ព័ត៌មានអន្ដរជាតិ

លោក វ៉ាង យី លើកយោបល់ថា អឺរ៉ុបនិងចិនគួរតែជាដៃគូសហការ ជាជាងគូប្រជែង

បានផុស

២ នាទី មុន

នៅ

ថ្ងៃសុក្រ ២៦ មិថុនា ២០២៦

ដោយ

រដ្ឋមន្ត្រីការបរទេសចិន លោក វ៉ាង យី លើកឡើងកាលពីថ្ងៃព្រហស្បតិ៍ថា ប្រទេសចិននិងអឺរ៉ុប គួរតែជាដៃគូសហការជាជាងធ្វើជាគូប្រជែង ដោយសង្កត់ធ្ងន់ថា ការអភិវឌ្ឍរបស់ប្រទេសចិន បង្ហាញពីឱកាសសម្រាប់អឺរ៉ុបជាជាងបញ្ហាប្រឈម។ នេះបើយោងតាមទីភ្នាក់ងារសារព័ត៌មាន Xinhua ផ្សាយថ្ងៃទី២៦ ខែមិថុនា ឆ្នាំ២០២៦ ។

លោក វ៉ាង បានធ្វើការកត់សម្គាល់បែបនេះ អំឡុងពេលកិច្ចពិភាក្សានៅទីក្រុងប៉េកាំង ជាមួយរដ្ឋមន្ត្រីការបរទេសអូទ្រីស លោកស្រី Beate Meinl-Reisinger ខណៈភាគីទាំងពីរបានប្រារព្ធខួបលើកទី៥៥ នៃទំនាក់ទំនងការទូតចិន-អូទ្រីស។

រដ្ឋមន្ត្រីការបរទេសចិន លោក វ៉ាង យី ។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ាង និយាយថា៖ « ការអភិវឌ្ឍជាលំដាប់នៃចំណងមិត្តភាពទ្វេភាគីក្នុងរយៈពេលប្រាំទសវត្សរ៍កន្លងមកនេះ ត្រូវបានដឹកនាំដោយការគោរពគ្នាទៅវិញទៅមក សមភាព ការបើកចំហ និងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក។ ភាពជាដៃគូយុទ្ធសាស្ត្រចិន-អូទ្រីស បង្ហាញថា ប្រទេសដែលមានប្រព័ន្ធសង្គម និងវប្បធម៌ខុសៗគ្នា ក៏អាចកសាងទំនាក់ទំនងដ៏រឹងមាំបាន»។

ថ្លែងទៅកាន់ទំនាក់ទំនងចិន-អឺរ៉ុប លោក វ៉ាង និយាយថា ទីក្រុងប៉េកាំងពេញចិត្ត ចំពោះវិធីសាស្រ្តសមហេតុផលនិងជាក់ស្តែងរបស់ប្រទេសអូទ្រីស ហើយសង្ឃឹមថា ទីក្រុង Vienna នឹងបន្តដើរតួនាទីស្ថាបនាក្នុងការលើកកម្ពស់ការសន្ទនា និងកិច្ចសហប្រតិបត្តិការរវាងភាគីទាំងពីរ។

ដោយឡែក លោកស្រី Beate Meinl-Reisinger បានបញ្ជាក់ជាថ្មីនូវការប្តេជ្ញាចិត្តរបស់ប្រទេសអូទ្រីស ចំពោះគោលនយោបាយចិនតែមួយ ហើយប្រទេសលោកស្រីបានយកចិត្តទុកដាក់យ៉ាងខ្លាំង ចំពោះទំនាក់ទំនងជាមួយទីក្រុងប៉េកាំង។

លោកស្រីបានសម្តែងការត្រៀមខ្លួនរួចជាស្រេច ដើម្បីពង្រីកកិច្ចសហប្រតិបត្តិការក្នុងវិស័យពាណិជ្ជកម្ម ការវិនិយោគ និងការអភិវឌ្ឍបៃតង ខណៈគាំទ្រដល់ការសន្ទនាដោយស្មោះត្រង់ ដើម្បីធានាបាននូវការអភិវឌ្ឍប្រកបដោយស្ថិរភាព និងមានសុខភាពល្អនៃទំនាក់ទំនងអឺរ៉ុប-ចិន៕

សម្រួល៖ ណឺ មិនា