កីឡា

ក្រុមនារី ភ្នំពេញក្រោន ប្រកួតជាមួយ ក្រុមជើងឯកលីគនារីឥណ្ឌា East Bengal យប់នេះ

បានផុស

១០ ខែ មុន

នៅ

ថ្ងៃចន្ទ ២៥ សីហា ២០២៥

ដោយ

ក្រុមម្ចាស់ជើងឯកលីគនារីកម្ពុជា ភ្នំពេញក្រោន ត្រូវប្រកួតជាមួយ ក្រុមនារីរបស់ឥណ្ឌា East Bengal វេលាម៉ោង ៧យប់ ថ្ងៃចន្ទ ទី២៥ ខែសីហា ឆ្នាំ ២០២៥ នៅពហុកីឡដ្ឋានជាតិអូឡាំពិក សម្រាប់ការប្រកួតសន្សំពិន្ទុក្នុងពូល E ពាននារីអាស៊ី AFC Women’s Champions League ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការប្រកួតសន្សំពិន្ទុដ៏សំខាន់ ក្រុមដែលទទួលបានជ័យជម្នះ មានភាគរយខ្ពស់ក្នុងការឡើងទៅជុំចុងក្រោយឆ្នាំ ២០២៦។ ពូល E មានតែ ៣ ក្រុមប៉ុណ្ណោះ ដោយត្រូវធ្វើការប្រកួតតែ ២ លើកប៉ុណ្ណោះ ដូច្នេះបើក្រុមណា ឈ្នះ ១ ប្រកួតដំបូង គឺមានសង្ឃឹមតែម្តង។ ទោះបីជាយ៉ាងណា ក្រុមនារីភ្នំពេញក្រោន ត្រូវធ្វើការធ្ងន់មែនទែនដោយប៉ះក្រុម East Bengal ដែលជាក្រុមជើងឯកលីគកំពូលនារីឥណ្ឌា។

ក្រុមនារីឥណ្ឌា East Bengal ត្រូវបានបង្កើតឡើងកាលពីឆ្នាំ ២០០១ ដែលកំពុងលេងនៅលីគបាល់ទាត់នារីកំពូលឥណ្ឌា។ ចាប់តាំងពីចូលរួមប្រកួតលីគកំពូលនៅឆ្នាំ ២០០១ ពួកគេទើបតែឈ្នះ ជើងឯក លើកដំបូងគឺនៅរដូវកាល ២០២៤-២៥ ដែលទទួលបានកៅអី លេងពានរង្វាន់អាស៊ី។ ជាមួយគ្នានេះ ពួកគេបានឈ្នះពាន Kanyashree Cup ៣លើក និងពាន Women’s IFA Shield ១លើក។

ក្រុម East Bengal បានឈ្នះពានរង្វាន់ក្នុងស្រុក ២ ក្នុងមួយរដូវកាលចុងក្រោយ។ អ្វីដែលគួរឲ្យចាប់អារម្មណ៍ ពួកគេ មានសមាជិកបរទេសចំនួន ៤ នាក់គឺ កីឡាការិនី Elshaddai Acheampong អាយុ២១ឆ្នាំ ជាខ្សែប្រយុទ្ធសញ្ជាតិហ្គាណា។ ខ្សែបម្រើ Maurine Achieng សញ្ជាតិកេនយ៉ា, ខ្សែប្រយុទ្ធ Resty Nanziri សញ្ជាតិអ៊ូហ្គង់ដា និង ខ្សែប្រយុទ្ធសញ្ជាតិអ៊ូហ្គង់ដា Fazila Ikwaput។

កីឡាការិនី Fazila Ikwaput ជាខ្សែប្រយុទ្ធដ៏គ្រោះថ្នាក់ និងមានបទពិសោធច្រើន បើទោះជាអាយុទើប ២៤ ឆ្នាំ។ គិតចាប់តាំងពីឆ្នាំ ២០១៦ ដល់ ២០២៥ កីឡាការិនីរូបនេះបានលេងឲ្យក្លិប ៦ ផ្សេងគ្នា ក្នុងនោះរកបាន ១១១ គ្រាប់។ ជាមួយគ្នានេះ រូបគេបានជាប់ជម្រើសជាតិនារី អ៊ូហ្គង់ដា តាំងពីឆ្នាំ ២០១៦ ដោយបង្ហាញខ្លួនលើឆាកអន្តរជាតិ ១៥ លើក រកបាន ១០ គ្រាប់។

នេះជាលើកដំបូងរបស់ក្រុមនារីភ្នំពេញក្រោនដែលប្រកួតអន្តរជាតិ។ កន្លងមក ពួកគេមិនធ្លាប់មានប្រវត្តិប្រកួតអន្តរជាតិឡើយទាំងកម្រិតតំបន់អាស៊ាន និងអាស៊ី ប៉ុន្តែក្រុមកីឡាការិនីកម្ពុជាមួយនេះមានបទពិសោធច្រើនជាមួយក្រុមបាល់ទាត់ជម្រើសជាតិនារីកម្ពុជាលើឆាកអន្តរជាតិ។

ការប្រកួតបន្ទាប់ ក្រុមនារីភ្នំពេញក្រោន ត្រូវប៉ះក្រុមជើងឯកលីគនារីហុងកុង Kitchee នៅថ្ងៃទី២៨ ខែសីហា ដែលជាការប្រកួតចុងក្រោយ ប៉ុន្តែជាការប្រកួតលើកទី១សម្រាប់ក្រុមនារីហុងកុង ដែលត្រូវប្រកួតចុងក្រោយជាមួយក្រុម East Bengal នៅថ្ងៃទី៣១ ខែសីហា ឆ្នាំ ២០២៥។