Connect with us

ជីវិតកម្សាន្ដ

ប្រវត្តិត្រួសៗរបស់តារាកំប្លែងជំនាន់ដើមលោកតា ព្រួញ មាស

បានផុស

នៅ

តារាកំប្លែងជំនាន់ដើមលោកតា ព្រួញ មាស ដែលគេចាត់ទុកថា ជាផ្កាយកំប្លែងមួយរូបដែលមាន​ទេពកោសល្យដ៏ប៉ិនប្រសប់​ ក្នុងចំណោមផ្កាយកំប្លែងដទៃ។ តារាកំប្លែង​រូប​នេះ មាន​កាយវិការ​រស់រវើក សម្ដីសំដៅ​ពីរោះ មុខ​ក៏​ស្រស់ កម្ពស់​ក៏​ខ្ពស់ ប៉ុន្តែ​មាន​រាង​ស្គមកំព្រឹង។ ក្នុង​ចំណោម​ផ្កាយ​កំប្លែង​ល្បីៗ ផ្កាយ​កំប្លែង ព្រួញ មាស ក៏​មាន​ឈ្មោះ​បោះ​សំឡេង​មិនធម្មតា​ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម «ក្រុម​ព្រះសុរិយា» ដែល​បាន​ខិតខំ​ស្រាវជ្រាវ​ជាច្រើន​ឆ្នាំ​មក​យ៉ាង​លំបាក​បាន​ឲ្យ​ដឹង​ថា ផ្កាយ​កំប្លែង ព្រួញ មាស មាន​រហស្សនាម​ថា «សត្វ​ត្រចៀកកាំ​អភ័ព្វ»។ ព្រួញ មាស ឬ សត្វ​ត្រចៀកកាំ​អភ័ព្វ មាន​ឈ្មោះ​ដើម​ថា «កែវ នាង» កើត​នៅ​ឆ្នាំ ១៩៣៨ នា​ភូមិ​បវេល ស្រុក​បវេល ខេត្ត​បាត់ដំបង។ លោក​កើត​ក្នុង​ត្រកូល​គ្រួសារ​ក្រីក្រ ដែល​មាន​ឪពុក​ឈ្មោះ កែវ ញូង ជា​កម្មករ​សាធារណការ និង​ម្ដាយ​ឈ្មោះ នាង លឹម ជា​កសិករ។ ផ្កាយ​កំប្លែង ព្រួញ មាស មាន​បងប្អូន​បង្កើត​ចំនួន​ពីរ​នាក់ គឺ មាន​ប្អូនស្រី​នាម កែវ ងារ។

សត្វ​ត្រចៀកកាំ​អភ័ព្វ មាន​ជីវិត​ក្នុង​កុមារភាព និង​យុវវ័យ ពោរពេញ​ដោយ​រឿងរ៉ាវ​កម្សត់​ជា​ច្រើន​បាន​កើត​ឡើង​ជា​បន្តបន្ទាប់ ដោយ​នៅ​អាយុ ៧ ឆ្នាំ ម្ដាយ​របស់​លោក​បាន​លា​ចាកលោក​ទៅ​ដោយ​ជំងឺ។ លុះ​អាយុ ១១ ឆ្នាំ ឪពុក​របស់​លោក ក៏​ទទួលមរណភាព​ទៀត។ លោក ព្រួញ មាស ត្រូវ​ទៅ​រស់នៅ​ជាមួយ​លោកយាយ និង​ព្រះសង្ឃ ជ្រក​ក្រោម​ដំបូល​វត្ត​ដំរី​ស។

លោក កែវ នាង ឬ ព្រួញ មាស ជា​មនុស្ស​តស៊ូ​ណាស់។ ត្បិត​មាន​ជីវិត​ជា​ក្មេង​វត្ត​ឆ្អែត​មួយ​ពោះ រស់​មួយ​ពេល តែ​លោក​តស៊ូ​គ្រាន់​បាន​រៀន​សូត្រ​បន្តិចបន្តួច​ពី​ព្រះសង្ឃ ដើម្បី​ជា​ត្រួយ​ជីវិត។

ផ្កាយ​កំប្លែង ព្រួញ មាស បើ​ទោះបី​រៀន​គ្មាន​សញ្ញាប័ត្រ​ក៏​ពិតមែន តែ​ការ​សិក្សា​រៀន​សូត្រ គ្រាន់​នឹង​អាច​ចេះ​អាន​អក្សរ​ខ្មែរ និង​បារាំង​បាន។ ផ្កាយ​កំប្លែង​រូប​នេះ ព្យាយាម​រៀន​អាន​សាត្រា អាន​កាសែត រហូត​មាន​ចំណេះដឹង និង​មាន​ប្រាជ្ញា​ខ្លះៗ ដើម្បី​ផ្សំ​ជាមួយ​វោហារ​សព្ទ​ពី​ធម្មជាតិ​របស់​លោក​ឲ្យ​មហាជន​ស្រលាញ់ និង​ចូលចិត្ត។

នៅ​ឆ្នាំ ១៩៥៦ ចម្រើន​វ័យ​កំលោះ ១៨ ឆ្នាំ ដោយ​មាន​និស្ស័យ​កំណើត​ខាង​កំប្លែង និង​រូបសម្បត្តិ​របស់​លោក​ផង​នោះ មិត្ត និង​ព្រះសង្ឃ បាន​នាំ​លោក ព្រួញ មាស ឲ្យ​ចូល​ទៅ​ក្នុង​វង្ស​ល្ខោន​បាក់​ស្រេង ប្រចាំ​ខេត្ត​បាត់ដំបង។

ផ្កាយ​កំប្លែង ព្រួញ មាស បាន​ហាត់រៀន​បន្ថែម​ពី​រៀមច្បង​ក្នុង​វង្ស​ល្ខោន​នោះ។ លោក ព្រួញ មាស បាន​ព្យាយាម​អភិវឌ្ឍន៍​ខ្លួន​រហូត​ក្លាយ​ជា​តួ​ត្លុក​ដ៏​សំខាន់​មួយ​រូប។

ដើម​ឆ្នាំ ១៩៦០ ផ្កាយ​កំប្លែង​មុខ​ស្រស់ កម្ពស់​ខ្ពស់ ត្រូវ​គេ​ហៅ​ឲ្យ​មក​រស់នៅ​ក្នុង​រាជធានី​ភ្នំពេញ​វិញ ដោយ​ជ្រក​ក្រោម​ក្រុម​ល្ខោនបាសាក់ ន​លក្ខណ៍​សុខុម របស់​ព្រះ​ម្នាង​ន​លក្ខណ៍​យិន​តា នៅ​ម្ដុំ​ផ្សារ​ស៊ីលិប។ វង្ស​ល្ខោន​ដ៏​ល្បីល្បាញ​មួយ​នេះ បាន​នាំ​លោក​ឲ្យ​ស្គាល់​គ្រប់​ខេត្ត​នៅ​ជុំវិញ​ប្រទេស​កម្ពុជា ហើយ​ក៏បាន​បង្ហាញ​វត្តមាន​របស់​លោក​នៅ​ឆាក​កំប្លែង​ជា​តួ​ត្លុក​ទៀត​ផង។

នាម​សិល្បៈ​ថា «ព្រួញ មាស» ក៏បាន​កើតឡើង​នា​ពេល​នោះ​ដែរ គឺ​កើតឡើង​ពេល​លោក​ធ្វើដំណើរ​ទៅ​សម្ដែង​ល្ខោនបាសាក់​នៅ​ខេត្ត​កំពង់ចាម ដោយ​មាន​បុរស​ម្នាក់​ឈ្មោះ វ៉ា​គី ជា​មន្ត្រី​ស័ក្ដិ ៣ ប៉េអិម បាន​មក​មើល​ការ​សម្ដែង​ល្ខោនបាសាក់ ហើយ​ក៏​ឃើញ​លោក មាន​និស្ស័យ​នឹង​គ្នា ក៏​សុំ​លោក ធ្វើជា​ប្អូនធម៌​តែម្ដង។

នៅ​ល្ងាច​មួយ បងធម៌​របស់​លោក ព្រួញ មាស បាន​នាំ​លោក​ទៅ​ទទួលទាន​អាហារ​នៅ​មាត់​ទន្លេបិទ ពេលនោះ​ស្រាប់តែ​ឃើញ​កាណូត​មួយ​យ៉ាង​លឿន​ដែល​មាន​ឈ្មោះថា «ព្រួញ​មាស» បាន​បរ​លើ​ផ្ទៃ​ទន្លេបិទ។ ជាមួយ​នោះ ស្រាប់តែ​បងធម៌​របស់​លោក​និយាយ​ថា «អានាង កាយវិការ​ហែង រហ័សរហួន រស់រវើក ដូច​អា​កាណូត​ព្រួញ​មាស អញ្ចឹង»។ តាំងពី​ពេល​នោះ​មក បងធម៌​របស់​លោក ហៅ​លោក​ថា «ព្រួញ​មាស ព្រួញ​មាស» រហូត​ឈ្មោះ​នេះ​បាន​ល្បី​ពេញ​វង្ស​ល្ខោន​បាសាក់ ហើយ​គេ​គ្រប់​គ្នា​ក៏​ហៅ​លោក​ថា «ព្រួញ​មាស» រហូត​តែម្ដង។

នៅ​ឆ្នាំ ១៩៦១ កេរ្តិ៍ឈ្មោះ​របស់​លោក ចាប់ផ្ដើម​មាន​បន្តិច​ម្តងៗ។ ផ្កាយ​កំប្លែង ព្រួញ មាស ត្រូវ​បាន​ផលិតករ​ខ្សែភាពយន្ត​នាំ​លោក​ចូល​សម្ដែង​ជា​លើកដំបូង​បង្អស់ ពេលនោះ​ហើយ​ដែល​លោក​បាន​បម្រើ​វិស័យ​សិល្បៈ​ជា​តួកំប្លែង និង​ជា​តួ​ឪពុក ឬ​ជា​តួ​បន្ទាប់បន្សំ​ដទៃ​ទៀត។

ខ្សែភាពយន្ត​ល្បីៗ​ដែល​លោក កែវ នាង «ព្រួញ មាស» បាន​សម្ដែង​រួមមាន ៖

រឿង​ព្រះ​ល័ក្ខ​សិនវង្ស នាង​ព្រាហ្មណ៍​កេសរ ,រឿង​ពុទ្ធិ​សែន​នា​ងក​ង្រី ,រឿង​សព្វសិទ្ធិ៍ ,រឿង​ព្រះ​វេស្សន្តរ ,រឿង​ក្រៃ​ថោង និង​ក្រពើ​ឆា​រ៉ា​វ៉ាន់ ,រឿង​នាង​ល្វាចេក ,រឿង​នាង​កែវ​ណា​ម៉ា ,រឿង​កាកី ,រឿង​ឆ្នាំ​អូន ១៦ ,រឿង​ចំណងដៃ​ទឹកភ្នែក ,រឿង​ឯណា​ប្រពន្ធ​ខ្ញុំ និង រឿង​ផ្កា​ត្របែក​ព្រៃ​ជាដើម​…។

កំឡុង​ឆ្នាំ ១៩៦២ ក្នុង​ពិធី​សមាជជាតិ លោក ព្រួញ មាស ត្រូវ​បាន​គេ​ជ្រើសរើស​យក​មក​សម្ដែង​នៅ​វាល​មេន​ជាមួយ​នឹង​អ្នក​កំប្លែង​ល្បីៗ​ឯទៀត​ដូចជា លោក ស៊ុយ ,លោក ម៉ុង ដូលី​ន ,លោក ចាន់​ក្តិប ,លោក ឡា​សិន ជុ​យ ,នាង ណូ យ៉ា ,នាង មុត សំអឿន ជាដើម​…។ នៅ​ពេលនោះ ផ្កាយ​កំប្លែង ព្រួញ មាស ក៏បាន​ទទួល​កូនសិស្ស​ជាច្រើន​មក​ហាត់រៀន​ជាមួយ​លោក។ ក្នុង​នោះ កូនសិស្ស​របស់​លោក​ម្នាក់ មាន​ឈ្មោះ​ល្បីល្បាញ​ខ្លាំង​ណាស់ គឺ «លោក ត្រង់ ដឺ»។

ជីវភាព​ធូរធារ​ល្អ​ប្រសើរ​ហើយ នៅ​ឆ្នាំ ១៩៦៣ លោក ព្រួញ មាស ក៏បាន​សម្រេចចិត្ត​រៀប​អាពាហ៍ពិពាហ៍​ជាមួយ​នាង​កញ្ញា វាន់ សុខុម ដែល​លោក​ចិញ្ចឹម​ចិត្ត​ស្រលាញ់​តាំងពី​នៅ​កំពង់ចាម ដោយ​ទទួល​បាន​បុត្រី​មួយ​រូប​ជា​ចំណងដៃ។ ប្រពន្ធ​លោក ព្រួញ មាស ជា​កូនស្រី​អ្នក​កំពង់ចាម។

នៅ​ដើម​ទសវត្ស​ឆ្នាំ ៧០ ជា​អកុសល ភរិយា​របស់​លោក​ក៏បាន​ទទួលមរណភាព​ដោយ​ជំងឺ។ លោក ព្រួញ មាស ក៏បាន​រៀប​មង្គលការ​ជា​លើក​ទី ២ នៅ​ឆ្នាំ ១៩៧២ ជាមួយ​នាង​កញ្ញា បាន មុន្នី ហៅ វាន់ ឌុ​ក ហើយ​មាន​កូន​ប្រុស-ស្រី ដល់​ទៅ ៦ នាក់។

សត្វ​ត្រចៀកកាំ​អភ័ព្វ «ព្រួញ មាស» បាន​ក្លាយ​ជា​ទាសករ នៃ​របប​ប្រល័យ​ពូជសាសន៍​ខ្មែរ​ក្រហម ហើយ​លោក​មាន​សំណាង​រួច​ផុត​ពី​ការ​កាប់សម្លាប់ បន្ត​ជីវិត​សិល្បៈ​របស់​លោក​ទៀត នៅ​ក្រោយ​ថ្ងៃ​ទី ៧ ខែ​មករា ឆ្នាំ ១៩៧៩។

ក្នុង​យុគ​មាស នៃ​ភាពយន្ត​ខ្មែរ មាន​ផ្កាយ​កំប្លែង​ជាច្រើន បាន​រះ​បំភ្លឺ​វិថី​សិល្បៈ ដែល​ញ៉ាំ​ឲ្យ​សង្គម​សិល្បៈ​មាន​រសជាតិ​កាន់តែ​ពិសេស និង​សំបូរ​បែប។

ការ​សម្ដែង​ឈុត​ឆាក​កំប្លែង ឬ ពាក្យ​កំប្លែង​ទាំងឡាយ សុទ្ធ​តែ​មាន​សីលធម៌ សុជីវធម៌ និង​មាន​តម្លៃ​អប់រំ ដែល​ធ្វើ​ឲ្យ​សង្គម​ជាតិ​មួយ​មាន​សេចក្ដីថ្លៃថ្នូរ​ផង​ដែរ៕

អត្ថបទ ៖ ពិសី

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ៩ ម៉ោង មុន

ខេត្តរតនគិរីមានផ្ទៃដីក្រហមប្រមាណ៧០% អំណោយផលដល់ដំណាំកសិ-ឧស្សហកម្មគ្រប់ប្រភេទ

ព័ត៌មានជាតិ១០ ម៉ោង មុន

ក្នុង​ឱកាស​បុណ្យចូលឆ្នាំ​ថ្មី​នេះ រដ្ឋបាល​រាជធានី​ហាម​ដាច់ខាត​ការ​លេង​ល្បែងស៊ីសង ការ​ជះ​ទឹក គប់​ស្បោង​ទឹក លាប​ធ្យូង ឬ​ប៉ាត​ម្សៅ​ទៅលើ​អ្នកដំណើរ

ព័ត៌មានជាតិ១០ ម៉ោង មុន

កម្មករ និងសហជីព ពេញចិត្ត គាំទ្រដំណោះស្រាយទាំងបីចំណុចចំពោះករណីរោងចក្រ R.G

ជីវិតកម្សាន្ដ១៣ ម៉ោង មុន

សុខ ស្រីម៉ុច អំពាវនាវពលរដ្ឋខ្មែរបន្តជួយថែរក្សាមរតកដូនតាខ្មែរ

ព័ត៌មានអន្ដរជាតិ១៤ ម៉ោង មុន

វេទិកាបូអាវ ៖ សេដ្ឋកិច្ច អាស៊ី នឹងលូតលាស់ដល់ ៤.៥ ភាគរយក្នុងឆ្នាំនេះ

ព័ត៌មានជាតិ៥ ថ្ងៃ មុន

អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា

ព័ត៌មានជាតិ៣ ថ្ងៃ មុន

ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ

ព័ត៌មានជាតិ៣ ថ្ងៃ មុន

បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»

ព័ត៌មានជាតិ៤ ថ្ងៃ មុន

កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា

សេដ្ឋកិច្ច៥ ថ្ងៃ មុន

មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ

Sokha Hotels

ព័ត៌មានពេញនិយម