កីឡា

លោក ទុយ ចន្ថា គ្រូបាល់ទះវិទ្យាល័យតាខ្មៅសម្លឹងឃើញកីឡាករទាំងនេះអាចក្លាយជាកីឡាករអាជីពនៅថ្ងៃមុខ

បានផុស

១ year មុន

នៅ

ថ្ងៃចន្ទ ១៦ មិថុនា ២០២៥

ដោយ

លោក ទុយ ចន្ថា គ្រូបង្វឹកបាល់ទះវិទ្យាល័យហ៊ុនសែនតាខ្មៅ បន្ទាប់ពីជួយខេត្តកណ្ដាលឲ្យឈ្នះមេដាយមាស ក្នុងការប្រកួតកីឡាសិស្សមធ្យមសិក្សា ឆ្នាំ២០២៥ នេះសម្លឹងឃើញកីឡាករល្អៗ ៣-៤ នាក់អាចក្លាយជាកីឡាករអាជីពនៅថ្ងៃខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទុយ ចន្ថា នៅកណ្ដាល

លោក ទុយ ចន្ថា បានឲ្យដឹងថា ការប្រកួតកីឡាសិស្សមធ្យមសិក្សាពិសេសខាងកីឡាបាល់ទះនេះគឺពិតជាល្អមែនទែនបានធ្វើឲ្យយុវជនលេងកីឡាមានសុខភាពល្អ រាងកាយមាំមួន និងបានលេងបាល់ត្រឹមត្រូវតាបបច្ចេកទេសច្បាប់ទម្លាប់ពិតប្រាកដរបស់កីឡាបាល់ទះស្ដង់ដា។

ក្រុមបាល់ទះមធ្យមសិក្សាខេត្តកណ្ដាល

គ្រូមកពីវិទ្យាល័យហ៊ុនសែនតាខ្មៅរូបនេះបន្ថែមទៀតថា ដោយសារតែការខំប្រឹងប្រែងហ្វឹកហាត់ និងរួមផ្សំទេពកោសល្យរបស់ពួកគេផងនោះទើបធ្វើឲ្យក្រុមតំណាងបាល់ទះខេត្តកណ្ដាលនេះអាចដណ្ដើមបានមេដាយមាស និងប្រកួតមិនចាញ់សោះតាំងពីប្រកួតដំបូងៗមកម្ល៉េះ។

ក្រុមបាល់ទះមធ្យមសិក្សាខេត្តកណ្ដាល

តាមដែលលោកដឹកនាំ និងមើលឃើញពីសមត្ថភាព កាយសម្បទាផងនោះគឺមានកីឡាករ ៣-៤រូបដែលអាចក្លាយជាកីឡាករអាជីពនៅថ្ងៃខាងមុខ។ ព្រោះអាយុនៅតិច កាយសម្បទាអំណោយផលល្អ បច្ចេកទេសលេងក៏ល្អ និងឆាប់ចាប់បានក្នុងពេលហ្វឹកហាត់ជាដើម។ យុវជនដែលនឹងអាចក្លាយជាកីឡាករអាជីពនោះរួមមានកីឡាករលេខ១ លេខ២០ លីប្រូ លេខ៧ លេខ១១ លេខ៨ ជាដើម។

ក្រុមបាល់ទះមធ្យមសិក្សាខេត្តកណ្ដាល

បញ្ជាក់ដែរថា ប្រភេទកីឡាបាល់ទះផ្នែកបុរសតំណាងខេត្តកណ្ដាលបានឈ្នះមេដាយមាស បន្ទាប់ពីយកឈ្នះខេត្តកំពង់ធំ ដោយលទ្ធផល ៣-២ សិត ក្នុងវគ្គផ្ដាច់ព្រ័ត្រការប្រកួតកីឡាសិស្សមធ្យមសិក្សា ឆ្នាំ២០២៥ កាលល្ងាចថ្ងៃទី១៣ ខែមិថុនា ឆ្នាំ២០២៥។

ក្រុមបាល់ទះមធ្យមសិក្សាខេត្តកណ្ដាល

ការប្រកួតកីឡាសិស្សមធ្យមសិក្សា ឆ្នាំ២០២៥ នេះបានបិទបញ្ចប់ជាផ្លូវការហើយកាលពីល្ងាចថ្ងៃទី១៤ ខែមិថុនា ឆ្នាំ២០២៥ នៅក្នុងវិមានពហុកីឡដ្ឋានជាតិ។ រាជធានីភ្នំពេញជាប់ចំណាត់ថ្នាក់លេខ១ ឈ្នះមេដាយសរុប ៤៧គ្រឿង មាស២១ ប្រាក់១៥ សំរឹទ្ធ១១។ លេខ២ បានលើខេត្តកណ្ដាល ឈ្នះមេដាយសរុប ៤៣គ្រឿង មាស១៦ ប្រាក់៨ សំរឹទ្ធ១៩។ លេខ៣ បានលើខេត្តព្រះសីហនុ ឈ្នះមេដាយសរុប ១៧គ្រឿង មាស៩ ប្រាក់៥ សំរឹទ្ធ៣៕