សម្តេចប៉ាប Leo ​បដិសេធថា ការ​ហៅ​ «ជនផ្តាច់ការ» មិនមែនសំដៅលើលោកត្រាំ ទេ

សម្តេចប៉ាប Leo XIV បានបដិសេធ​ការអះអាងមួយ ដែល​ថា លោកកំពុងព្យាយាមប្រកួតប្រជែងឬជជែកដេញដោលជាមួយប្រធានាធិបតីអាមេរិក ដូណាល់ ត្រាំ នៅពេលដែលព្រះអង្គរិះគន់ «ជនផ្តាច់ការ» ចំពោះការចំណាយប្រាក់រាប់ពាន់លានដុល្លារលើសង្គ្រាម នៅក្នុងសុន្ទរកថាមួយកាលពីដើមសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកយកព័ត៌មាននៅលើជើងហោះហើរទៅកាន់ប្រទេសអង់ហ្គោឡាកាលពីថ្ងៃសៅរ៍ សម្តេចប៉ាបមានបន្ទូលថា ការកត់សម្គាល់របស់លោកមិនមានន័យថា ជាការប្រឈមមុខដាក់គ្នានោះទេ ដោយទ្រង់ក៏បានរិះគន់ប្រព័ន្ធផ្សព្វផ្សាយចំពោះការបំប៉ោងជម្លោះតាមរយៈការអត្ថាធិប្បាយ និងការស្មានហួសហេតុ។ នេះបើយោងតាមទីភ្នាក់ងារ RT ។

សម្តេចប៉ាបបានមានប្រសាសន៍ថា «មានរឿងរ៉ាវជាក់លាក់មួយដែលមិនត្រឹមត្រូវ ត្រូវបានបង្កើតឡើងនៅក្នុងគ្រប់ទិដ្ឋភាពទាំងអស់របស់វា ភាគច្រើននៃអ្វីដែលត្រូវបានសរសេរគឺជាការអត្ថាធិប្បាយបន្ថែមទៀតលើការអត្ថាធិប្បាយមួយទៀត ដោយព្យាយាមបកស្រាយអ្វីដែលត្រូវបាននិយាយ»។

សម្តេចប៉ាប បានសង្កត់ធ្ងន់ថា «ការកត់សម្គាល់របស់លោកនៅប្រទេសកាមេរូនកាលពីដើមសប្តាហ៍នេះ ដោយរិះគន់មេដឹកនាំដែលចំណាយប្រាក់រាប់ពាន់លានលើសង្គ្រាម និងពណ៌នាពិភពលោកថា ត្រូវបានបំផ្លាញដោយជនផ្តាច់ការមួយក្តាប់តូច មិនមែនសំដៅទៅលើលោកត្រាំទេ។ ​យ៉ាងណាក៏ដោយ ដូចដែលវាកើតឡើង វាត្រូវបានគេមើលឃើញថាដូចជាខ្ញុំកំពុងព្យាយាមជជែកវែកញែកជាមួយប្រធានាធិបតី ដែលមិនមែនជាចំណាប់អារម្មណ៍របស់ខ្ញុំទាល់តែសោះ»។

សម្តេចប៉ាបបានរិះគន់គោលនយោបាយរបស់លោកត្រាំ រួមទាំងការនិរទេសប្រជាជនយ៉ាងច្រើន និងការពិពណ៌នារបស់លោកអំពីអឺរ៉ុបថា «កំពុងរលួយ» ទោះបីជាសង្គ្រាមនៅមជ្ឈិមបូព៌ាបានបង្កើនភាពតានតឹងរវាងពួកគេក៏ដោយ។ លោកបានអំពាវនាវដល់គ្រប់ភាគីទាំងអស់ឲ្យ «បញ្ឈប់អំពើហិង្សាជាបន្តបន្ទាប់» ហើយបានពិពណ៌នាអំពីការគំរាមកំហែងរបស់លោកត្រាំ ក្នុងការបំផ្លាញអរិយធម៌អ៊ីរ៉ង់ថា «មិនអាចទទួលយកបាន»។

ក្រោយមក នៅក្នុងការបង្ហោះប្រព័ន្ធផ្សព្វផ្សាយសង្គមដ៏វែងមួយ លោកត្រាំបានពណ៌នាសម្តេចប៉ាបថា «ខ្សោយលើឧក្រិដ្ឋកម្ម និងអាក្រក់សម្រាប់គោលនយោបាយការបរទេស» ហើយលោកត្រាំបានប្រកាសថា លោកមិនចង់បាន «សម្តេចប៉ាបដែលរិះគន់ប្រធានាធិបតីសហរដ្ឋអាមេរិក» ទេ៕

អត្ថបទ៖ សាង ស្រីល័ក្ខ