កីឡា

រូបភាពមួយកែងរបស់ គឹម វាសនា ផ្តួល យុគផេត ឲ្យសន្លប់ឈឹង

បានផុស

២ years មុន

នៅ

ថ្ងៃចន្ទ ១៧ តុលា ២០២២

ដោយ

កីឡាករប្រដាល់គុនខ្មែរ គឹម វាសនា បានផ្តួលកីឡាករថៃ យុគផេត ផេតកាសាម ឲ្យសន្លប់ក្នុងទឹកទី២សម្រាប់ការប្រកួតអន្តរជាតិក្នុងកម្មវិធីភេសជ្ជៈប៉ូវកម្លាំងខារ៉ាបាវ កាលពីថ្ងៃអាទិត្យ ទី១៦ ខែតុលា ឆ្នាំ២០២២ នៅសង្វៀនបាយ័នស្ទឹងមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនៅទឹកទី១ កីឡាករទាំងពីរមិនសន្សំសំចៃកម្លាំងទុកឡើយ។ ពួកគេបើកឆាកប្រយុទ្ធតែម្តងតាមរយៈកណ្តាប់ដៃ ទាត់ និងកែង ប៉ុន្តែមិនមានចំណុចគ្រោះថ្នាក់គួរឲ្យកត់សំគាល់ខ្លាំងទេ។ យ៉ាងណា នៅទឹកទី២ គឹម វាសនា និង យុគផេត ប្តូរកែងគ្នាទៅវិញទៅមកគួរឲ្យចាប់អារម្មណ៍ ហើយនៅចុងទឹកទី២ អ្នកលេងគុនខ្មែរដាក់មួយកែងពេញលើមុខរបស់ យុគផេត បណ្តាលឲ្យដួលផ្ងាពោះ និងសន្លប់ធំតែម្តង។

នេះជាការផ្តួលដៃជាលើកទី២ របស់ គឹម វាសនា សម្រាប់ការប្រកួតពីរលើកចុងក្រោយ ខណៈ យុគផេត ផេតកាសាម ទើបតែផ្តួលអ្នកលេងគុនខ្មែរ គង់ សំបូរ ដើមទឹកទី១តាមរយៈទាត់ជើងក្រោមកាលពីប៉ុន្មានខែមុន។ កាលណោះស្ទើរតែមិនជឿថា គង់ សំបូរ ត្រូវបាន យុគផេតទាត់ឲ្យខូចជើងដើមទឹកទី១។

រាត្រីជាមួយគ្នាកាលពីថ្ងៃអាទិត្យ ទី១៦ ខែតុលានេះដែរ សុខ សុវណ្ណ ត្រូវបានកីឡាករថៃ ឈោគមង្គល ផាក់យុគ ផ្តួលឲ្យសន្លប់ក្នុងទឹកទី៣តាមរយៈផ្លែកែងដ៏មុតស្រួចបណ្តាលឲ្យបែកឈាមហូរស្រោចមុខ។ អ្នកលេងគុនខ្មែររូបនេះមានតែកម្លាំងចិត្តប្រកួត តែគ្មានក្បាច់អ្វីគ្រោះថ្នាក់សោះ៕