កីឡាករបាល់ទះ ៥ រូបមានកំណត់ត្រា​វាយ​​សេ​វាលឿនបំផុតក្នុងលោក ខណៈ Leon ឈរ​លេខ២

ក្នុងកីឡាបាល់ទះ ក្រៅអំពីជំនាញផ្សេងៗតាមតួនាទីរបស់កីឡាករនីមួយៗ ការចេញសេវាលឿន រហ័ស និងធ្ងន់ ក៏ជារឿងសំខាន់ផងដែរ ដើម្បីឱ្យក្រុមរបស់ពួកគេអាចរកពិន្ទុបាន ហើយបច្ចុប្បន្នអ្នកកាន់កំណត់ត្រាចេញសេវាលឿនបំផុតក្នុងលោកកំពុងកាន់កាប់ដោយកីឡាករ ប៉ូឡូញ Mikołaj Sawicki។

ពីមុនកំណត់ត្រាអ្នកវាយសេវាលឿនបំផុតក្នុងពិភពលោក គឺត្រូវបានកាន់កាប់ដោយកំពូលកីឡាករ Wilfredo Leon ប៉ុន្តែឥឡូវកំណត់ត្រានេះ ត្រូវបានបំបែកដោយមិត្តរួមសញ្ជាតិរបស់គេកីឡាករ Mikołaj Sawicki ទៅហើយ។

ថ្ងៃនេះសារព័ត៌មាន «កម្ពុជាថ្មី» សូមលើកយកកំពូលកីឡាករទាំង ៥ ដែលជាប់ឈ្មោះចេញសេវាលឿនបំផុតក្នុងពិភពលោកគិតត្រឹមឆ្នាំ ២០២៥ នេះ៖

៥. កីឡាករជម្រើសជាតិ ប៉ូឡូញ Bartosz Filipiak៖ អ្នកលេងតួនាទីស្មាត់វ័យ ៣១ ឆ្នាំ កម្ពស់ ១.៩៧ ម៉ែត្ររូបនេះធ្លាប់ធ្វើបានកំណត់ត្រាចេញសេវាលឿនបំផុត ក្នុងល្បឿន ១៣៤ គីឡូម៉ែត្រក្នុងមួយម៉ោង។ កំណត់ត្រានេះ Bartosz ធ្វើបាននៅក្នុងការប្រកួតពាន Polish Cup កាលពីខែ មករា ឆ្នាំ ២០២០។ ​ពេលនោះក្រុមរបស់គេ Trefl Gdańsk ជួបគ្នាជាមួយក្រុម Jastrzębski Węgiel។

៤. កីឡាករជម្រើសជាតិ អ៉ីតាលី Ivan Zaytsev៖ អ្នកលេងតួនាទីស្មាត់វ័យ ៣៧ ឆ្នាំ កម្ពស់ ២.០៤ ម៉ែត្ររូបនេះ ធ្លាប់ធ្វើបានកំណត់ត្រាចេញសេវាលឿនបំផុតក្នុងល្បឿន ១៣៤ គីឡូម៉ែត្រក្នុងមួយម៉ោង។ កំណត់ត្រានេះ Ivan ធ្លាប់ធ្វើបាននៅក្នុងឆ្នាំ ២០១៨ ដែលពេលនោះរូបគេលេងតំណាងឱ្យក្រុមជម្រើសជាតិ អ៉ីតាលី ក្នុងពានរង្វាន់ World League ២០១៨។

៣. កីឡាករជម្រើសជាតិ ហូល្លង់ Nimir Abdel-Aziz៖ អ្នកលេងតួនាទីស្មាត់វ័យ ៣៣ ឆ្នាំរូបនេះ ធ្លាប់ធ្វើបានកំណត់ត្រាវាយសេវាលឿនបំផុតក្នុងល្បឿន ១៣៧ គីឡូម៉ែត្រក្នុងមួយម៉ោង ដែលពេលនោះរូបគេធ្វើបានក្នុងការប្រកួត ដែល ហូល្លង់ យកឈ្នះលើក្រុម អ៉ីរ៉ង់ ៣ សិតទល់នឹង ២ ក្នុងពាន FIVB Men’s Volleyball Nations League ២០២៤។

២. កីឡាករជម្រើសជាតិ ប៉ូឡូញ Wilfredo Leon៖ អ្នកលេងតួនាទីស្មាត់ វ័យ ៣២ ឆ្នាំរូបនេះ ធ្លាប់ធ្វើបានកំណត់ត្រាចេញសេវាលឿនបំផុតក្នុងល្បឿន ១៣៨ គីឡូម៉ែត្រក្នុងមួយម៉ោង។ កំណត់ត្រានេះ Leon ធ្វើបាននៅក្នុងឆ្នាំ ២០២៣ ក្នុង​ការ​ប្រកួត​ជើង​ឯក​ទ្វីប​អឺរ៉ុប European Championship ដែលក្រុមជម្រើសជាតិ ប៉ូឡូញ ជួបជាមួយក្រុមជម្រើសជាតិ ដាណឺម៉ាក។

១. កីឡាករជម្រើសជាតិ ប៉ូឡូញ Mikołaj Sawicki៖ អ្នកលេងតួនាទីស្មាត់ វ័យ ២៥ ឆ្នាំរូបនេះ បានក្លាយជាកីឡាករដំបូងគេ ដែលបានបំបែកកំណត់ត្រា Wilfredo Leon ក្លាយជាកីឡាករដែលចេញសេវាលឿនបំផុតក្នុងពិភពលោក ពោលគឺក្នុងល្បឿន ១៤០ គីឡូម៉ែត្រក្នុងមួយម៉ោង។ កំណត់ត្រានេះ Mikołaj ធ្វើបាន នៅក្នុងការប្រកួតពាន PlusLiga នាខែ វិច្ឆិកា ឆ្នាំ ២០២៣ ដែលក្រុមរបស់គេ Trefl Gdańsk ជួបគ្នាជាមួយក្រុម Projekt Warszawa។

អត្ថបទ៖ សេម កុសល
ប្រភព៖ Now Volleyball