មួយគ្រួសារកើតជំងឺពោះវៀនខ្មៅគ្រប់គ្នា ដោយសារទម្លាប់ប្រើថ្នាំផ្ដេសផ្ដាស

ស្ត្រីអាយុ៦៥ ឆ្នាំម្នាក់ បានទល់លាមក ហើយបានប្រើប្រាស់អង់ស៊ីមសំយោគ និងថ្នាំបញ្ចុះលាមកជាប្រចាំដើម្បីជួយដល់ចលនាពោះវៀន។ អំឡុងពេល​ថត​ឆ្លុះ វេជ្ជបណ្ឌិត​បាន​រក​ឃើញ​ថា ស្រទាប់​ពោះវៀន​របស់​នាង​បាន​ប្រែជា​ខ្មៅ។ ក្រោយមក សមាជិកគ្រួសារផ្សេងទៀតក៏បានទៅពិនិត្យសុខភាព ហើយបានរកឃើញថា ពួកគេទាំងអស់សុទ្ធតែមានស្ថានភាពដូចគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញផ្នែកក្រពះពោះវៀន Zhang Yixue នៃប្រទេសចិន បាននិយាយថា បាតុភូតនៃពោះវៀនខ្មៅគឺជាលទ្ធផលនៃការប្រើប្រាស់ថ្នាំបញ្ចុះលាមក ឬអាហារដែលមានមុខងាររំញោចរយៈពេលយូរ បណ្តាលឲ្យខូចខាតដល់កោសិកាពោះវៀន ដែលនាំឲ្យមានការកកកុញសារធាតុពណ៌។ ទោះបីជាមិនមានការឈឺចាប់ក៏ដោយ នេះគឺជាសញ្ញាមួយដែលបង្ហាញថាមុខងារពោះវៀនបានធ្លាក់ចុះ ការទល់លាមកនឹងកាន់តែអាក្រក់ទៅៗ ហើយអ្នកជំងឺនឹងកាន់តែពឹងផ្អែកលើផលិតផលជំនួយពោះវៀន។

តាមការស៊ើបអង្កេត វេជ្ជបណ្ឌិត Zhang Yixue បានរកឃើញថា កូនស្រីរបស់អ្នកជំងឺបានទិញអង់ស៊ីមសំយោគ ឱសថ និងជំនួយរំលាយអាហារសម្រាប់គ្រួសារទាំងមូលប្រើប្រាស់។ ជាលទ្ធផលសមាជិកគ្រួសារទាំងអស់មានពោះវៀនខ្មៅ។

ដោយោឡែក យោងតាមសារព័ត៌មាន China Times បន្ទាប់ពីត្រូវបានគេណែនាំឲ្យផ្លាស់ប្តូររបៀបរស់នៅរបស់ពួកគេ មួយឆ្នាំក្រោយមក ក្រុមគ្រួសារបានត្រលប់មកពិនិត្យសុខភាព ហើយស្ថានភាពរបស់ពួកគេបានប្រសើរឡើងយ៉ាងច្បាស់។ ស្ត្រីរូបនេះបានចែករំលែកថា នាងបានធ្វើការផ្លាស់ប្តូរសំខាន់ៗចំនួនប្រាំយ៉ាង៖ ផឹកទឹកឲ្យបានច្រើន, ញ៉ាំអាហារបួស ដើម្បីបង្កើនការទទួលទានជាតិសរសៃ, ហាត់ប្រាណ, លេបថ្នាំ probiotics និងញ៉ាំអាហារដែលមិនទាន់កែច្នៃឲ្យបានច្រើន។

លោកវេជ្ជបណ្ឌិតបានសង្កត់ធ្ងន់ថា ពោះវៀនមិនត្រឹមតែជាកន្លែងសម្រាប់ស្រូបយកសារធាតុចិញ្ចឹមប៉ុណ្ណោះទេ ប៉ុន្តែក៏ជាមូលដ្ឋានគ្រឹះដ៏សំខាន់នៃប្រព័ន្ធភាពស៊ាំផងដែរ។ ដើម្បីការពារការទល់លាមក អ្នកគួរតែបង្កើនជាតិសរសៃ (២៥-៣៥ក្រាមក្នុងមួយថ្ងៃ) ដោយញ៉ាំបន្លែ ផ្លែឈើ និងគ្រាប់ធញ្ញជាតិឲ្យបានច្រើន។ ជាតិសរសៃជួយបន្ទន់លាមក និងជួយចលនាពោះវៀន វាក៏អាចត្រូវបានបន្ថែមពីអាហារបំប៉នប្រសិនបើចាំបាច់។ ការផឹកទឹកឲ្យបានគ្រប់គ្រាន់ក៏ជួយឲ្យជាតិសរសៃធ្វើការកាន់តែមានប្រសិទ្ធភាព និងជួយក្នុងដំណើរការលុបបំបាត់ទល់លាមក។

ស្ថានភាពពោះវៀនខ្មៅគឺជាការប្រែពណ៌នៃពោះវៀនធំ និងរន្ធគូថពីពណ៌ផ្កាឈូកទៅពណ៌ត្នោត ឬខ្មៅដោយសារតែការប្រមូលផ្តុំសារធាតុពណ៌ lipofuscin នៅពេលដែលកោសិកា epithelial ត្រូវបានបំផ្លាញ។ មូលហេតុចម្បងគឺការប្រើប្រាស់រយៈពេលយូរនៃថ្នាំបញ្ចុះលាមកដែលមានផ្ទុកសារធាតុ anthraquinones ។

យោងតាម ​​Healthline ស្ថានភាពពោះវៀនខ្មៅមិនបណ្តាលឱ្យមានរោគសញ្ញាទេ ហើយជារឿយៗត្រូវបានរកឃើញដោយចៃដន្យក្នុងអំឡុងពេលឆ្លុះពោះវៀនធំ។ ការសិក្សាមួយចំនួនបានសង្ស័យថា មានទំនាក់ទំនងរវាងអស្ថិរភាពនេះ និងមហារីកពោះវៀនធំ ប៉ុន្តែភស្តុតាងមិនច្បាស់នោះទេ។

ទន្ទឹមនោះ គេក៏ពុំមានការព្យាបាលជាក់លាក់ណាមួយសម្រាប់ការប្រែពណ៌ពោះវៀននោះទេ ប៉ុន្តែអ្នកជំងឺអាចជាសះស្បើយក្នុងរយៈពេល ៦-១២ ខែ បន្ទាប់ពីការបញ្ឈប់ការប្រើប្រាស់ថ្នាំបញ្ចុះលាមកដែលធ្វើឲ្យរលាកស្រទាប់ពោះវៀន៕

អត្ថបទ៖ សាង ស្រីល័ក្ខ

ចុចអាន៖តើការផឹកកាហ្វេ ពិតជាអាចកាត់បន្ថយហានិភ័យនៃជំងឺមហារីកថ្លើមពិតមែន?