កីឡា

ព្រឹទ្ធាចារ្យប្រដាល់ អ៊ុំ រី រៃអង្គាសប្រាក់១ម៉ឺនដុល្លារដើម្បីផ្លាស់ប្តូរក្លិបប្រដាល់គុនខ្មែរអាយុ៣៦ឆ្នាំនៅអាមេរិក

បានផុស

៣ years មុន

នៅ

ថ្ងៃអង្គារ ៤ កក្កដា ២០២៣

ដោយ

ព្រឹទ្ធាចារ្យប្រដាល់ពីសម័យសង្គ្រាម លោកគ្រូតា អ៊ុំ រី កំពុងស្វែងរកជំនួសដើម្បីធ្វើការផ្លាស់ប្តូរក្លិបប្រដាល់«ខ្មែរឃីកបុកស៊ីងឡុងប៊ិច (Long Beach Khmer Kickboxing Center) ទៅទីតាំងថ្មី បន្ទាប់ពីដំណើរការក្លិបអស់រយៈពេល៣៦ឆ្នាំ។

តាមសេចក្តីជូនដំណឹងរបស់ក្លិប«ខ្មែរឃីកបុកស៊ីងឡុងប៊ិច»ថា ម្ចាស់ដីដែលជាអង្គការមួយត្រូវការដីដើម្បីពង្រីកទីជម្រកសម្រាប់ជនគ្មានផ្ទះសម្បែង និងជនមានពិការភាព ដូច្នេះសម្រេចឈប់ជួលឲ្យក្លិបប្រដាល់របស់លោកគ្រូតា អ៊ុំ រី បន្ទាប់ពីបានជួលឲ្យបើកដំណើរការអស់រយៈពេល៣៦ឆ្នាំ។ តាមសេចក្តីជូនដំណឹងគឺផុតកំណត់ត្រឹមថ្ងៃទី១ ខែសីហា ឆ្នាំ២០២៣។

លោកគ្រូតា អ៊ុំ រី ជាជើងឯកគុនខ្មែរពីមុនសម័យខ្មែរក្រហមដែលបានប្រកួតចន្លោះឆ្នាំ១៩៦២ ដល់ឆ្នាំ១៩៧៥ ប៉ុន្តែនៅពេលសង្គ្រាមកើតឡើង លោកបានភៀសខ្លួនទៅដល់សហរដ្ឋអាមេរិក។ លោកបានរស់នៅទីក្រុងឡុងប៊ិចដែលជាកន្លែងលោកបានបង្កើតក្លិបប្រដាល់«ខ្មែរឃីកបុកស៊ីងឡុងប៊ិច»នៅឆ្នាំ១៩៨៧។ ក្លិបរបស់លោកបានបណ្តុះបណ្តាលកីឡាករ កីឡាការិនីជាច្រើន និងបានចេញប្រកួតទូទាំងពិភពលោក។ ជាពិសេសក្លិបបានបណ្តុះបណ្តាលជើងឯកចំនួន១៦នាក់ក្រោមការបង្វឹកបង្ហាត់របស់លោក។

ដោយមានអនុស្សាវរីយ៍ និងធនធានកីឡាករ កីឡាការិនីច្រើន លោកគ្រូតា អ៊ុំ រី មិនចង់ឲ្យក្លិបរបស់លោកដែលជាមជ្ឈមណ្ឌលផ្សព្វផ្សាយ និងអភិវឌ្ឍប្រដាល់សេរីខ្មែរបាត់បង់ទេ ដូច្នេះលោកនៅតែបន្តបើក បើទោះជាផ្លាស់ទៅទីកន្លែងថ្មីជួបការខ្វះខាតយ៉ាងណាក៏ដោយ។

ពេលនេះ លោកគ្រូតា អ៊ុំ រី ត្រូវការប្រាក់ក្នុងការផ្លាស់ប្តូរ និងរៀបចំនៅទីកន្លែងថ្មី ដូច្នេះលោកបានរៀបចំរៃអង្គាសថវិកាចំនួន១ម៉ឺនដុល្លារអាមេរិកសម្រាប់ការចំណាយលើការផ្លាស់ប្តូរ និងរៀចំនៅទីកន្លែងថ្មី។ បន្ទាប់ពីប្រកាសស្វែងរកថវិកាតាមការរៃអង្គាសរយៈពេល៥ថ្ងៃកន្លងទៅ លោកទទួលបានប្រាក់ឧបត្ថម្ភពីសប្បុរសជនជិត២ពាន់ដុល្លារអាមេរិកហើយ។

សូមបញ្ជាក់ថា ក្រៅពីប្រើពេលស្ទើរមួយជីវិតដើម្បីប្រដាល់គុនខ្មែរ លោកគ្រូតា អ៊ុំ រី ដែលជាអតីតជើងឯកប្រដាល់សេរីពិភពលោកបាននិពន្ធសៀវភៅមួយក្បាលមានចំណងជើង «I Aam Oum Ry (ខ្ញុំជាអ៊ុំ រី)» ដែលរៀបរាប់ពីជីវិត ការតស៊ូ និងអាជីពប្រដាល់របស់លោក។ សៀវភៅរបស់លោកកំពុងត្រូវបានដាក់លក់តាម amazon៕

សូមចុចទីនេះ ចូលទៅកន្លែងបរិច្ចាគប្រាក់ លោកគ្រូតា អ៊ុំ រី

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ