រយៈពេល​៣០ឆ្នាំ ប្រទេសកូរ៉េខាងត្បូង​​បដិសេធ​​ការ​​ស្នើ​សុំ​​សិទ្ធិ​ជ្រកកោន​រហូត​៩៧​%​

យោងតាមស្ថិតិដែលចេញផ្សាយដោយក្រសួងយុត្តិធម៌កូរ៉េខាងត្បូងកាលពីថ្ងៃទី៣ខែកុម្ភៈនេះ បានឲ្យដឹងថា ប្រទេសកូរ៉េខាងត្បូងបានបដិសេធ ស្ទើរតែទាំងអស់នៃពាក្យសុំ​​​​​​របស់​អ្នក​សុំសិទ្ធិ​ជ្រក​​​កោន​ក្នុងឋានៈ​ជាជនភៀសខ្លួនបរទេសចាប់តាំងពីឆ្នាំ១៩៩៤មក។

កូរ៉េខាងត្បូងបានទទួលពាក្យសុំជនភៀសខ្លួនចំនួន ១២​២០៩៥​ ចាប់តាំងពីអនុវត្តកម្មវិធីជនភៀសខ្លួនក្នុងឆ្នាំ ១៩៩៤​ដោយមានតែបុគ្គលចំនួន ១៥៤៤នាក់ប៉ុណ្ណោះ​ដែលត្រូវបានអនុញ្ញាត ដោយ​អត្រាបដិសេដមានរហូតដល់ទៅ​៩៧% ហើយអត្រាអនុម័ត​យល់​ព្រម​ ២.៧%​ប៉ុណ្ណោះ។

ប្រទេសនេះបានចាប់ផ្តើមទទួលយកពាក្យសុំជនភៀសខ្លួននៅខែមីនាឆ្នាំ ១៩៩៤ បន្ទាប់ពីបានចូលរួមអនុសញ្ញា​និងពិធីសារស្តីពីជនភៀសខ្លួនរបស់អង្គការសហប្រជាជាតិក្នុងឆ្នាំ១៩៩២។ មានពាក្យស្នើ​សុំកើនឡើងត្រឹមតែ ៥០៦៩ ពីឆ្នាំ១៩៩៤​​ដល់ឆ្នាំ​២០១២ប៉ុណ្ណោះ ប៉ុន្តែចំនួនសុំបានកើនឡើងយ៉ាងខ្លាំងបន្ទាប់ពីការអនុវត្តច្បាប់ស្តីពីជនភៀសខ្លួន​លើ​បទប្បញ្ញត្តិ​សម្រាប់ជនភៀសខ្លួននិងការព្យាបាលក្នុងឆ្នាំ​២០១៣។

ពាក្យស្នើសុំប្រចាំឆ្នាំបាន​​កើន​ដល់​១៨៨៣៧ ក្នុងឆ្នាំ ២០២៣ និង ១៨៣៣៦ ក្នុងឆ្នាំ ២០២៤ កើនឡើងប្រហែល​១២ ដងខ្ពស់ជាងពាក្យសុំចំនួន ១៥៧៤ដែលទទួលបានក្នុងឆ្នាំ ២០១៣។ ទោះជាយ៉ាងណាក៏ដោយ ចំនួនការអនុម័តនៅតែមានស្ថេរភាពដោយមានការអនុម័តមានតែចំនួន១០៥ ប៉ុណ្ណោះក្នុងឆ្នាំ ២០២៤ និង ១០១ ក្នុងឆ្នាំ ២០២៣។

ក្រសួងយុត្តិធម៌ បានពន្យល់ថា អត្រាអនុម័តទាបរបស់កូរ៉េខាងត្បូងមិនអាចប្រៀបធៀបទៅនឹងបណ្តាប្រទេសនៅអឺរ៉ុបបាន​ទេ ដោយសារកត្តាស្មុគ្រស្មាញ រួមទាំងភាពងាយស្រួលនៃភូមិសាស្រ្ត និងភាពស្រដៀងគ្នានៃប្រវត្តិសាស្ត្រ-វប្បធម៌។ ជាមួយ​គ្នានេះបុគ្គលស្នើសុំជាច្រើនមកពីប្រទេសដែលមិនមានវិបត្តិជនភៀសខ្លួនដូចជា អាហ្វហ្គានីស្ថាន ស៊ីរី វ៉េណេស៊ុយអេឡា អ៊ុយក្រែន ឬស៊ូដង់ខាងត្បូងនោះទេ។

បុគ្គល​ដែលស្នើសុំទាំងនោះមានជនជាតិរុស្សីច្រើនជាងគេគឺ​១៥% តាមពីក្រោយដោយកាហ្សាក់ស្ថាន ១០.៧% ចិន ៩.១% ប៉ាគីស្ថាន ៦.៧% និងឥណ្ឌា ៦.៤%។ បញ្ហានយោបាយគឺជាហេតុផលទូទៅបំផុតដែលត្រូវបានលើកឡើងក្នុងការស្នើ​​សុំ​សិទ្ធិ​​ជាជន​ភៀសខ្លួន បន្ទាប់មកការបៀតបៀនសាសនា សមាជិកភាព​ក្នុងក្រុមសង្គម ជាពិសេសពូជសាសន៍ ការបង្រួបបង្រួមគ្រួសារ និងសញ្ជាតិ។

ពាក្យស្នើសុំ​៤២% ដែលត្រូវាបានបដិសេដគឺបានលើកឡើងពីហេតុផលដែលមិនត្រូវបានគ្របដណ្តប់ដោយអនុសញ្ញា​ជនភៀសខ្លួន ដូចជាការចង់បានផលប្រយោជន៍ផ្នែកសេដ្ឋកិច្ច ឬការគំរាមកំហែងឯកជនជាដើម។ ប្រហែល ៩.៤% នៃពាក្យសុំសរុប ឬ ១១៤០៩ ករណីត្រូវបានបញ្ជូនឡើងវិញ បន្ទាប់ពីការបដិសេធដំបូង។ ក្នុងរយៈពេល ៥ឆ្នាំកន្លងមកនេះ មានជាមធ្យម ៨២% នៃអ្នកដាក់ពាក្យដែលត្រូវបានបដិសេធបានដាក់ពាក្យប្តឹងជំទាស់នឹងការសម្រេចចិត្តនេះ។

ក្រសួងយុត្តិធម៌បានកត់សម្គាល់ថាច្បាប់ជនភៀសខ្លួនបច្ចុប្បន្នមិនដាក់កំហិតលើពេលវេលានៃការដាក់ពាក្យ ឬភាពញឹកញាប់នោះទេ ដែលបណ្តាលឱ្យករណីជនភៀសខ្លួនមាន ១៨% នៃបណ្តឹងរដ្ឋបាល និង ៣៤% នៃបណ្តឹងសាទុក្ខផ្នែករដ្ឋបាល។ សម្រាប់ពេលវេលាដំណើរការជាមធ្យមគឺ ១៤ ខែសម្រាប់ការពិនិត្យដំបូង១៧.៩ ខែសម្រាប់ការប្តឹងឧទ្ធរណ៍ និង ២២.៤ ខែសម្រាប់វិវាទរដ្ឋបាល។ សរុបមកត្រូវចំណាយពេលលើសពី ៤ឆ្នាំសម្រាប់ដំណើរការពេញលេញ៕

អត្ថបទ៖ ប៊ុន សុភាព