កីឡា

KIF ចេញច្បាប់ថ្មី កំណត់ឲ្យសង្វៀនសុំច្បាប់ បើចាប់ពី៥ប្រទេសចូលរួម

បានផុស

១ year មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

សហព័ន្ធកីឡាគុនខ្មែរអន្តរជាតិ (KIF) បានចេញគោលការណ៍ថ្មីដែលតម្រូវឲ្យកម្មវិធីប្រកួតគុនខ្មែរទាំងក្នុង និងក្រៅប្រទេសត្រូវស្នើសុំច្បាប់អនុញ្ញាតត្រឹមត្រូវ ប្រសិនបើកម្មវិធីមានកីឡាករ កីឡាការិនីចាប់ពី៥ប្រទេសឡើងទៅចូលរួមប្រកួត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមសេចក្តីប្រកាសទាំងភាសាខ្មែរ និងអង់គ្លេស ជាផ្លូវការកាលពីថ្ងៃទី៣ ខែកុម្ភៈ ឆ្នាំ២០២៥ ដោយលោក មាម រ៉ា ប្រធានសហព័ន្ធគុនខ្មែរអន្តរជាតិ។ ក្រៅពីគោលការណ៍កំណត់ឲ្យសង្វៀនស្នើសុំច្បាប់ត្រឹមត្រូវ សហព័ន្ធគុនខ្មែរអន្តរជាតិក៏បានបង្ហាញគោលការណ៍៣ផ្សេងទៀតដែលមានខ្លឹមសារដូចខាងក្រោម។

សហព័ន្ធគុនខ្មែរអន្តរជាតិ ចាប់ផ្តើមរៀបចំការគ្រប់គ្រងរាល់ព្រឹត្តិការណ៍ប្រកួតកីឡាគុនខ្មែរជាលក្ខណៈអន្តរជាតិក្នុង និងក្រៅប្រទេស ទាំងការប្រកួតតាមបទបញ្ជាកីឡា និងការប្រកួតអាជីពចាប់ពី ៥ប្រទេសឡើងទៅ ត្រូវស្នើសុំអាជ្ញាប័ណ្ណរៀបចំការប្រកួតក្នុង និងក្រៅប្រទេស ពីសហព័ន្ធគុនខ្មែរអន្តរជាតិ ដោយប្រើប្រាស់អាជ្ញាកណ្តាល-ចៅក្រមអន្តរជាតិរបស់សហព័ន្ធគុនខ្មែរអន្តរជាតិ។
សហព័ន្ធគុនខ្មែរអន្តរជាតិត្រូវការជ្រើសរើសអាជ្ញាកណ្តាល ចៅក្រមជាតិ និងអន្តរជាតិចំនួន៥០នាក់ ដើម្បីចូលរៀនវគ្គបណ្តុះបណ្តាល និងប្រឡងយក License អាជ្ញាកណ្តាល ចៅក្រមអន្តរជាតិកម្រិត C នាថ្ងៃទី២៧-២៨ ខែកុម្ភៈ ឆ្នាំ២០២៥ និងចុះឈ្មោះបានទាំងខ្មែរ និងបរទេស ទាំងក្នុង និងក្រៅប្រទេសតាម Telegram: +855 10 336 912។
អាជ្ញាកណ្តាល ចៅក្រមគុនខ្មែរអន្តរជាតិនឹងមានសិទ្ធិចូលរួមការងារគ្រប់ការប្រកួតអន្តរជាតិទាំងក្នុង និងក្រៅប្រទេស តាមរយៈសហព័ន្ធគុនខ្មែរអន្តរជាតិ។
គ្រប់ប្រទេសជាសមាជិកគុនខ្មែរអន្តរជាតិត្រូវអនុវត្តសេចក្តីជូនដំណឹងនេះឲ្យមានប្រសិទ្ធភាព ចាប់ពីពេលនេះតទៅ។

តាមរយៈសេចក្តីប្រកាសនេះ សហព័ន្ធគុនខ្មែរជាតិ និងស្ថានីយ៍ទូរទស្សន៍ក្នុងស្រុកដែលមានបំណងរៀបចំកម្មវិធីប្រកួតអន្តរជាតិដែលមានកីឡាករ កីឡាការិនីចាប់ពី៥ប្រទេសឡើងចូលរួមប្រកួតត្រូវស្នើសុំច្បាប់អនុញ្ញាតពីសហព័ន្ធគុនខ្មែរអន្តរជាតិ។

បច្ចុប្បន្ននេះ សហព័ន្ធគុនខ្មែរអន្តរជាតិមិនសូវមានសកម្មភាពប្រកួតទាំងក្នុង និងក្រៅប្រទេស។ ជាទូទៅសហព័ន្ធគុនខ្មែរអន្តរជាតិរៀបចំការប្រកួតគុនខ្មែរជើងឯកពិភពលោកប្រចាំឆ្នាំ និងមហាសន្និបាតប្រចាំឆ្នាំដែលសមាជិកមកពីបណ្តាប្រទេសនានាចូលរួមប្រកួត។

ទោះបីជាយ៉ាងណា សហព័ន្ធគុនខ្មែរអន្តរជាតិមិនសូវមានធនធានកីឡាករ កីឡាការិនី ចៅក្រម អាជ្ញាកណ្តាល និងមន្ត្រីបច្ចេកទេសផ្ទាល់ខ្លួនទេ។ រហូតដល់ពេលនេះ សហព័ន្ធគុនខ្មែរអន្តរជាតិមានប្រទេសជាសមាជិកប្រមាណ៦០ទូទាំងពិភពលោក៕