ព័ត៌មានជាតិ

សម្ដេចតេជោថាការភៀសសឹករបស់ពលរដ្ឋខ្មែរបង្ហាញច្បាស់ពីចរិតឈ្លានពានរបស់ថៃ

បានផុស

២៤ វិនាទី មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

ប្រធានព្រឹទ្ធសភា សម្ដេចតេជោ ហ៊ុន សែន ស្នើឱ្យបរទេសទាំងឡាយដែលប្រកាន់សច្ចធម៌ និងនិយមសន្ដិភាពក្រឡេកមើលពីភាពលំបាករបស់ប្រជាជនកម្ពុជាដែលរងគ្រោះពីសំណាក់ការឈ្លានពានរបស់ថៃ និងបានភៀសសឹកមកកាន់មណ្ឌលសុវត្ថិភាពបណ្ដោះអាសន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងពីមណ្ឌលសុវត្ថិភាពបណ្ដោះអាសន្ន វត្តពោធិ៍៥ពាន់ដើម នៅខេត្តព្រះវិហារ ល្ងាចថ្ងៃទី២៦ ខែមិថុនានេះ សម្ដេចតេជោ ហ៊ុន សែន បានរលឹកដល់អតីតកាលនៃសង្គ្រាមកម្ពុជាដែលបានវិលត្រលប់មកវិញតាមរយៈការឈ្លានពានរបស់ប្រទេសថៃ ដែលធ្វើឱ្យមានពលរដ្ឋខ្មែរភៀសសឹករាប់ពាន់នាក់។

សម្ដេចថា៖ «នេះហើយជាទង្វើ និងសុំឱ្យអន្តរជាតិត្រូវមើលឱ្យឃើញថាតើប្រទេសកម្ពុជា ឬថៃអ្នកណាឈ្លានពានអ្នកណា? តើថៃមានបានជម្លៀសប្រជាជនរបស់ខ្លួនចេញពីព្រំដែនទេ តើថៃមានជនភៀសសឹកដោយកម្ពុជាឈ្លានពានទេ? នៅទីនេះគឺជាសាក្សីរស់សម្រាប់បង្ហាញទៅកាន់ពិភពលោកថាកម្ពុជាគឺប្រទេសរងគ្រោះដោយសារការឈ្លានពានពីកងទ័ពថៃទើបមានជនភៀសសឹកមកនៅទីនេះ»។

គួរឱ្យដឹងថាបន្ទាប់ពីថៃឆ្មក់ចូលមកបាញ់សម្លាប់ទាហានខ្មែរម្នាក់នៅព្រំដែនមុំបីស្រុកជាំក្សាន្តព្រះវិហារ ធ្វើឱ្យពលរដ្ឋខ្មែរដែលរស់នៅជិតព្រំដែនថៃជាបន្តបន្ទាប់បានភៀសខ្លួនដោយខ្លួនឯងមកកាន់មណ្ឌលសុវត្ថិភាពបណ្ដោះអាសន្ន វត្តពោធិ៍៥ពាន់ដើម នៅក្នុងស្រុកគូលែន ខេត្តព្រះវិហារ។ មកដល់ពេលនេះមានពលរដ្ឋជម្លៀសខ្លួនមកចំនួនជិត ១ ៣០០គ្រួសារ ស្មើនឹងចំនួនមនុស្សជិត ៤ពាន់នាក់៕