ទំនាក់ទំនង​ផ្នែក​ច្បាប់​កម្ពុជា-រុស្ស៊ីកាន់តែរឹងមាំ ២ថ្ងៃបន្ទាប់ពីលោក ហេង សិទ្ធី ត្រូវបានបញ្ជូនដល់កម្ពុជា

កម្ពុជា-រុស្ស៊ីកាលពីថ្ងៃទី២៦ ខែឧសភា ឆ្នាំ២០២៥ បាន​ចុះ​ហត្ថលេខាលើ​អនុស្សារណៈនៃ​ការ​យោគយល់​គ្នារវាង​ក្រសួងយុត្តិធម៌ និង​ការិយាល័យ​អគ្គរដ្ឋអាជ្ញារុស្ស៊ីដែលធ្វើឱ្យ​ទំនាក់ទំនង​ផ្នែក​ច្បាប់​រវាង​ប្រទេស​ទាំង​ពី​កាន់​តែរឹង​មាំ និង​មាន​វិសាលភាព​ទូលំទូលាយ។

អនុស្សារណៈយោគយល់គ្នា​រវាង​កម្ពុជានិងរុស្ស៊ីនោះផ្តោតលើកិច្ចសហប្រតិបត្តិការ លើការប្រយុទ្ធប្រឆាំងនឹងឧក្រិដ្ឋកម្មដែលមានគ្រោះថ្នាក់បំផុតជាអាទិ៍ ឧក្រិដ្ឋកម្មឆ្លងដែន, ឧក្រិដ្ឋកម្មបច្ចេកវិទ្យា, ភេរវកម្ម, សកម្មភាពជ្រុលនិយម, ការជួញដូរអាវុធខុសច្បាប់, ការជួញដូរគ្រឿងញៀន។

ថ្លែង​ក្នុងជំនួប​ជាមួយ​អគ្គរដ្ឋអាជ្ញារដ្ឋសហព័ន្ធ​រុស្ស៊ីលោក អ៊ីហ្គរ ក្រាស្នូវ (Igor Krasnov) នៅទីស្ដីការ​ក្រសួង​យុត្តិធម៌​កម្ពុជាថ្ងៃទី​២៦ ខែ​ឧសភា ឆ្នាំ២០២៥ លោកឧបនាយករដ្ឋមន្ត្រីយុត្តិធម៌ កើត រិទ្ធ បានបង្ហាញការពេញចិត្តចំពោះការរីកចម្រើន និងប្រសិទ្ធភាពនៃកិច្ចសហប្រតិបត្តិការផ្នែកច្បាប់ដ៏ល្អរវាងកម្ពុជា និងរុស្ស៊ី ជាពិសេសរវាងក្រសួងយុត្តិធម៌ និងការិយាល័យអគ្គរដ្ឋអាជ្ញារុស្ស៊ី។ លោក​ឧបនាយករដ្ឋមន្ត្រី​ក៏​បាន​លើកឡើងដែល​ថា អនុស្សរណៈនៃការយោគយល់គ្នាដែលបានចុះហត្ថលេខាថ្មីនេះ នឹងរួមចំណែកលើការបណ្តុះបណ្តាល និងពង្រឹងសមត្ថភាពរបស់មន្ត្រីអនុវត្តច្បាប់, ការចែករំលែកព័ត៌មាន និងការផ្លាស់ប្តូរបទពិសោធន៍ សំដៅលើកកម្ពស់ប្រសិទ្ធភាពនៃការអនុវត្តច្បាប់។

បច្ចុប្បន្ន​រុស្ស៊ីនិង​កម្ពុជា​បានចុះសន្ធិសញ្ញាសំខាន់ៗចំនួន ២ រួចមកហើយគឺ សន្ធិសញ្ញាស្តីពី «ការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ» និង សន្ធិសញ្ញាស្តីពី «បត្យាប័ន» (ចាប់បញ្ជូនជនល្មើសពីប្រទេសមួយទៅប្រទេសមួយទៀត)។

ជាការកត់​សម្គាល់ការ​សម្រេចបាននូវ​អនុស្សារណៈថ្មីៗបន្ថែមទៀតគឺ​តែ២ថ្ងៃប៉ុណ្ណោះ​បន្ទាប់ពី​អាជ្ញាធរ​រុស្ស៊ីបញ្ជូន​អតីតឧកញ៉ា ហេង សិទ្ធី ដែល​កំពុងតាមចាប់ខ្លួនប្រគល់​ឱ្យ​កម្ពុជាវិញបន្ទាប់ពីបាន​ចាប់ខ្លួន​នៅ​រុស្ស៊ីតាំងពី​ខែ​មករា ឆ្នាំ២០២៥មក។

ក្នុង​ជំនួបជាមួយ​ឧបនាយករដ្ឋមន្ត្រី​យុត្តិធម៌កម្ពុជា លោក អ៊ីហ្គរ ក្រាស្នូវ (Igor Krasnov) បានថ្លែងថាតាមរយៈអនុស្សរណៈនេះ ភាគីទាំងពីរនឹងអាចពង្រឹង និងពង្រីកកិច្ចសហប្រតិបត្តិការរវាងគ្នា តាមរយៈការផ្តល់កិច្ចសហការក្នុងការអនុវត្តច្បាប់ ការផ្លាស់ប្តូរបទពិសោធន៍ និងការផ្តល់អាហារូបករណ៍សម្រាប់ពង្រឹងសមត្ថភាពធនធានមនុស្ស។

ស្ថានទូតរុស្ស៊ីបានដកស្រង់ប្រសាសន៍របស់លោក អ៊ីហ្គរ ក្រាស្នូវ ចុះផ្សាយថា៖ «ឯកសារនេះនឹងពង្រឹងមូលដ្ឋានច្បាប់សម្រាប់ការងាររួមគ្នាក្នុងវិស័យទប់ទល់នឹងការគំរាមកំហែងឆ្លងព្រំដែននៃអំពើ ឧក្រិដ្ឋកម្ម នឹងរួមចំណែកដល់ការផ្លាស់ប្តូរការអនុវត្តដ៏តឹងរ៉ឹងបន្ថែមទៀត ដល់ការរួបរួមតែមួយរបស់យើងនៅលើវេទិកាអន្តរជាតិ»។

អគ្គរដ្ឋអាជ្ញារុស្ស៊ីបានបញ្ជាក់ពីការត្រៀមខ្លួនសម្រាប់ភាពជាដៃគូស៊ីជម្រៅជាមួយព្រះរាជាណាចក្រកម្ពុជាលើបញ្ហាផ្សេងទៀត រួមទាំងបញ្ហាទាក់ទងនឹងការគាំទ្រផ្នែកច្បាប់នៃគម្រោងវិនិយោគ ការធានាសិទ្ធិភ្ញៀវទេសចរ ការផ្លាស់ប្តូរបទពិសោធន៍លើការធ្វើទំនើបកម្មនៃច្បាប់។

អ្នកនាំពាក្យ​ក្រសួងយុត្តិធម៌លោក សេង ឌីណា បានបញ្ជាក់មកកម្ពុជាថ្មី​ថាកិច្ចសហប្រតិបត្តិការផ្នែកច្បាប់ជាមួយរុស្ស៊ី​កាន់តែ​រឹង​មាំ ហើយ​នៅ​តែ​មួយជំហានទៀត​ទេកិច្ចសហប្រតិបត្តិការ​ផ្នែក​ច្បាប់​រវាង​ប្រទេស​ទាំង​ពីរ​នឹង​ក្លាយ​ជា​កិច្ចសហប្រតិបត្តិការដែលមានលក្ខណៈគ្រប់ជ្រុងជ្រោយ។

លោកថា៖ «កម្ពុជា និងរុស្ស៊ី ក៏កំពុងតែចរចាផងដែរ លើសន្ធិសញ្ញាស្ដីពីការផ្ទេរទណ្ឌិត។ នៅពេលដែលសន្ធិសញ្ញាស្តីពីការផ្ទេរទណ្ឌិតនេះត្រូវបានចរចាចប់សព្វគ្រប់ដោយជោគជ័យ, កិច្ចសហប្រតិបត្តិការផ្នែកច្បាប់ រវាងកម្ពុជា និងរុស្ស៊ី នឹងត្រូវក្លាយជាកិច្ចសហប្រតិបត្តិការដែលមានលក្ខណៈគ្រប់ជ្រុងជ្រោយ»។

កម្ពុជា-រុស្ស៊ីបាន​បង្កើតទំនាក់ទំនង​ការទូត​ជាមួយគ្នា​នៅឆ្នាំ១៩៥៦ ដែល​កំពុង​កសាង​ទំនាក់ទំនង​ដែល​ទុក​ចិត្ត​ដោយ​ផ្អែក​លើ​ការ​គោរព​និង​ការ​គាំទ្រ​ទៅវិញទៅមក។ នេះក៏អនុវត្តចំពោះវិស័យអនុវត្តច្បាប់ផងដែរ៕

អត្ថបទដោយ ហ៊ុន សិរីវឌ្ឍន៍