ទូតកូរ៉េខាងត្បូងបញ្ជាក់ពីកិច្ចសហការល្អជាមួយកម្ពុជាក្នុងការបង្ក្រាបអំពើឆបោកតាមអនឡាញ

ជំនួបជាមួយរដ្ឋមន្ត្រីការបរទេសកម្ពុជា កាលពីថ្ងៃចន្ទ ឯកអគ្គរដ្ឋទូតកូរ៉េខាងត្បូង បានលើកឡើងពីឧក្រិដ្ឋកម្មឆបោកតាមប្រព័ន្ធបច្ចេកវិទ្យា (Online Scams) ខណៈបាននិងកំពុងកើតមាននៅក្នុងប្រទេសកម្ពុជា។ លោកឯកអគ្គរដ្ឋទូត បានបញ្ជាក់ពីកិច្ចសហការល្អរវាងកម្ពុជា និងកូរ៉េខាងត្បូង ក្នុងការទប់ស្កាត់ និងបង្ក្រាបអំពើឆបោកតាមអនឡាញ។

លោក គឹម ឆាងយ៉ុង ឯកអគ្គរដ្ឋទូតកូរ៉េខាងត្បូងនៅកម្ពុជា បានវាយតម្លៃខ្ពស់ចំពោះកិច្ចសហប្រតិបត្តិការល្អរវាងប្រទេសទាំងពីរ និងសមិទ្ធផលរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន ជាពិសេសបទល្មើសឆបោកតាមប្រព័ន្ធបច្ចេកវិទ្យា។ លោកឯកអគ្គរដ្ឋទូត បានបង្ហាញការប្តេជ្ញាចិត្តក្នុងការធ្វើការយ៉ាងជិតស្និទ្ធជាមួយស្ថាប័នពាក់ព័ន្ធកម្ពុជា ដើម្បីធ្វើឱ្យកាន់តែស៊ីជម្រៅនូវភាពជាដៃគូយុទ្ធសាស្ត្ររវាងប្រទេសទាំងពីរ ក្នុងអំឡុងពេលបេសកកម្មការទូតនៅកម្ពុជា។ នេះបើយោងតាមខ្លឹមសារក្នុងសេចក្ដីប្រកាសព័ត៌មានរបស់ក្រសួងការបរទេសកម្ពុជា នៅថ្ងៃទី៣ ខែកុម្ភៈនេះ។

លោក ប្រាក់ សុខុន រដ្ឋមន្ត្រីការបរទេសកម្ពុជា បានស្វាគមន៍ និងអបអរសាទរចំពោះលោក គីម ឆាងយ៉ុង ដែលត្រូវបានតែងតាំងជាឯកអគ្គរដ្ឋទូតប្រចាំកម្ពុជា​ ហើយលោក ក៏បង្ហាញនូវការពេញចិត្តចំពោះស្ថានភាពដ៏ល្អប្រសើរ និងស្និទ្ធស្នាលនៃទំនាក់ទំនងទ្វេភាគី ដែលបាននិងកំពុងឈានឡើងជាលំដាប់សម្រាប់កិច្ចសហប្រតិបត្តិការដ៏រឹងមាំរវាងកម្ពុជា និងកូរ៉េខាងត្បូងស្ទើរគ្រប់វិស័យ ជាពិសេសនោះពាណិជ្ជកម្ម និងវិនិយោគ ការពារជាតិ និងសន្តិសុខ អប់រំ និងការផ្លាស់ប្តូររវាងប្រជាជន និងប្រជាជន។

លោកប្រមុខការទូតកម្ពុជា បានបញ្ជាក់ថា ក្រសួងការបរទេសនឹងបន្តផ្តល់នូវកិច្ចសហប្រតិបត្តិការ និងការសម្របសម្រួលជិតស្និទ្ធជាមួយឯកអគ្គរដ្ឋទូត គីម ឆាងយ៉ុង និងស្ថានទូតកូរ៉េនៅភ្នំពេញ ដើម្បីពង្រឹងពង្រីកទំនាក់ទំនងទ្វេភាគី ក៏ដូចជាកិច្ចសហប្រតិបត្តិការសម្រាប់ផលប្រយោជន៍ទៅវិញទៅមកនៃប្រជាជនទាំងពីរ។ លោកក៏បានគូសរំលេចពីការថ្លែងអំណរគុណរបស់កម្ពុជាចំពោះកូរ៉េខាងត្បូង សម្រាប់ជំនួយអភិវឌ្ឍន៍ផ្លូវការជាបន្តបន្ទាប់ ដែលរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច-សង្គមរបស់កម្ពុជា។

ខណៈដែលឆ្នាំ២០២៧ ជាខួបលើកទី៣០នៃការបង្កើតទំនាក់ទំនងការទូតឡើងវិញរវាងកម្ពុជា និងកូរ៉េខាងត្បូង ភាគីទាំងពីរ បានបង្ហាញពីបំណងក្នុងការរៀបចំសកម្មភាពនានា ដើម្បីអបអរសាទរព្រឹត្តិការណ៍ដ៏សំខាន់នេះ ព្រមទាំងខិតខំជំរុញទំនាក់ទំនងទ្វេភាគីដល់កម្រិតថ្មីបន្ថែមទៀត៕