​ផល​ប៉ះពាល់វិស័យ​អាកាសចរណ៍​​ក្នុង​​ជម្លោះ​​អ៊ីស្រាអែល​​និង​អ៊ីរ៉ង់​

យោងតាមការចេញផ្សាយរបស់សារព័ត៌មាន CNA នៅថ្ងៃទី២៣ខែមិថុនានេះ បន្ទាប់ពីការវាយប្រហារតាមអាកាសរបស់សហរដ្ឋអាមេរិកទៅលើទីតាំងនុយក្លេអ៊ែររបស់អ៊ីរ៉ង់ ក្រុមហ៊ុនអាកាសចរណ៍ពាណិជ្ជកម្មជុំវិញពិភពលោកកំពុងវាយតម្លៃឡើងវិញនូវជើងហោះហើរឆ្លងកាត់មជ្ឈិមបូព៌ា ដោយសារការកើនឡើងនៃការព្រួយបារម្ភផ្នែកសន្តិសុខ។

ដែនអាកាសពីប្រទេសអ៊ីរ៉ង់ និងអ៊ីរ៉ាក់ទៅកាន់សមុទ្រមេឌីទែរ៉ាណេ មានការធ្លាក់ចុះនៃចរាចរណ៍ចាប់តាំងពីអ៊ីស្រាអែលបានចាប់ផ្តើមការវាយប្រហាររបស់ខ្លួនកាលពីថ្ងៃទី ១៣ ខែមិថុនា ដែលបណ្តាលឱ្យមានការលុបចោលជើងហោះហើរជាច្រើន និងផ្លាស់ប្តូរទិសដៅ។

អាកាសយានដ្ឋានធំៗដូចជាទីក្រុងឌូបៃ និងដូហា ដែលជាធម្មតាបន្តដំណើរការសូម្បីតែក្នុងអំឡុងពេលមានបញ្ហាក្នុងតំបន់ បែរជាមានការពន្យារពេលជើងហោះហើរ និងការលុបចោលក្រោយការវាយប្រហារបស់អាមេរិកលើអ៊ីរ៉ង់។ ខណៈពេលដែលក្រុមហ៊ុនអាកាសចរណ៍មួយចំនួនដូចជា Singapore Airlines និង British Airways បានបន្តជើងហោះហើរឡើងវិញនៅថ្ងៃចន្ទនេះ ក្រុមហ៊ុនផ្សេងទៀតដូចជា Air France KLM បានបន្តការលុបចោល។

មជ្ឈិមបូព៌ាបានក្លាយជាច្រករបៀងហោះហើរដ៏សំខាន់រវាងអឺរ៉ុប និងអាស៊ី ដោយសារតែការបិទដែនអាកាសរុស្ស៊ី និងអ៊ុយក្រែន។ ឥឡូវនេះ ក្រុមហ៊ុនអាកាសចរណ៍កំពុងប្រើប្រាស់ផ្លូវវែងជាងនៅលើសមុទ្រកាសព្យែន (Caspian Sea) ឬឆ្លងកាត់ប្រទេសអេហ្ស៊ីប និងអារ៉ាប៊ីសាអូឌីត ដែលមានន័យថាពួកគេចំណាយកាន់តែច្រើនលើប្រេងឥន្ធនៈ និងអាកាសយាននិក។ ការឡើងថ្លៃប្រេងក៏កំពុងបន្ថែមភាពតានតឹងផ្នែកហិរញ្ញវត្ថុផងដែរ។

ក្រុមហ៊ុនអាកាសចរណ៍កំពុងដោះស្រាយបញ្ហាកើនឡើងពីសញ្ញា GPS ក្លែងក្លាយ និងការជ្រៀតជ្រែកនៃសញ្ញា ជាពិសេសនៅលើឈូងសមុទ្រពែក្ស ដែលយន្តហោះជាង ១៥០ គ្រឿងត្រូវបានរងផលប៉ះពាល់ក្នុងរយៈពេលត្រឹមតែមួយថ្ងៃ។ អង្គការសុវត្ថិភាពអាកាសចរណ៍ព្រមានថា ស្ថានភាពអាចបង្កគ្រោះថ្នាក់បន្ថែមទៀតដល់ក្រុមហ៊ុនអាកាសចរណ៍ និងជើងហោះហើរដែលភ្ជាប់ជាមួយសហរដ្ឋអាមេរិកនៅក្នុងរដ្ឋឈូងសមុទ្រ។

ខណៈពេលដែលក្រុមហ៊ុនអាកាសចរណ៍ពិភពលោកភាគច្រើននៅតែប្រុងប្រយ័ត្ន ក្រុមហ៊ុនអាកាសចរណ៍ក្នុងស្រុកនៅក្នុងប្រទេសដូចជា ហ្ស៊កដានី អ៊ីរ៉ាក់ និងលីបង់ កំពុងចាប់ផ្តើមប្រតិបត្តិការឡើងវិញបន្តិចម្តងៗ។ ទោះយ៉ាងណាសរុបមក ជម្លោះកាន់តែកើនឡើង និងភាពមិនប្រាកដប្រជាក្នុងតំបន់បន្តបង្កបញ្ហាប្រឈមយ៉ាងធ្ងន់ធ្ងរដល់អាកាសចរណ៍អន្តរជាតិ៕

អត្ថបទ៖ ប៊ុន សុភាព