ព័ត៌មានអន្ដរជាតិ

ថៃ៖ មាតុភូមិនិវត្តន៍របស់ពលករចំណាកស្រុកខ្មែរ នឹងប៉ះពាល់ដល់វិស័យសំណង់ និងផ្លែឈើថៃ

បានផុស

១០ ខែ មុន

នៅ

ថ្ងៃចន្ទ ១៦ មិថុនា ២០២៥

ដោយ

សភាពាណិជ្ជកម្មថៃ និងភាគីពាក់ព័ន្ធផ្សេងៗ បានព្រមានថា ការធ្វើមាតុភូមិនិវត្តន៍របស់ពលកររបស់កម្ពុជា អាចនឹងប៉ះពាល់ដល់វិស័យសំណង់ និងផ្លែឈើ ហើយជំរុញឱ្យមានដំណោះស្រាយឱ្យបានឆាប់ ដើម្បីបញ្ចៀសការខាតបង់សេដ្ឋកិច្ចកាន់ធំ។ នេះបើតាមការចុះផ្សាយរបស់កាសែត The Nation ថ្ងៃចន្ទ ១៦ មិថុនា នេះ។

ការសម្ដែងក្ដីបារម្ភនេះ ធ្វើឡើងក្រោយរាជរដ្ឋាភិបាលកម្ពុជាជំរុញការអំពាវនាវឱ្យពលករចំណាកស្រុកខ្មែរវិលត្រឡប់ចូលមាតុភូមិវិញ មុនពេលអាជ្ញាធរថៃបណ្ដេញចេញ និងប្រមាថ ដោយរំពឹងថា ភាពតានតឹងកម្ពុជា-ថៃ និងបន្តអូសបន្លាយ។ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានប្រកាសត្រៀមខ្លួនពីការទទួលពលករខ្មែរមកវិញ រួមទាំងការសម្របសម្រួលការធ្វើដំណើរពីព្រំដែន និងឯកសារបញ្ជាក់អត្តសញ្ញាណ ការស្វែងរកឱកាសការងារ និងដំណោះស្រាយសេដ្ឋកិច្ចសម្រាប់ពលករផ្សេងៗ។

ខណៈមានក្ដីព្រួយបារម្ភពីការធ្វើមាតុភូមិនិវត្តន៍របស់ពលករខ្មែរ នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត្រ បានថ្លែងថា ថៃគ្មានគម្រោងចាប់បញ្ចូលពលករបរទេសទៅស្រុកកំណើតរបស់ពួកគេវិញនោះទេ។

បើតាមក្រសួងការងារថៃ បច្ចុប្បន្នមានពលករខ្មែរប្រមាណ ៥០ ម៉ឺននាក់ ដែលកំពុងធ្វើការនៅប្រទេសថៃ និងត្រូវបានបែងចែកជា ៤ ក្រុម ដែលរួមមាន ពលករក្រោមការអនុញ្ញាតរបស់គណៈរដ្ឋមន្រ្តី ក្រុមពលករគ្មានឯកសារ ពលករឆ្លងដែនតាមរដូវកាល និងពលករក្រោមក្របខណ្ឌអនុស្សរណៈនៃការយោគយល់គ្នា (MOU) ថៃ-កម្ពុជា។

ប្រភពពីសភាពាណិជ្ជកម្មថៃ បានឲ្យដឹងថា ភាពតានតឹងរវាងថៃ និងកម្ពុជា បានបង្កក្តីបារម្ភយ៉ាងខ្លាំងក្នុងវិស័យឯកជន។ ធុរកិច្ចថៃ កំពុងជំរុញឱ្យរដ្ឋាភិបាលទាំង ២ ដោះស្រាយជម្លោះឱ្យបានឆាប់រហ័សតាមរយៈការសន្ទនាការទូត ដោយព្រមានថា ភាពមិនច្បាស់លាស់ដែលអូសបន្លាយ នឹងធ្វើឱ្យប៉ះពាល់ដល់ប្រទេសទាំង២ ដែលពឹងផ្អែកខ្លាំងលើគ្នាទៅវិញទៅមកសម្រាប់ពាណិជ្ជកម្ម និងការវិនិយោគ។ នេះបើតាមការសរសេររបស់ The Nation។

ប្រភពបានបន្ថែមថា ការអំពាវនាវរបស់កម្ពុជាឱ្យត្រឡប់មកស្រុកកំណើតវិញ អាចប៉ះពាល់ដល់វិស័យសំណង់នៅប្រទេសថៃ ដែលមានពលករខ្មែរច្រើនគួរឱ្យកត់សម្គាល់។ ទោះជាយ៉ាងណាក៏ដោយ កង្វះខាតនេះ អាចនឹងត្រូវបានប៉ះប៉ូវដោយកម្មករមកពីប្រទេសជិតខាងផ្សេងទៀត។ យ៉ាងណាមិញ ការខាតបង់ពីការធ្វើមាតុភូមិនិវត្តន៍របស់ពលករខ្មែរ អាចនៅតែធ្ងន់ធ្ងរ។

ចំណែកឯប្រធានសភាពាណិជ្ជកម្មថៃ ប្រចាំខេត្ត ច័ន្ទបុរី លោក Ukris Wongthongsalee វិញ ក៏បានសម្តែងការព្រួយបារម្ភផងដែរ ដោយកត់សម្គាល់ថា កម្មករកម្ពុជាដើរតួនាទីយ៉ាងសំខាន់ក្នុងវិស័យកសិកម្មរបស់ខេត្ត ជាពិសេសការប្រមូលផលផ្លែឈើ ការតម្រៀប និងការវេចខ្ចប់។ កម្លាំងពលកម្មកម្ពុជា រួមចំណែកជាង ៨០ ភាគរយ នៃកម្លាំងពលកម្មផ្នែកកសិកម្មក្នុងខេត្ត។

លោកបន្តថា៖ «ការបិទច្រកព្រំដែន មិនគ្រាន់តែប៉ះពាល់ដល់តួលេខពាណិជ្ជកម្មប៉ុណ្ណោះទេ វាប៉ះពាល់ផ្ទាល់ដល់កម្លាំងពលកម្មកម្ពុជា ដែលធ្វើការក្នុងរោងចក្រកែច្នៃផ្លែឈើរបស់ខេត្តច័ន្ទបុរី»៕