ថៃ ផ្តល់សញ្ជាតិដល់ពលករចំណាកស្រុក រាប់សែននាក់ 

កាសែត Bangkok Post បានចុះផ្សាយនៅថ្ងៃព្រហស្បតិ៍ទី៣១ខែតុលាឆ្នាំ២០២៤ថា គណៈរដ្ឋមន្ត្រី បានសម្រេចផ្តល់សញ្ជាតិថៃ ដល់ពលករចំណាកស្រុករាប់សែននាក់ ដែលរស់នៅក្នុងប្រទេសនេះចាប់តាំងពីឆ្នាំ១៩៨៤មក។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនមែនតែពលករចំណាកស្រុកឡើយ សូម្បីកុមារដែលកើតនៅថៃមានឪពុកម្តាយជាជនជាតិភាគតិច ក៏នឹងទទួលបានសញ្ជាតិដែរ ពោលគឺសរុបចូលគ្នាមានជាង៤៨២ ០០០នាក់។

អ្នកនាំពាក្យទីស្តីការនាយករដ្ឋមន្ត្រី លោក Jirayu Huangsap និយាយ ចំពោះពលករចំណាកស្រុកស្របច្បាប់ដែលធ្វើការនៅប្រទេសថៃអស់រយៈពេលជាយូរមកនោះ គណៈរដ្ឋមន្ត្រីយល់ថា ជារឿងសមរម្យបំផុតក្នុងការផ្តល់សញ្ជាតិឲ្យពួកគេ ដូច្នេះពួកគេអាចធ្វើដំណើរដោយសេរី និងនៅតែទទួលបានអត្ថប្រយោជន៍ រួមចំណែកដល់ការអភិវឌ្ឍន៍សេដ្ឋកិច្ចថៃ។ លោកបន្ថែម​ថា ក្នុងរយៈពេល៦០ថ្ងៃទៀត ក្រសួង​មហាផ្ទៃ​នឹងអនុម័តជាផ្លូវការចំពោះសេចក្តី​សម្រេច​របស់​គណៈរដ្ឋមន្ត្រីនេះ។

ក្រុមដំបូងដែលទទួលបានអត្ថប្រយោជន៍ពីសេចក្តីសម្រេចនេះ គឺមានពលករចំណាកស្រុកប្រហែល១២០ ០០០នាក់ដែលរស់នៅនិងធ្វើការក្នុងប្រទេសថៃចន្លោះឆ្នាំ១៩៨៤ដល់១៩៩៩ ខណៈក្រុមទី២ រួមមានពលករចំណាកស្រុកប្រមាណ ២១៥ ០០០នាក់ដែលរស់នៅក្នុងប្រទេសចន្លោះឆ្នាំ២០០៥ដល់២០១១។

ចំណែកក្រុមទី៣គឺជាកុមារប្រហែល ២៩ ០០០នាក់ដែលកើតក្នុងគ្រួសារមានឪពុកម្តាយជាជនជាតិភាគតិចនៅក្នុងប្រទេសថៃ ហើយក្រុមទី៤​ គឺមានកុមារប្រហែល ១១៣ ០០០នាក់ដែលកើតក្នុងគ្រួសារឪពុកម្តាយជាជនជាតិភាគតិចដែលគ្មានឯកសារ។

ទោះបីជាយ៉ាងណាក៏ដោយ មន្ត្រីថៃបញ្ជាក់ថា ដំណើរការផ្តល់សញ្ជាតិនេះ នឹងចំណាយពេលមិនតិចឆ្នាំឡើយ ទើបហើយរួចរាល់ជាផ្លូវការ៕

អត្ថបទ៖ សុខ សុវណ្ណ

ចុចអាន៖ ថៃ រឹតដៃបង្ក្រាបលើពលករបរទេស ដែលលួចធ្វើការងារបម្រុងទុកសម្រាប់ពលរដ្ឋខ្លួន