ក្តាម បង្កងរាប់ពាន់ក្បាល ងាប់គរដូចភ្នំ យ៉ាងអាថ៌កំបាំងបំផុត លើឆ្នេរសមុទ្រអង់គ្លេស 

សត្វសមុទ្ររាប់ពាន់ក្បាល បានអណ្តែតមកទើរលើឆ្នេរ ភាគឦសានប្រទេសអង់គ្លេស ខណៈមានការភ័យខ្លាចថា រឿងនេះគឺបណ្តាលមកពីការបំពុល។

ក្តាម បង្កង និងសត្វសមុទ្រផ្សេងទៀតដែលខ្លះងាប់ ខ្លះរស់ នៅតែបន្តអណ្តែតមកទើរនៅតាមបណ្តោយឆ្នេរ Teeside ចន្លោះភូមិ Marske ដល់ភូមិ Saltburn ហើយអ្នកស្រុកចាត់ទុករឿងនេះថាជា “ទិដ្ឋភាពអាក្រក់បំផុត” ដែលពួកគេមិនធ្លាប់ឃើញទាល់តែសោះ។

ទិដ្ឋភាពនេះ ក៏ត្រូវបានគេមើលឃើញផងដែរនៅតាមឆ្នេរសមុទ្រក្នុងតំបន់ Seaton Carew និងនៅភាគខាងជើង Seaham។

ទីភ្នាក់ងារបរិស្ថានបានបញ្ជាក់កាលពីថ្ងៃចន្ទថា ខ្លួនបានបើកការស៊ើបអង្កេតលើករណីដ៏អាថ៌កំបាំងនេះ ហើយរកមើលថាតើការបំភាយឧស្ម័នខ្ពស់ ត្រូវបានស្តីបន្ទោសឬក៏យ៉ាងណា។

កាលពីជាង២សប្តាហ៍មុន កាសែត TeessideLive បានរាយការណ៍ថា សត្វសមុទ្រងាប់ ត្រូវបានគេប្រទះឃើញនៅតំបន់ Seaton Carew, Redcar និងភាគខាងជើង Seaham។ ទីភ្នាក់ងារបរិស្ថានបានបើកការស៊ើបអង្កេត ហើយមកទល់ពេលនេះមិនទាន់បញ្ចប់នៅឡើយទេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ មនុស្សរាប់រយនាក់នៅ អង់គ្លេស នាំគ្នាស្រាតននលគកចុះងូតទឹកសមុទ្រ ប្រារព្ធពិធីមួយ