ព្រះអើយ! ស្រ្តីពពោះម្នាក់ គ្រូពេទ្យពិនិត្យឃើញកូនក្នុងផ្ទៃត្រឹម៧នាក់ តែពេលសម្រាលបានរហូតដល់ទៅ ៩នាក់ឯណោះ

វាជារឿងដ៏អស្ចារ្យបំផុត ដែលស្ត្រីជនជាតិម៉ាលីវ័យក្មេងម្នាក់ បានផ្តល់កំណើតដល់ទារកចំនួន៩នាក់ដោយសុវត្ថិភាព នៅឯមន្ទីរពេទ្យមួយក្នុងប្រទេសម៉ារ៉ុក កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាង Halima Cisse អាយុ២៥ឆ្នាំមកពីប្រទេសអាហ្វ្រិកខាងលិចមួយនេះ ត្រូវបានកត់ត្រាក្នុងសៀវភៅប្រវត្តិសាស្រ្តថាជា ស្រ្តីសម្រាកកូនបាន៩នាក់ឬគេហៅថា “Nonuplets”។ 

យោងតាមសេចក្តីប្រកាសពីក្រសួងសុខាភិបាលម៉ាលីបានឲ្យដឹងថា នាងសម្រាលបានកូនស្រីចំនួន៥នាក់និងប្រុស៤នាក់ ហើយកូនរបស់នាងសុទ្ធតែមានសុខភាពល្អ។

យោងតាមការវាយតម្លៃរបស់វេជ្ជបណ្ឌិតទាំងនៅក្នុងប្រទេសម៉ាលីនិងម៉ារ៉ុក បានឲ្យដឹងថា ដំបូង Cisse ត្រូវបានគេរំពឹងថា នឹងផ្តល់កំណើតដល់កូនត្រឹម៧នាក់ប៉ុណ្ណោះ ប៉ុន្តែនៅពេលការវះកាត់ ក្រុមគ្រូពេទ្យស្រាប់តែបានឃើញទារករហូតដល់ទៅ៩នាក់ឯណោះ។

បន្ទាប់ពីសម្រាកព្យាបាលរយៈពេល២សប្តាហ៍នៅឯមន្ទីរពេទ្យក្នុងរដ្ឋធានី Bamako នៃប្រទេសម៉ាលី ក្រុមវេជ្ជបណ្ឌិតបានស្នើសុំឲ្យមានការព្យាបាលពិសេសចំពោះករណីដ៏កម្ររបស់ Cisse។

យោងតាមសេចក្តីណែនាំរបស់លោក Bah Ndaw ដែលជាប្រធានាធិបតីបណ្តោះអាសន្ននៃរដ្ឋាភិបាលអន្តរកាលរបស់ប្រទេសម៉ាលី, អាជ្ញាធរបានបញ្ជូន Cisse តាមយន្តហោះទៅកាន់ប្រទេសម៉ារ៉ុក សម្រាប់ការព្យាបាលកាលពីថ្ងៃទី៣០ខែមីនា។

គួរបញ្ជាក់ថា ករណីសម្រាកកូនបាន៩នាក់ក្នុងពេលតែមួយ គឺកម្រមានណាស់ហើយពេលខ្លះ ទារកទើបនឹងកើតមិនអាចរស់រានមានជីវិតបានទេ៕

ប្រែសម្រួលដោយ៖ Vann Vann

ប្រភព៖ Anadolu

ចុចអាន៖ អ្នក​គាំទ្រថា​ តារា​ស្រី​៣​រូប​ជា​កូនភ្លោះ​