កីឡា

Wanchaloem ប្រាប់ថា ត្រៀមខ្លួនពេញល្អ ប៉ះ ពុធ សំបូរ ដណ្តើមខ្សែក្រវាត់ WBC

បានផុស

១ year មុន

នៅ

ថ្ងៃអង្គារ ១៨ កុម្ភៈ ២០២៥

ដោយ

កីឡាករប្រដាល់គុនខ្មែរ ពុធ សំបូរ បានធ្វើដំណើរទៅប្រទេសអូស្ត្រាលី កាលពីថ្ងៃទី១៧ ខែកុម្ភៈ ឆ្នាំ២០២៥ ដើម្បីប្រកួតជាមួយកីឡាករថៃ Wanchaloem Chanajan ដណ្តើមខ្សែក្រវាត់មួយថៃ WBC នៅថ្ងៃសៅរ៍ ទី២២ ខែកុម្ភៈ ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វានឹងក្លាយជាការប្រកួតមួយដ៏លំបាកសម្រាប់កីឡាករកម្ពុជា ពុធ សំបូរ ដែលត្រូវប៉ះដៃគូមានបទពិសោធច្រើនលើឆាកអន្តរជាតិ។ កីឡាករថៃ Wanchaloem មានបទពិសោធច្រើនក្នុងការឡើងសង្វៀននៅប្រទេសអូស្ត្រាលី និងចិន ហើយជាគ្រូបង្វឹកប្រដាល់នៅទីនោះថែមទៀត។

កីឡាករថៃ Wanchaloem បានប្រឡូកក្នុងអាជីពប្រដាល់ជាង២០ឆ្នាំ និងធ្លាប់ឡើងសង្វៀនជាង២០០ដង។ រូបគេទទួលបានសមិទ្ធផលជាច្រើនក្នុងអាជីពប្រដាល់ ប៉ុន្តែខ្សែក្រវាត់២ខ្សែដែលគួរឲ្យចាប់អារម្មណ៍បំផុតគឺនៅសង្វៀនប៉ុស្តិ៍លេខ៧ថៃ និងខ្សែក្រវាត់ប៉ុស្តិ៍លេខ៣ថៃ។

Wanchaloem បាននិយាយថា ៖«ខ្ញុំនឹងប្រឹងឲ្យអស់ពីសមត្ថភាពដើម្បីទទួលបានជ័យជម្នះសម្រាប់ការប្រកួតនេះ។ ខ្ញុំបានខំប្រឹងហ្វឹកហាត់ខ្លាំងណាស់ គឺហាត់ពេញតែម្តង។ ខ្ញុំសូមអញ្ជើញបងប្អូនដែលរស់នៅតំបន់ទីក្រុងស៊ីដនី ប្រទេសអូស្ត្រាលីទៅចូលរួមទស្សនាឲ្យបានច្រើនកុះករដើម្បីជាកម្លាំងចិត្តដល់ខ្ញុំ»។

ពុធ សំបូរ ជាកីឡាករកម្ពុជាទី៣ ដែលបានទៅប្រកួតដណ្តើមខ្សែក្រវាត់ WBC នៅប្រទេសអូស្ត្រាលី បន្ទាប់ពីលោក ជ័យ កុសល និង បឺត សង្ឃឹម ប៉ុន្តែកីឡាករទាំងពីរលើកមុនមិនទទួលបានជោគជ័យទេ។ ពុធ សំបូរ បានប្តេជ្ញាធ្វើឲ្យបានល្អបំផុតដើម្បីក្លាយជាកីឡាករកម្ពុជាទី១នាំខ្សែក្រវាត់ WBC ពីទឹកដីអូស្ត្រាលីមកកម្ពុជា។

ពុធ សំបូរ ត្រូវបានអ្នកគាំទ្រចាប់អារម្មណ៍ខ្លាំង បន្ទាប់ពីរូបគេទទួលបានរង្វាន់រថយន្តថ្មី១គ្រឿង បន្ទាប់ពីឈ្នះ ស៊ន រ៉ាគីម កាលពីខែមករា ឆ្នាំ២០២៥។ យ៉ាងណា ការប្រកួតចុងក្រោយ រូបគេបានចាញ់ពិន្ទុ សុខ ធី។ ពុធ សំបូរ ជាកីឡាករដែលទាត់បានល្អ និងមានទម្ងន់៕

អត្ថបទ៖ វីរបុត្រ