ជារឿងចម្លែក បុរសចិនវ័យ ៦៤ ឆ្នាំ ធ្លាក់ច្រាសដុសធ្មេញចូលក្នុងពោះវៀន អស់រយៈពេល ៥២ ឆ្នាំ

បុរសជនជាតិចិនវ័យ ៦៤ ឆ្នាំម្នាក់ បានសម្រេចចិត្តទៅជួបគ្រូពេទ្យដោយសារតែមានអារម្មណ៍ចម្លែកៗនៅក្នុងពោះអស់ពេលជាយូរ។ បន្ទាប់ពីវេជ្ជបណ្ឌិតពិនិត្យសុខភាពរួច ស្រាប់មានការភ្ញាក់ផ្អើលជាខ្លាំង ក្រោយរកឃើញច្រាសដុសធ្មេញប្រវែង ១៧ សង់ទីម៉ែត្រ ជាប់នៅក្នុងពោះវៀនរបស់អ្នកជំងឺ អស់រយៈពេល ៥២ ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសនោះមានឈ្មោះថា Yang មកពីខេត្ត Anhui ភាគខាងកើតប្រទេសចិន បាននិយាយប្រាបគ្រូពេទ្យថា គាត់ចាំបានថា គាត់លេបវាតាំងពីអាយុ ១២ ឆ្នាំ ហើយដោយសារតែភាពភ័យខ្លាចខ្លាំងពេក ទើបមិនហ៊ានប្រាប់ឪពុកម្តាយតាមត្រង់។

លោក Yang បាននិយាយថា កាលនៅតូចគាត់គិតថាច្រាសដុសធ្មេញនឹងរលាយដោយខ្លួនឯង ទើបមិនមានអារម្មណ៍ឈឺចាប់អ្វីសោះ រហូតមកដល់ពេលថ្មីៗនេះ វត្ថុនោះស្រាប់តែបង្កការឈឺចាប់ដល់រាងកាយរបស់លោកតែម្ដង។

មុនដំបូង ក្រុមគ្រូពេទ្យនៅមន្ទីរពេទ្យបានពិនិត្យប្រព័ន្ធរំលាយអាហាររបស់គាត់ ហើយបានរកឃើញច្រាសដុសធ្មេញជាប់នៅក្នុងពោះវៀនតូច។ ពួកគេបានធ្វើការវះកាត់មុខងារ Endoscopic ហើយយកច្រាសដុសធ្មេញប្រវែង ១៧ សង់ទីម៉ែត្រ ចេញពីរាងកាយក្នុងរយៈពេល ៨០ នាទី។ វាក៏ជារបស់មួយក្នុងចំណោមវត្ថុដែលវែងបំផុត ដែលខាងមន្ទីរពេទ្យបានយកចេញពីប្រព័ន្ធរំលាយអាហាររបស់អ្នកជំងឺក្នុងរយៈពេល ៣ ឆ្នាំចុងក្រោយនេះ។

វេជ្ជបណ្ឌិតម្នាក់ដែលមាននាមត្រកូល Zhou បាននិយាយថា នៅក្រោមកាលៈទេសៈធម្មតា ច្រាសដុសធ្មេញនៅក្នុងពោះវៀនអាចបង្វិល សង្កត់ និងចាក់ជាលិកាខាងក្នុងបាន។ វា​អាច​បណ្តាលឲ្យរលាក​ពោះវៀន ឈានដល់ស្លាប់បាន។ ចំណែកលោក Yang ជាមនុស្សសំណាង​ ដែល​ច្រាស​ធ្លាក់​នៅ​ត្រង់​កែង​នៃ​ពោះវៀន ហើយ​មិនអាចកម្រើក​អស់​ជាច្រើន​ទសវត្សរ៍។

បន្ទាប់ពីរឿងរ៉ាវរបស់បុរសជនជាតិចិនខាងលើបានចេញផ្សាយ មហាជនជាច្រើនបានសម្ដែង​ការ​ភ្ញាក់ផ្អើល​ចំពោះ​ព័ត៌មាន​មួយនេះ។ អ្នកខ្លះបានសរសើរដែលគាត់មានសំណាងអាចនៅរស់រានមានជីវិតជាមួយនឹងច្រាសដុសធ្មេញនៅក្នុងខ្លួនអស់រយៈពេល ៥ ទសវត្សរ៍។ ប៉ុន្តែអ្នកផ្សេងទៀត បានបង្ហាញការងើយឆ្ងល់ថា តើគាត់អាចលេបច្រាសដុសធ្មេញនោះដោយរបៀបណា បើប្រវែងរបស់វាក៏វែងគួរសម។

ទោះជាយ៉ាងណាក៏ដោយ កាលពីឆ្នាំមុន វេជ្ជបណ្ឌិតនៅខេត្តស៊ីឈួន ភាគនិរតីនៃប្រទេសចិន បានជួយស្ត្រីម្នាក់ យកបំពង់កាវដ៏ទំនើបមួយ ដែលមានប្រវែង ១៥សង់ទីម៉ែត្រ និងទទឹង ២.៥សង់ទីម៉ែត្រ ចេញពីរាងកាយអ្នកជំងឺដូចគ្នា។ ស្រ្តីនោះបាននិយាយថា នាងបានលេបវាដោយចៃដន្យ ហើយគិតថាប្រព័ន្ធរំលាយអាហាររបស់រាងកាយនាង នឹងដោះស្រាយវាតាមធម្មជាតិ។ ប៉ុន្តែមិនដូច្នោះទេ វត្ថុរឹងមិនអារលាយទៅតាមពេលវេលាបានឡើយ ទើបវេជ្ជបណ្ឌិត​ណែនាំឲ្យមនុស្ស​ធ្វើ​ការ​ពិនិត្យ​រាង​កាយ​ជា​ប្រចាំ ដើម្បី​ចៀសវាង​បញ្ហា​ស្រដៀង​គ្នា​នេះកើតឡើងចំពោះពួកគេ៕

អត្ថបទ៖ សាង ស្រីល័ក្ខ

ចុចអាន៖បុរសចិនម្នាក់ កើតជំងឺបាក់ទឹកចិត្តក្រោយសម្រាល បន្ទាប់ពីឈប់ធ្វើការដើម្បីមើលថែកូន