វិធានការកូវីដថ្មី! វៀតណាម គ្រោងឲ្យជនបរទេសពាក់ “ខ្សែជើងអេឡិចត្រូនិច” ដើម្បីតាមដាន

ខ្សែជើងអេឡិចត្រូនិច អាចត្រូវបានប្រើដើម្បីឃ្លាំមើលអ្នកជំនាញបរទេស នៅពេលពួកគេមកដល់ និងក្នុងអំឡុងពេលធ្វើចត្តាឡីស័កនៅក្នុងប្រទេស វៀតណាម។

គណៈកម្មាធិការមួយបាននិយាយថា ការផ្ទុះឡើងនៃករណីឆ្លងក្នុងសហគមន៍ ដែលកំពុងកើតមាន បានបង្ហាញពីការត្រួតពិនិត្យខាងវេជ្ជសាស្ត្រដ៏ធូររលុងចំពោះអ្នកដែលធ្វើចត្តាឡីស័ករួចរាល់។

រហូតមកដល់ពេលនេះ ប្រទេសវៀតណាមបានស្នើសុំដល់អ្នកមកដល់ទាំងអស់ ឲ្យស្នាក់នៅក្នុងមជ្ឈមណ្ឌលធ្វើចត្តាឡីស័ករយៈពេល១៤ថ្ងៃ។ ប៉ុន្តែកាលពីសប្តាហ៍មុន ពលករចំណាកស្រុកម្នាក់មកពីប្រទេសជប៉ុន និងអ្នកជំនាញចិនមួយក្រុម ត្រូវបានគេធ្វើរោគវិនិច្ឆ័យឃើញថាមានផ្ទុកជំងឺកូវីដ-១៩ ទោះបញ្ចប់រយៈពេលធ្វើចត្តាឡីស័ក២សប្តាហ៍ក៏ដោយ។

ក្រសួងសុខាភិបាលបាននិយាយថា ចាប់ពីថ្ងៃអង្គារតទៅ បុគ្គលដែលបញ្ចប់ការធ្វើចត្តាឡីស័ក រយៈពេល១៤ថ្ងៃ នឹងមិនត្រូវបានអនុញ្ញាតឲ្យចេញភ្លាមៗនោះទេ។ ប៉ុន្តែក្រសួងមិនទាន់បញ្ជាក់ពីរយៈពេលនៃការបន្តនៅឡើយទេ។

លោកឧបនាយករដ្ឋមន្រ្តី Vu Duc Dam ដែលជាប្រមុខគណៈកម្មាធិការជាតិ សម្រាប់ការការ​ពារនិងគ្រប់គ្រងជំងឺកូវីដ-១៩បាននិយាយថា “អាជ្ញាធរមូលដ្ឋានរួមទាំងមន្រ្តីប៉ូលិសនិងបុគ្គលិ​កពេទ្យផងដែរ ត្រូវតែនាំអ្នកដែលធ្វើចត្តាឡីស័ករួច ទៅកន្លែងស្នាក់នៅរបស់ពួកគេនិងជូនដំ​ណឹងដល់ពួកគេឲ្យបានពេញលេញ នូវអ្វីដែលពួកគេគួរតែធ្វើនៅក្នុងរយៈពេល១៤ថ្ងៃទៀត”។

លោកនិយាយថា មុខជំនួញណាដែលអញ្ជើញអ្នកជំនាញបរទេសមក ត្រូវតែធានាថា អ្នកជំនាញទាំងនេះ បានអនុវត្តយ៉ាងតឹងរ៉ឹងនូវបទប្បញ្ញត្តិស្តីពីការបង្ការ ជំងឺរាតត្បាត។

លោក Dam គូសបញ្ជាក់ថា បើទោះបីជាមានភាពស្មុគស្មាញក៏ដោយ ជំងឺរាតត្បាតកូវីដ-១៩ បានស្ថិតក្រោមការគ្រប់គ្រងនៅក្នុងប្រទេសវៀតណាម ប៉ុន្តែសកម្មភាពចាំបាច់បន្ថែមទៀតត្រូវតែធ្វើឡើង៕

ប្រែសម្រួលដោយ៖ Vann Vann

ប្រភព៖ VN Explorer

ចុចអាន៖ ឆ្លងមនុស្សមិនអស់ចិត្ត ជំងឺកូវីដ ១៩ ឆ្លងទាំងសត្វតោ ៨ ក្បាលទៀតនៅឥណ្ឌា