ថៃ រកឃើញមនុស្សស្លាប់ច្រើនឡើងៗ ក្នុងគ្រោះបំណាក់ដីនៅ ឈៀងម៉ៃ

ប្រទេសថៃ បានរកឃើញមនុស្សស្លាប់កាន់តែច្រើនពីគ្រោះបំណាក់ដី ដែលវាយប្រហារខេត្ត ឈៀងម៉ៃ កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Khaosod នៅថ្ងៃសុក្រទី២៩ខែសីហាឆ្នាំ២០២៥, សាក​សព២នាក់ទៀតត្រូវបានរកឃើញ ធ្វើឲ្យតួលេខមនុស្សស្លាប់ក្នុងហេតុការណ៍នេះ កើនដល់៦នាក់ហើយ។

ក្រៅពីមនុស្សស្លាប់ នៅមាន៣នាក់ទៀតកំពុងបាត់ខ្លួន ខណៈ១៥នាក់រងរបួស ចំណែកផ្ទះសម្បែង១៥៧ខ្នងត្រូវខូចខាត។

សូមជម្រាបជាថ្មី គ្រោះធម្មជាតិបាក់ដីដ៏រន្ធត់នេះ កើតឡើងនាវេលាម៉ោង២:៥០នាទីរំលងអធ្រាត្រឈានចូលថ្ងៃពុធទី២៧ខែសីហាឆ្នាំ២០២៥ ក្នុងភូមិ Pang Ung ឃុំ Mae Suek ស្រុក Mae Chaem។

វាគឺបណ្តាលមកពីឥទ្ធិពលនៃព្យុះ Kajiki ដែលបង្កឲ្យមានភ្លៀងធ្លាក់ខ្លាំង បាក់ដីភ្នំសង្កត់លើផ្ទះពលរដ្ឋ បំផ្លិចបំផ្លាញយានយន្ត សំណង់ហេដ្ឋារចនាសម្ព័ន្ធនានា។

នៅថ្ងៃព្រហស្បតិ៍ នាយកដ្ឋានធនធានរ៉ែ បានចេញការព្រមានថ្មីឲ្យខេត្តចំនួន២៨ ត្រូវប្រយ័ត្នបំផុតចំពោះគ្រោះបំណាក់ដីនិងទឹកជំនន់ធ្ងន់ធ្ងរ ជាបន្តទៀត ខណៈឥទ្ធិពលរបស់ព្យុះ Kajiki នៅតែជះខ្លាំងលើប្រទេសថៃ។

ក្នុងចំណោមខេត្តទាំង២៨នេះ គឺភាគច្រើនជាខេត្តស្ថិតនៅប៉ែកខាងជើងប្រទេស​ ជាពិសេស Mae Hong Son, Chiang Mai និង Chiang Rai៕

អត្ថបទ៖ សុខ សុវណ្ណ

ចុចអាន៖ ថៃ នឹងជួបព្យុះថ្មីមួយទៀត ខណៈព្យុះចាស់កំពុងបង្កការខូចខាតធ្ងន់ធ្ងរ