កីឡា

ព្រឿង សុជាតិ ឆ្លៀតមកមើលម្ដាយកំពុងឈឺក្រោយស្ថានការណ៍ព្រំដែនធូរស្រាលបន្តិច

បានផុស

១០ ខែ មុន

នៅ

ថ្ងៃអង្គារ ៩ កញ្ញា ២០២៥

ដោយ

អតីតអ្នកប្រដាល់គុនខ្មែរ ព្រឿង សុជាតិ បន្ទាប់ពីឈរជើងនៅព្រំដែនខេត្តឧត្តរមានជ័យទប់ទល់ជាមួយការឈ្លានពានរបស់សៀមអស់ជាច្រើនសប្ដាហ៍កន្លងទៅនេះ ឥលូវឆ្លៀតពេលមកមើលម្ដាយកំពុងឈឺនៅឯខេត្តត្បូងឃ្មុំក្រោយស្ថានការណ៍ធូរស្រាលបន្តិច។

សុជាតិ ពេលមកដល់ផ្ទះ

ព្រឿង សុជាតិ បានឲ្យដឹងថា ម្ដាយរបស់ខ្លួនកំពុងឈឺជំងឺលើសឈាម និងត្រូវបញ្ចូនមកពេទ្យដើម្បីសម្រាកព្យាបាលនៅឯខេត្តកំពង់ចាម។ ស្ថានភាពជំងឺនៅមិនទាន់ធូរស្រាលនៅឡើយទេ ពោលគ្រូពេទ្យកំពុងតាមដានជំងឺនៅពេលនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឪពុកម្ដាយ ព្រឿង សុជាតិ

សិស្សគុនក្លឹបលោក សេន ប៊ុនថេន លើកឡើងទៀតថា ក្រុមគ្រួសាររបស់ខ្លួនជាអ្នកធ្វើចំការ និងឪពុកម្ដាយមានជីវភាពក្រលំបាកបានចំណូលតែពីការងារនេះ និងការឧបត្ថម្ភខ្លះៗពីកូនប៉ុណ្ណោះ។ ដោយមួយរយៈពេលនេះមានបញ្ហាព្រំដែនត្រូវទៅឈរជើងច្បាំងជាមួយសៀមផងនោះទើបធ្វើឲ្យខ្លួនមិនមានពេលមកមើលថែ ឬជូនថវិកាដល់ឪពុកម្ដាយនោះឡើយ។ ពេលនេះស្ថានការណ៍ធូរស្រាលបន្តិច ដូច្នេះទើបរូបគេឆ្លៀតមកមើលម្ដាយដែលកំពុងឈឺសម្រាកព្យាបាល។

ព្រឿង សុជាតិ ពេលនៅបន្ទាយ

អតីតអ្នកប្រដាល់រូបគេក៏បានលើកពីទុក្ខកង្វល់របស់ខ្លួនដែរថា ឥលូវនេះកំពុងខ្វះខាតខ្លាំង ពោលខ្លួនឯងឈឺផង និងមួយទៀតម្ដាយក៏ត្រូវសម្រាកព្យាបាលជំងឺទៀត។ ដូច្នេះកំពុងជួបទុក្ខលំបាកមិនសូវមានថវិកាសម្រាប់ដោះស្រាយបញ្ហានេះឡើយ។

ព្រឿង សុជាតិ ពេលមើលម្ដាយ

សុជាតិ ប្រាប់ទៀតថា ខ្លួននឹងវិលត្រឡប់ទៅបន្ទាយនៅឯខេត្តឧត្តរមានជ័យវិញឆាប់ៗនេះ ព្រោះមិនអាចនៅបានយូរនោះឡើយ។ បញ្ជាក់ដែរថា ព្រឿង សុជាតិ ជាអតីតអ្នកប្រដាល់គុនខ្មែរដោយសារតែរវល់ក៏អាក់ខានឡើងប្រកួតមួយរយៈពេលធំ។ រូបគេជាទាហាននៅកងពលតូចលេខ៦ ចំណុះឲ្យកងពលធំអន្តរាគមន៍លេខ២ ខេត្តឧត្តរមានជ័យ។ នេះលេខទំនាក់ទំនង និងតេឡេក្រាមរបស់ ព្រឿង សុជាតិ 087 210 991៕

អត្ថបទដោយ៖ នួន ស៊ីណា

Related Topics:កីឡាប្រដាល់គុនខ្មែរ