បង្កងវៀតណាម ៦តោន ងាប់នៅព្រំដែន ដោយសារ ចិន ហាមនាំចូល

បង្កងប្រហែល៦តោន បានងាប់នៅព្រំដែន វៀតណាម-ចិន ក្នុងរយៈពេលបីថ្ងៃចុងក្រោយនេះ ខណៈប្រទេសចិន ដាក់កំហិតលើការនាំចូលគ្រឿងសមុទ្រប្រភេទនេះ ទាំងមិនបានប្រកាសមុន។

មន្ត្រីគយតំបន់ Mong Cai ក្នុងខេត្ត Quang Ninh ភាគខាងជើង និយាយថា បង្កងមិនត្រូវបានដឹកជញ្ជូនទៅកាន់ស្តុករបស់ចិនទាន់ពេលវេលាទេ ដូច្នេះហើយទើបវាងាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក្តី គេ​មិន​ច្បាស់​ទេថាតើ ​ហេតុអ្វី​បាន​ជា​ចិន ដាក់បម្រាម​នាំចូល​បង្កង​ភ្លាមៗបែបនេះ។

អ្នកលក់បង្កងងាប់ បានលក់វាទៅឲ្យអ្នកទិញក្នុងស្រុកក្នុងតម្លៃ ៨.២១ ទៅ ១៦.៤២ដុល្លារ ក្នុងមួយគីឡូក្រាម ពោលគឺថោកជាងតម្លៃនាំចេញដល់ទៅ៣ដង។

មុនពេលចិនរឹតត្បិតការនាំចូល រថយន្តប្រហែល១០០គ្រឿង ដែលដឹកគ្រឿងសមុទ្រទាំងស្រស់និងកក បានធ្វើដំណើរដឹកជញ្ជូនជារៀងរាល់ថ្ងៃតាមរយៈស្ពាន Hai Yen នៃតំបន់ Mong Cai ដែលតភ្ជាប់ប្រទេសទាំងពីរ។

ចាប់ពីដើមឆ្នាំរហូតដល់ថ្ងៃទី១៥ខែកញ្ញា ទំនិញចំនួន ៥៣២ ០០០តោនបានឆ្លងកាត់ស្ពាន Hai Yen ពោលគឺកើនឡើង១២៨% បើធៀបនឹងឆ្នាំមុន។ ក្នុងនោះ មានប្រហែល១០% ជាគ្រឿងសមុទ្រស្រស់៕

ប្រែសម្រួល៖ Vann Vann

ប្រភព៖ VN Express

ចុចអាន៖ ក្រៅពីរសជាតិឆ្ងាញ់ បង្កងអាចផ្ដល់អត្ថប្រយោជន៍សុខភាពច្រើនយ៉ាង