កីឡា

ក្រុមនារីភ្នំពេញក្រោន មានជប៉ុន ២នាក់ ត្រៀមប៉ះជើងឯកលីគនារីឥណ្ឌា ថ្ងៃចន្ទនេះ

បានផុស

១០ ខែ មុន

នៅ

ថ្ងៃសៅរ៍ ២៣ សីហា ២០២៥

ដោយ

ក្រុមបាល់ទាត់នារី ភ្នំពេញក្រោន បានទទួលសិទ្ធិធ្វើម្ចាស់ផ្ទះរៀបចំការប្រកួតជម្រុះក្នុងពូល នារីកំពូលអាស៊ី AFC Women’s Champions League ចាប់ពីថ្ងៃទី ២៥ ដល់ ទី៣១ ខែសីហា ឆ្នាំ ២០២៥ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមជាម្ចាស់ផ្ទះ ក្រុមនារីភ្នំពេញក្រោន ត្រូវធ្វើការធ្ងន់មែនទែនដោយនៅក្នុងពូល E គឺ មានក្រុមជើងឯកលីគនារីឥណ្ឌា East Bengal និងក្រុមជើងឯកលីគនារីហុងកុង Kitchee។ ក្រុមទាំងពីរសុទ្ធតែមានកម្រិតគុណភាព និងចំណាត់ថ្នាក់ខ្ពស់ជាងក្រុមជើងឯកលីគនារីកម្ពុជា។

ទោះបីជាយ៉ាងណា ក្រុមនារីភ្នំពេញក្រោន បាននាំចូលសមាជិកថ្មីជាកីឡាការិនីបរទេស១រូបទៀតដើម្បីពង្រឹងក្រុមសម្រាប់ការប្រកួតពានអាស៊ីលើកដំបូងរបស់ខ្លួននេះ។ កាលពីថ្ងៃទី៥ ខែសីហា ឆ្នាំ ២០២៥ ក្លិបបានប្រកាសនាំចូលកីឡាការិនី Kuroki Airi ដែលលេងក្នុងតួនាទីជាខ្សែប្រយុទ្ធកណ្តាល មកពីក្លិប Loveledge Nagoya របស់ប្រទេសជប៉ុន។

វត្តមានរបស់កីឡាការិនី Kuroki Airi បន្ថែមកីឡាការិនីជប៉ុន Ichikawa Miki ដែលលេងក្នុងតួនាទីជាខ្សែបម្រើការពារ។ ភ្នំពេញក្រោនបាននាំចូល Miki ពីក្លិប Loveledge ក្នុងក្របខណ្ឌលីគទី ២ របស់ប្រទេសជប៉ុន កាលពីខែសីហា ឆ្នាំ ២០២៤។

ទាំងកីឡាការិនី Ichikawa Miki និង Kuroki Airi សុទ្ធតែមានសិទ្ធិប្រកួតក្នុងពានលីគនារីកម្ពុជា Cambodian Women’s League និងពានរង្វាន់អន្តរជាតិ។

សូមបញ្ជាក់ថា សម្រាប់ការប្រកួតជម្រុះពាននារីអាស៊ី AFC Women’s Championship League ក្រុមនារី ភ្នំពេញក្រោន ត្រូវប្រកួតជាមួយ East Bengal នៅថ្ងៃចន្ទ ទី២៥ ខែសីហា និងចុងក្រោយ ប្រកួតជាមួយ Kitchee នៅថ្ងៃទី៣១ ខែសីហា។ ក្រុមលេខ១ ក្នុងពូលនឹងបានកៅអីឡើងទៅជុំចុងក្រោយ ឆ្នាំ ២០២៦៕

អត្ថបទ៖ វីរបុត្រ