ចរាចរណ៍

រថយន្តដឹកជ្រូក បោះពួយបុករថភ្លើង រងរបួសធ្ងន់ ៤ នាក់ នៅស្រុកសង្កែ

បានផុស

៨ ខែ មុន

នៅ

ថ្ងៃព្រហស្បតិ៍ ៩ តុលា ២០២៥

ដោយ

យ៉ាងហោចណាស់ក៏មានបុរសចំនួន ៤ នាក់ បានរងរបួសធ្ងន់-ស្រាល ក្រោយបើករថយន្តដឹកជ្រូក បុកជាមួយរថភ្លើងដឹកខ្សាច់ដែលកំពុងបើកបរឆ្លងកាត់ផ្លូវហាយវ៉េ បណ្ដាលឲ្យក្បាលរថយន្តដាច់ធ្លាក់ដល់ដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ នៃគ្រោះថ្នាក់នេះបានកើតឡើងកាលពីវេលាម៉ោង ២ និង ៣០ នាទី រំលងអធ្រាត្រ ឈានចូលថ្ងៃទី ៩ ខែតុលា ឆ្នាំ ២០២៥ នៅចំណុចផ្លូវឆ្លងកាត់ ហាយវ៉េ ស្ថិតក្នុងក្រុមទី ១៩ ភូមិអូរដំបង ឃុំអូរដំបង ២ ស្រុកសង្កែ ខេត្តបាត់ដំបង។

ប្រភពនៅកន្លែងកើតហេតុបានប្រាប់ថា ករណីគ្រោះថ្នាក់ចរាចរណ៍ខាងលើនេះបានកើតឡើងរវាង រថភ្លើងដឹកខ្សាច់ ១ ខ្សែ បើកបរទិសដៅពីត្បូងទៅជើង(ភ្នំពេញ-បាត់ដំបង)។ លុះមកដល់ចំណុចកើតហេតុដែលជាផ្លូវឆ្លងកាត់ផ្លូវហាយវ៉េ ក៏មានរថយន្តធុនធំដឹកជ្រូក ពណ៌លឿង ១ គ្រឿង ពាក់ស្លាកលេខ ភ្នំពេញ 3F-3307 បើកបរដោយបុរសម្នាក់ និងអ្នករួមដំណើរ ៣ នាក់ ទិសដៅពីកើតទៅលិច ក៏បានជ្រុលទៅបុករថភ្លើងពេញទំហឹង បណ្ដាលឲ្យក្បាលរថយន្តដាច់ធ្លាក់ដល់ដី និងបង្កឲ្យមនុស្សរងរបួសធ្ងន់-ស្រាល ៤ នាក់។

ក្រោយពេលកើតហេតុ ជនរងគ្រោះ ត្រូវបានសមត្ថកិច្ចដឹកបញ្ជូនទៅសង្គ្រោះព្យាបាលនៅមន្ទីរពេទ្យ។ ចំណែករថយន្តខាងលើ កម្លាំងជំនាញផ្នែកចរាចរណ៍ បានចុះធ្វើកំណត់ហេតុយកទៅរក្សាទុក ដើម្បីរង់ចាំដោះស្រាយតាមផ្លូវច្បាប់។ ដោយឡែករថភ្លើងក៏បានបន្តដំណើរចូលទៅក្នុងស្ថានីយខេត្តបាត់ដំបងបាត់ទៅ ដោយនៅពេលនោះគេមិនទាន់ដឹងថា តើរនាំងស្វ័យប្រវត្តិដែលដាក់នៅសងខាងផ្លូវរថភ្លើងនោះបានដំណើរការធ្លាក់មកបិទផ្លូវ និងឲ្យសញ្ញាភ្លើងដល់រថយន្តដែរឬទេ?៕

អត្ថបទ ៖ សោ និយមរ័ត្ន