ព័ត៌មានអន្ដរជាតិ

អតីតនាយករដ្ឋមន្ត្រីថៃ Abhisit រងការវាយប្រហារចាស់ដៃពីគណបក្សភឿថៃ

បានផុស

៣ years មុន

នៅ

ថ្ងៃអង្គារ ៣ ឧសភា ២០២២

ដោយ

អតីតនាយករដ្ឋមន្ត្រីថៃ លោក Abhisit Vejjajiva កំពុងប្រឈមនឹងការវាយប្រហារយ៉ាងខ្លាំងពីគណបក្ស ភឿថៃ (Pheu Thai) ជុំវិញការធ្វើបទសម្ភាសមួយដែលលោកបានអះអាងថា គណបក្សចង់ឈ្នះភ្លូកទឹក-ដីសម្រាប់ការបោះឆ្នោតសកលនាពេលខាងមុខដើម្បីអនុញ្ញាតឲ្យលោក ថាក់ស៊ីន ស៊ីណាវ៉ាត្រា វិលត្រឡប់ចូលប្រទេសថៃវិញ។

នៅក្នុងបទសម្ភាសមួយនៅលើគណនី YouTube ឈ្មោះ “Sapah Thee Sam” លោក Abhisit បាននិយាយថា ខណៈពេលលោកមិនមានបញ្ហាជាមួយគណបក្សភឿថៃសម្រាប់ការទទួលបានជ័យជម្នះក្នុងការបោះឆ្នោតនាពេលខាងមុខ លោកមានការព្រួយបារម្ភអំពីលទ្ធផលដែលជំរុញឲ្យរដ្ឋបាលដឹកនាំដោយបក្សភឿថៃងាកទៅរកការអនុវត្តដែលផ្ទុយនឹងគោលការណ៍នៃអភិបាលកិច្ចល្អដូចជាការលើកលែងទោសអតីតនាយករដ្ឋមន្ត្រីជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកមានប្រសាសន៍ថា ៖«ខ្ញុំតែងតែនិយាយថា ជ័យជម្នះពីការបោះឆ្នោតគឺជាអាណត្តិរបស់ប្រជាពលរដ្ឋ ដើម្បីជំរុញគោលនយោបាយ និងការងារដើម្បីប្រទេសជាតិ ប៉ុន្តែវាមិនមែនជាអាជ្ញាប័ណ្ណដើម្បីធ្វើអ្វីមួយនោះទេ ជាពិសេសថាតើវាប្រឆាំងនឹងគោលការណ៍ច្បាប់»។

ការលើកឡើងរបស់លោក Abhisit បានធ្វើឲ្យមានការរិះគន់យ៉ាងចាស់ដៃពីគណបក្សប្រឆាំងសំខាន់។

លោក Phumtham Wechayachai ទីប្រឹក្សារបស់ប្រធានគណបក្សភឿថៃ បានសរសេរនៅលើ Twitter ថា លោក Abhisit គួរលាងសម្អាតរឿងអាស្រូវនៅក្នុងគណបក្សប្រជាធិបតេយ្យរបស់ខ្លួនដែលត្រូវបានញាំញីដោយការចោទប្រកាន់រឿងអាស្រូវផ្លូវភេទ។

លោក Phumtham ក៏បាននិយាយថា គណបក្សប្រជាធិបតេយ្យមិនទាន់បានសម្អាតឲ្យស្រឡះអំពីតួនាទីរបស់ខ្លួនក្នុងការធ្វើរដ្ឋប្រហារថ្ងៃទី២២ ខែឧសភា ឆ្នាំ២០១៤។

លោក Panthongtae Shinawatra កូនប្រុសរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ក៏បានវាយបកលើលោក Abhisit តាមបណ្តាញ Twitter ដែរ។ លោកបានសរសេរថា ៖«ប្រសិនបើលោកចង់សង្គ្រោះគណបក្សពីរឿងអាស្រូវ ធ្វើទៅ។ សូមកុំប្រើអ្នកដទៃជាឧបករណ៍»។

លោក Wan Ubamrung សមាជិកសភាបក្សភឿថៃប្រចាំទីក្រុងបាំងកក បានសរសេរតាម Facebook ថា វាគួរតែត្រូវបានសរសេរនៅក្នុងធម្មនុញ្ញថា គ្រួសារលោក ស៊ីណាវ៉ាត្រាមិនត្រូវបានពាក់ព័ន្ធនឹងនយោបាយ និងថា គណបក្សប្រជាធិបតេយ្យគួរតែរៀបចំផ្ទះរបស់ខ្លួនឯងជាមុនសិន។

សមាជិកសភាបក្សភឿថៃប្រចាំខេត្ត Ubon Ratchathani លោក Somkid Chueaknong បានរិះគន់លោក Abhisit និងគណបក្សប្រជាធិបតេយ្យអំពីតួនាទីរបស់ខ្លួននៅក្នុងរដ្ឋប្រហារឆ្នាំ២០១៤។

សមាជិកភឿថៃ លោក Chaturon Chaisang បាននិយាយថា ការលើកឡើងរបស់លោក Abhisit គឺដើម្បីបំបាក់ទឹកចិត្តដល់ប្រជាជនពីការបោះឆ្នោតឲ្យគណបក្សភឿថៃ។

លោកបាននិយាយថា ៖«ខ្ញុំមិនយល់ហេតុអ្វីបានជាគាត់កំពុងព្រមានប្រជាជនមិនឲ្យបោះឆ្នោតជូនគណបក្សភឿថៃ និងប្រឈមរដ្ឋប្រហារ។ ប្រទេសជាតិទាំងមូលបានមើលឃើញការខូចខាតយ៉ាងធ្ងន់ធ្ងរដោយសាររដ្ឋប្រហារចុងក្រោយនេះ»៕

ប្រែសម្រួល៖ វីរបុត្រ
ប្រភព៖ bangkokpost

Related Topics:ប្រទេសថៃ