UN ព្រមាន មីយ៉ាន់ម៉ា កំពុងឈរនៅ “មាត់ជ្រោះមហន្តរាយ” ផ្នែកមនុស្សធម៌

អង្គការសហប្រជាជាតិ (UN) បានចេញការព្រមានកាលពីថ្ងៃចន្ទថា បច្ចុប្បន្នប្រជាជនមីយ៉ាន់ម៉ាប្រមាណមួយភាគបី ឬជាង ១៨ លាននាក់កំពុងត្រូវការជំនួយមនុស្សធម៌ ហើយអង្គការក៏ព្យាយាមស្វែងរកការបរិច្ចាគប្រាក់ ១ ពាន់លានដុល្លារបន្ថែមទៀតផងដែរនៅឆ្នាំក្រោយដើម្បីប្រយុទ្ធប្រឆាំងនឹងតម្រូវការចាំបាច់ទាំងអស់ ខណៈស្ថានភាព​មនុស្សធម៌​ក្នុង​ប្រទេស​អាស៊ីអាគ្នេយ៍មួយនេះកំពុងស្ថិតនៅមាត់ជ្រោះមហន្តរាយ​ ចាប់តាំងពី​រដ្ឋប្រហារកាលពី​ជិត ៣ ​ឆ្នាំមុនមក ​។

របាយការណ៍របស់ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា “នៅឆ្នាំ ២០២៤ ខាងមុខ ប្រទេសមីយ៉ាន់ម៉ានឹងនៅតែបន្តកើតមានជម្លោះហិង្សា ជួបវិបត្តិមនុស្សធម៌កាន់តែជ្រៅទៅៗ និងឈរនៅលំដាប់មួយអន់បំផុត ចាប់តាំងពីយោធាធ្វើរដ្ឋប្រហារឡើងកាន់អំណាចនៅក្នុងខែកុម្ភៈ ឆ្នាំ២០២១ ខណៈប្រជាជនស៊ីវិលកំពុងរស់នៅទាំងភ័យខ្លាច” ។

លោក Marcoluigi Corsi អ្នកសម្របសម្រួលកិច្ចការមនុស្សធម៌បណ្តោះអាសន្នរបស់អង្គការសហប្រជាជាតិប្រចាំនៅមីយ៉ាន់ម៉ាបានព្រមានថា ប្រជាជន ១៨.៦ លាននាក់ដែលកំពុងត្រូវការជំនួយមនុស្សធម៌នាពេលបច្ចុប្បន្ននេះ គឺច្រើនជាងឆ្នាំមុនចំនួន ១ លាននាក់ និងច្រើនជាងរហូតដល់ ១៩ ដងកាលពីឆ្នាំ ២០២០ នៅមុនពេលរដ្ឋប្រហារកើតឡើង ។

អ្នកសម្របសម្រួលបញ្ជាក់ថា “កុមារប្រមាណ ៦ លាននាក់កំពុងរស់នៅទាំងមានវិបត្តិទ្រង់ទ្រាយធំ ដោយសារការផ្លាស់ទីលំនៅ កង្វះការថែទាំសុខភាព និងការអប់រំ ភាពអសន្តិសុខស្បៀងអាហារ និងកង្វះអាហារូបត្ថម្ភ រួមជាមួយនឹងហានិភ័យនៃបញ្ហាផ្លូវចិត្តជាដើម” ។

របាយការណ៍នេះបានគូសបញ្ជាក់ទៀតថា មនុស្សជិត ២.៦ លាននាក់ត្រូវបានបណ្តេញចេញពីផ្ទះសម្បែងរបស់ពួកគេ គិតត្រឹមថ្ងៃទី១១ ខែធ្នូ ដោយកើនឡើង ១.១ លាននាក់ បើប្រៀបធៀបនឹងរយៈពេលដូចគ្នាកាលពីឆ្នាំមុន ។ ក្នុងនោះមានមនុស្សជាង ៦៦ ម៉ឺននាក់ត្រូវបានរើទីលំនៅ ចាប់តាំងពីចុងខែតុលា ចំពេលជម្លោះកាន់តែផ្ទុះខ្លាំងឡើងរវាងកងកម្លាំងរដ្ឋាភិបាលយោធា និងក្រុមប្រដាប់អាវុធជនជាតិភាគតិចនៅភាគខាងជើងនៃប្រទេស ។

គួរបញ្ជាក់ថា នៅឆ្នាំ ២០២៤ ខាងមុខនេះ OCHA បានអំពាវនាវឲ្យមានជំនួយអាទិភាព ឬការបរិច្ចាគថវិកាចំនួន ៩៩៤ លានដុល្លារដើម្បីជួយទៅដល់ប្រជាជន ៥.៣ លាននាក់ ខណៈនៅឆ្នាំ ២០២៣ នេះ ជំនួយអាទិភាពសម្រាប់ផ្ដល់ទៅឲ្យប្រជាជនប្រមាណ ១.៩ លាននាក់ គឺមិនបានទៅដល់ដៃពួកគេនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ កងទ័ពជនជាតិភាគតិច មីយ៉ាន់ម៉ា ប្រកាសដណ្ដើមបានទីក្រុងជាប់ព្រំដែន ចិន