កីឡា

គ្រូក្មេង សៀងហៃ សំពះលាម្ដាយទៅបារាំងដូចលាជាលើកចុងក្រោយ ខណៈបច្ចុប្បន្នម្ដាយបានមរណៈភាពហើយ

បានផុស

១២ ខែ មុន

នៅ

ថ្ងៃអង្គារ ៨ កក្កដា ២០២៥

ដោយ

គ្រូក្មេង សៀងហៃ ថាការសំពះលាម្ដាយមកធ្វើការនៅឯប្រទេសបារាំងកាលពី ៦ឆ្នាំមុននេះដូចជាការលាជាលើកចុងក្រោយសម្រាប់រូបគេ ព្រោះបច្ចុប្បន្នអ្នកមានគុណរបស់ខ្លួនបានទទួលមរណៈភាពទៅហើយកាលពីឆ្នាំ២០២៣ កន្លងទៅនេះ។

គ្រូក្មេង សៀងហៃ

លោក ធីម សៀងហៃ ហៅគ្រូក្មេង បានឲ្យដឹងថា រូបគេចាក់ចេញពីប្រទេសកម្ពុជាអំឡុងឆ្នាំ២០១៩ រហូតមកដល់ពេលនេះជាង ៦ឆ្នាំមកហើយមិនទាន់មានឱកាសទៅវិញស្រុកខ្មែរវិញនោះទេ។ អ្វីដែលចងចាំមិនភ្លេចនោះការសំពះលាម្ដាយមកកាន់ប្រទេសបារាំងដូចជាការលាគ្នាលើកចុងក្រោយអីចឹងដែរ។ ព្រោះតែចាប់ពីពេលនោះមករូបគេមិនដែលបានជួបម្ដាយទៀតឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រូក្មេង សៀងហៃ

មុនពេលម្ដាយទទួលមរណៈភាពនេះគឺតែងតែទូរសព្ធហៅខ្លួនឲ្យវិលត្រឡប់មកកម្ពុជាវិញជានិច្ច ព្រោះតែការបារម្ភពីការរស់នៅផង និងការឃ្លាតឆ្ងាយពីឪពុកម្ដាយមិនមានភាពកក់ក្ដៅផង។ មួយវិញទៀតដោយសារខ្លួនមានមាឌតូច អាយុនៅតិច ដូច្នេះហើយម្ដាយរបស់ សៀងហៃ តែងតែបារម្ភ និងចង់ឲ្យកូនវិលត្រឡប់មកខ្មែរវិញបើជួបការលំបាកដែលមិនអាចទ្រាំបាន។

គ្រូក្មេង សៀងហៃ និងឪពុកម្ដាយ

នឹកដល់រឿងនេះគ្រូក្មេងហាក់មិនសប្បាយចិត្តនោះឡើយ ព្រោះតែនឹករម្លឹកដល់សម្ដីម្ដាយដែលចង់ឲ្យកូនវិលត្រឡប់មកខ្មែរវិញ។ ប្រសិនបើរូបគេសម្រេចវិលត្រឡប់មកខ្មែរវិញពេលនោះអាចជាឱកាសបានជួបមុខម្ដាយជាលើកចុងក្រោយមុនលាគ្នាជារៀងរហូតបែបនេះ។

គ្រូក្មេង និងម្ដាយ

ដោយសារតែចិត្តស្រឡាញ់ សៀងហៃ បានត្រឹមសុំម្ដាយម្ដងហើយម្ដងទៀតដើម្បីបន្តខំប្រឹងបង្ហាត់សិស្ស និងផ្សព្វផ្សាយគុនខ្មែរនៅឯប្រទេសបារាំងឲ្យមានភាពល្បីល្បាញ និងមានអ្នកស្គាល់។ ជាចុងក្រោយការតស៊ូនៅទីនោះ និងការពន្យាពេលម្ដងហើយម្ដងទៀតនេះ បានធ្វើឲ្យរូបគេមិនបានជួបមុខម្ដាយជាលើកចុងក្រោយដោយសារអ្នកមានគុណរបស់ខ្លួនមានជំងឺ និងបានចែកឋាន។ នឹកដល់ចំណុចនេះ សៀងហៃ ហាក់ស្ដាយក្រោយពិសេសនោះឱកាសចុងក្រោយដែលបានជួបមុខម្ដាយក៏មិនបានទៅទៀត។

ឪពុក ម្ដាយ គ្រូក្មេង

ដោយសារតែការស្រឡាញ់គុនខ្មែរចេញពីចិត្ត តស៊ូចង់បង្ហាត់ផ្សព្វផ្សាយផង និងដើម្បីជីវភាពរស់នៅផងទើបធ្វើឲ្យរូបគេចេះពន្យាពេលរស់នៅឯប្រទេសបារាំងនេះ។

បញ្ជាក់ដែរថា លោក ធីម សៀងហៃ ហៅគ្រូក្មេង បច្ចុប្បន្ននេះកំពុងបង្ហាត់គុនខ្មែរនៅក្លឹបឯកជនមួយឯទីក្រុងបុកឌូ ប្រទេសបារាំង។ រូបគេបានចាកចេញ និងទៅធ្វើការនៅទីនោះតែម្នាក់ឯងតាំងពីឆ្នាំ២០១៩ រហូតដល់សព្វថ្ងៃនេះ។ ចំណែកម្ដាយរបស់ សៀងហៃ បានទទួលមរណៈភាពអំឡុងឆ្នាំ២០២៣៕