ២០២៣ ធ្វើនៅឥណ្ឌូណេស៊ី ដោយថៃជាជើងឯក។

ក្រុមនារីកម្ពុជាធ្លាប់បានចូលរួមប្រកួត២លើកចុងក្រោយគឺ ឆ្នាំ២០២២ ធ្លាក់ត្រឹមវគ្គសន្សំពិន្ទុក្នុងពូល បន្ទាប់ពីស្មើ១ប្រកួត និងចាញ់៣ប្រកួត។ លើកទី២ ឆ្នាំ២០២៣ ក្រុមនារីកម្ពុជាធ្លាក់ត្រឹមវគ្គសន្សំពិន្ទុក្នុងពូលទៀត បន្ទាប់ពីឈ្នះ២ប្រកួត និងចាញ់១ប្រកួត៕

អត្ថបទ៖ វីរបុត្រ

Related Topics:ក្រុមបាល់ទាត់នារីកម្ពុជា