កម្លាំងចម្រុះនៃរដ្ឋបាលក្រុងស្វាយរៀង ចុះអប់រំ និងរៀបចំសណ្តាប់ធ្នាប់ នៅតំបន់ជុំវិញផ្សារវាលយន្ត

នៅថ្ងៃទី២៨ ខែមករា ឆ្នាំ២០២៦ កម្លាំងចម្រុះនៃរដ្ឋបាលក្រុងស្វាយរៀង បានចុះយុទ្ធនាការអប់រំ និងរៀបចំសណ្តាប់ធ្នាប់នៅជុំវិញតំបន់ផ្សារវាលយន្តដើម្បីពង្រឹងសណ្តាប់ធ្នាប់សាធារណៈ កាត់បន្ថយការកកស្ទះចរាចរណ៍ និងលើកកម្ពស់សោភ័ណភាពទីក្រុងឱ្យកាន់តែមានរបៀបរៀបរយ។

យុទ្ធនាការនេះត្រូវបានដឹកនាំផ្ទាល់ដោយ លោក រស់ វាសនា អភិបាលរងក្រុងស្វាយរៀង ដោយមានការចូលរួមសហការយ៉ាងសកម្មពីសំណាក់ កម្លាំងអធិការដ្ឋាននគរបាលក្រុងស កម្លាំងកងរាជអាវុធហត្ថក្រុង អាជ្ញាធរមូលដ្ឋានសង្កាត់ និងមន្ត្រីពាក់ព័ន្ធជាច្រើនរូបទៀត។

នៅក្នុងសកម្មភាពចុះពង្រឹងសណ្តាប់ធ្នាប់នេះ ក្រុមការងារចម្រុះបានធ្វើការសម្របសម្រួល និងណែនាំដោយផ្ទាល់ដល់អាជីវករ ដែលតាំងលក់ដូរតាមដងផ្លូវ និងលើចិញ្ចើមផ្លូវសាធារណៈ ឱ្យយល់ដឹងអំពីសារៈសំខាន់នៃសណ្តាប់ធ្នាប់។ គោលដៅសំខាន់ៗនៃសកម្មភាពនេះរួមមាន៖ ១.ការតាំងលក់តាមការកំណត់៖ ណែនាំឱ្យអាជីវករទាំងអស់ត្រូវដាក់តាំងលក់ទំនិញ ឱ្យស្របតាមខ្សែបន្ទាត់ដែលរដ្ឋបាលក្រុងបានកំណត់ ជៀសវាងការរំលោភមកលើទ្រូងផ្លូវ ដែលបង្កឱ្យមានការកកស្ទះដល់អ្នកដំណើរ។

២.ការកាត់បន្ថយការកកស្ទះ៖ ការរៀបចំឱ្យមានរបៀបរៀបរយនេះ នឹងជួយសម្រួលដល់ចរាចរណ៍ជុំវិញផ្សារ ដែលកន្លងមកតែងមានភាពស្មុគស្មាញ ជាពិសេសក្នុងម៉ោងមមាញឹក។ ៣.កិច្ចសហការ និងការយោគយល់៖ លោកអភិបាលរង ក៏បានអំពាវនាវដល់អាជីវករ ឱ្យមានការយោគយល់ និងចូលរួមសហការជាមួយអាជ្ញាធរ ដើម្បីប្រែក្លាយតំបន់ផ្សារវាលយន្ត ឱ្យក្លាយជាទីកន្លែងដែលមានផាសុកភាព ស្អាត និងមានសណ្តាប់ធ្នាប់ល្អសម្រាប់ទាំងអស់គ្នា។

តាមរយៈការចុះរៀបចំជាប្រចាំនេះ រដ្ឋបាលក្រុងស្វាយរៀង រំពឹងថានឹងផ្លាស់ប្តូរឥរិយាបថនៃការលក់ដូរឱ្យមានភាពរៀបរយជាងមុន។ អាជ្ញាធរក៏បានបញ្ជាក់ផងដែរថា នឹងបន្តតាមដាន និងអនុវត្តវិធានការនេះជាបន្តបន្ទាប់ ដើម្បីធានាថាគ្មានការរំលោភបំពានចិញ្ចើមផ្លូវសាធារណៈកើតឡើងវិញ ដែលប៉ះពាល់ដល់ផលប្រយោជន៍រួមរបស់ប្រជាពលរដ្ឋក្នុងក្រុង៕

ដោយ៖ភក្ដី