ព័ត៌មានជាតិ

ទូតរុស្ស៊ីថា ជំនួយសព្វាវុធ និងថាមពលគឺមានសម្រាប់កម្ពុជាជានិច្ចបើមានតម្រូវការ

បានផុស

២៧ វិនាទី មុន

នៅ

ថ្ងៃព្រហស្បតិ៍ ២៥ មិថុនា ២០២៦

ដោយ

ឯកអគ្គរដ្ឋទូតរុស្ស៊ីប្រចាំកម្ពុជាលោក Anatoly Borovik បានបញ្ជាក់ថាប្រទេសរុស្ស៊ីត្រៀមខ្លួនជួយដល់វិស័យយោធា និងថាមពលកម្ពុជាជានិច្ចប្រសិនជាមានសំណើ។ លោកលើកឡើងបែបនេះក្នុងកម្មវិធីសន្និសីទសារព័ត៌មានដែលរៀបចំឡើងនៅស្ថានទូតរុស្ស៊ីព្រឹកថ្ងៃទី២៥ ខែមិថុនា ឆ្នាំ២០២៦នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Anatoly Borovik មានប្រសាសន៍ថាក្រោយការដួលរលំទៅនៃរបបខ្មែរក្រហម រុស្ស៊ីដែលពីមុនជាអតីតសហភាពសូវៀតជាអ្នកជួយមុនគេមកកម្ពុជាក្នុងការជួយបណ្ដុះបណ្ដាលដល់ទាហាន និងផ្ដល់សព្វាវុធដល់កម្ពុជាឡើងវិញ ហើយជំនួយនេះគឺនៅតែមានជានិច្ចប្រសិនជាកម្ពុជាត្រូវការ។ លោកក៏បានបង្ហើបផងដែរថាប្រទេសរុស្ស៊ីនិងកម្ពុជាក៏កំពុងពិគ្រោះគ្នាលើការពង្រឹងវិស័យយោធារួមគ្នា និងសង្ឃឹមថាមានលទ្ធផលវិជ្ជមាននាពេលខាងមុខ។

លោកថា៖ «ក្នុងដំណាក់កាលថ្មីនេះខ្ញុំចង់គូសបញ្ជាក់ជូនថា រុស្ស៊ីនឹងត្រៀមខ្លួនជានិច្ចដើម្បីនឹងជួយឧបត្ថម្ភជួនដល់កម្ពុជាក្នុងវិស័យនេះ»។

សម្រាប់វិស័យថាមពលវិញលោកឯកអគ្គរដ្ឋទូតបញ្ជាក់ថាប្រទេសលោកក៏ត្រៀមផងដែរសម្រាប់កម្ពុជា វាអាស្រ័យថាកម្ពុជាមានតម្រូវការពីរុស្ស៊ីឬអត់ប៉ុណ្ណោះ។

លោកបានបន្ថែមថា៖ «វិស័យថាមពលយើងត្រៀមខ្លួនដើម្បីបម្រើផលប្រយោជន៍នឹងបំពេញតម្រូវការកម្ពុជាក្នុងការផ្ដល់ហ្គាស LPG LNG ហើយប្រេងជូនកម្ពុជាឱ្យតែកម្ពុជាត្រៀមខ្លួនចាប់ផ្ដើមក្នុងឧស្សាហកម្មមួយនេះ»។

ការលើកឡើងរបស់ឯកអគ្គរដ្ឋទូតរុស្ស៊ីប្រចាំកម្ពុជាពេលនេះគឺ១សប្ដាហ៍ក្រោយពីនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានជួបពិភាក្សាការងារជាមួយប្រធានាធិបតីរុស្ស៊ីលោក វ្លាឌីមៀ ពូទីន នៅទីក្រុងកាហ្សាន កាលពីថ្ងៃទី១៨ ខែមិថុនាកន្លងទៅថ្មីៗនេះ។

ជុំវិញបញ្ហានេះ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោកបណ្ឌិត គិន ភា បានបង្ហាញការយល់ឃើញថាជារឿងល្អប្រសិនជាកម្ពុជាអាចពង្រឹងកិច្ចសហប្រតិបត្តិការយោធាជាមួយរុស្ស៊ីឡើងវិញទាំងការបណ្ដុះបណ្ដាល និងការផ្គត់ផ្គង់សព្វាវុធ រួមទាំងវិស័យថាមពល។ ទោះជាយ៉ាងណាលោកថាកម្ពុជាគួរធ្វើក្រោមរូបភាពណាដែលអាចបញ្ចៀសនូវការចោទប្រកាន់ពីលោកខាងលិចបាន។

លោកបន្ថែមថា៖ «ប្រសិនជាមានកិច្ចសហការលើវិស័យការពារ ដែលអាចឈានដល់ទិញអាវុធពីរុស្ស៊ីបានខ្ញុំគិតថាជារឿងប្រសើរក៏ប៉ុន្ដែកិច្ចសហការនេះយើងត្រូវមានភាពឈ្លាសវៃយ៉ាងណាដើម្បីកុំឱ្យវាធ្លាក់ចូលអន្ទាក់មួយផ្សេងទៀតរបស់ក្រុមប្រទេសលោកខាងលិចដែលគេកំពុងតែហ៊ុំព័ទ្ធទប់ឥទ្ធិពលរបស់រុស្ស៊ី»។

គួររំលឹកថា បន្ទាប់ពីរុស្ស៊ីបើកប្រតិបត្តិការសង្គ្រាមជាមួយអ៊ុយក្រែនកាលពីចុងខែកុម្ភៈ ឆ្នាំ២០២២មក បណ្ដាប្រទេសលោកខាងលិចបានចាប់ផ្ដើមដាក់ទណ្ឌកម្មជាបន្តបន្ទាប់លើរុស្ស៊ី ដោយផ្ដោតលើ ថាមពល ហិរញ្ញវត្ថុ និងបច្ចេកវិទ្យា។ ទណ្ឌកម្មទាំងនេះបានធ្វើឱ្យប៉ះពាល់យ៉ាងណាខ្លាំងដល់ទំនាក់ទំនងពាណិជ្ជកម្មរុស្ស៊ី និងកម្ពុជា។ ជាក់ស្ដែងទំនាក់ទំនងពាណិជ្ជកម្មរវាងកម្ពុជានិងរុស្ស៊ីកាលពីឆ្នាំ២០២១ មានតម្លៃប្រមាណ២៣៩លានដុល្លារអាមេរិក តែទំហំនេះបានធ្លាក់មកនៅត្រឹម៥៥លានដុល្លារប៉ុណ្ណោះនៅឆ្នាំ២០២៥។

ឆ្លើយតបទៅនឹងសំណួររបស់កម្ពុជាថ្មីទាក់ទងនឹងបញ្ហានេះ ឯកអគ្គរដ្ឋទូត Anatoly Borovik បានបញ្ជាក់ថា រុស្ស៊ីមានមធ្យោបាយដើម្បីធានានូវការរក្សាពាណិជ្ជកម្ម និងទំនាក់ទំនងនេះបាន ហើយមានប្រទេសមួយចំនួនក្នុងតំបន់អាស៊ានបានអនុវត្តន៍រួចហើយដូចជាវៀតណាម ហ្វីលីពីន និងម៉ាឡេស៊ីជាដើម។

លោកចាត់ទុកទណ្ឌកម្មពីលោកខាងលិចលើប្រទេសលោក គឺជាទណ្ឌកម្មដែលខុសច្បាប់ព្រោះគ្មានប្រទេសណាលើលោកនេះត្រូវទទួលទណ្ឌកម្មដែលមិនមែនជាការសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិឡើយ៕