មាន​កូនស្រី កង្វល់ខ្លាចចាញ់បោក​ព្រាននារី ជាទុក្ខធំ​នៃឳពុកម្តាយបច្ចុប្បន្ន

ហានិភ័យនៃការរំលោភសេពសន្ថវៈ ជាការគិត​វែងអន្លាយ​របស់ម៉ែឪគ្រប់រូប។ ពីមុន ហេតុផលពី​ការបារម្ភនេះ ​បានធ្វើឱ្យ​ពួកគាត់បង្ខាំង​មិនឱ្យកូនស្រី​ទៅរៀនឆ្ងាយពីផ្ទះឡើយ។

ឥឡូវនេះ​កត្តាសេដ្ឋកិច្ច​បានធ្វើឱ្យ​​ក្មេងជំទង់ត្រូវបានគ្រួសារ​អនុញ្ញាត្តិឲ្យចេញឆ្ងាយ ទំាង​ដឹងថា​គ្រោះថ្នាក់នៅតែបន្តមាន​។

តាមពិតទៅ ទោះបីជា​ការរំលោភសេពសន្ថវៈមិនមែនជាកំហុសរបស់ជនរងគ្រោះក៏​ហានិភ័យមាន​យ៉ាង​ខ្លាំងក្នុងការ​ដែល​មិនគិតបង្ការពីបញ្ហានេះ​ឱ្យ​បានទាន់ពេលវេលា។

ការសិក្សាមួយបានបង្ហាញថា ប្រហែលជាពាក់កណ្តាលនៃការបំពានផ្លូវភេទទាំងអស់នាំមុខ​ដោយ​គ្រឿងស្រវឹងដែល​ត្រូវបានប្រើដោយជនល្មើស ឬដោយជនរងគ្រោះខ្លួនឯង។

ការ​និយាយ​ដាស់តឿន​ប្រាប់កូនជំទង់អំពីរបៀបដែលស្លៀកពាក់ទាក់ទងនិងសុវត្ថិភាព​និងការ​បង្ហោះ​រូបភាព​អ្វីមួយអំពីខ្លួនយើងទៅលើបណ្តាញសង្គម ដោយ​សួរបញ្ច្រាសឱ្យពួកគេមិនខឹងយើង ​ប៉ុន្តែ​ចេះថ្លឹងថ្លែងឧទាហរណ៍ថា តើ​ឈុតនោះ​ស្អាត​ឬ ធ្វើឱ្យ​យើង​រងគ្រោះទៅវិញ?

ប្រសិនបើយើង​សង្ស័យថា កូនជំទង់កំពុង​សាកល្បង​គ្រឿងញៀនឬគ្រឿងស្រវឹងហើយ​គេចមិនលើកទូរសព្ទ​ដើរលេង​លើសម៉ោង ចូរកុំឡូឡា ​ហើយ​សង្កត់ចិត្ត​ប្រាប់តាម​សម្រួលថា ​នាងអាចផ្ញើសារមកគ្រប់ពេលប្រាប់ពីទីកន្លែង​សម្រាប់យើង​មកដឹកទៅផ្ទះវិញ ហើយ​សន្យាថាមិនខឹងនាង​ទេ​។ សម្រាប់ស្ថានភាពបែបនេះ​បើអ្នកឆេវឆាវអង្ករនិងក្លាយជាបាយ ព្រោះពេលនាង​មានអារម្មណ៍មិនស្រួលឬរងការ​គំរាមកំហែងនាង​អាចនឹង​មិនត្រឡប់មកផ្ទះ​តែម្តង។

ការរំលោភសេពសន្ថវៈនៅតែបន្តកើតមាន​ក្នុងរូបភាពច្រើនឡើងៗ ទោះបីជា ច្បាប់​តឹងរឹង​យ៉ាងណាក្តី។ នៅក្នុងប្រទេសកម្ពុជា ការរំលោភឬអំពើហិង្សាគ្រប់ប្រភេទ​គឺ​ជាបទឧក្រិដ្ឋដែលជាទោសធ្ងន់បំផុត​ក្នុងក្រមព្រហ្មទណ្ឌ ប៉ុន្តែ​តើមាន​អ្នកណាខ្វល់ បើ​ករណី​រំលោភកូន​ស្រី ​ក្មួយ និងកុមារជំទង់កើតឡើងសឹងថា​រៀងរាល់ខែទៅហើយ?

រាល់ក្មេងជំទង់ដែលរងការរំលោភសេពសន្ថវៈឬសូម្បី​ការបៀតបៀនកេរ៍ខ្មាស​ដោយវិធីណាមួយ​ក្តី ពីអ្នកណាម្នាក់ក៏ដោយ នាង​នឹង​ជួបប្រទះ​នូវ​អារម្មណ៍ថា​គ្មាន​សុវត្ថិភាពពេញមួយជីវិត​។ ដោយសារ​ភាគច្រើន ជនរងគ្រោះច្រើនតែត្រូវធ្វើបាប​ដោយអ្នកដែលនាងទុកចិត្ត ជាឪពុក បងប្រុស ​មិត្ត គ្រូ​ ឬសង្សារ។ ហេតុដូច្នេះស្រមោលខ្មៅនេះ នឹងគ្របដណ្តប់សែនជ្រៅ ព្រមទំាង​ចូលទៅផ្លាស់ប្តូរជីវិតនាងឱ្យវេទនាដោយបញ្ហាស្ត្រេស រោគនៃ​ការប៉ះទង្គិចផ្លូវចិត្ត​ធ្ងន់ធ្ងរ រោគគេងមិនលក់ និងការធ្លាក់ទឹកចិត្ត។ ខ្លះទៅ​ជា​មានសភាព​ចង់បាន​ដៃគូរួមភេទច្រើននិង​ហានិភ័យខ្ពស់នៃការធ្វើអត្តឃាត។

ពេលនា​ងពេញវ័យ​ដែលយើងអាចសង្ស័យថាកំពុងមាន​ដៃគូ​លួចលាក់ ចូរ​រំងាប់ចិត្ត​ហើយ​បង្រៀនពី​វិធីដែលនាំឱ្យ​ការណាត់ជួបមួយ​ដែល​មានសុវត្ថិភាព។

បុរសខ្លះគិតថា ប្រសិនបើស្រីណាម្នាក់ព្រមចេញទៅ​អាហារពេលល្ងាចជាមួយពួកគេ គឺមានន័យ​ថា​គេ​មានសិទ្ធិទទួលទំនាក់ទំនង​ផ្លូវភេទជាថ្នូរ។

ការនិយាយអំពី​តម្លៃនៃសីលធម៌មនុស្សម្នាក់ៗ ល្អជាងនិយាយអំពីព្រហ្មចារិយ៍។

ព្រាននារី មិនខ្វះវិធីនឹងធ្វើឱ្យនាងទុកចិត្ត​ឡើយ៕

អត្ថបទ៖ សាយ ពេជ្រ

ចុចអាន៖ សំណួរ​បួន​ដែលកូនជំទង់ៗចង់ដឹង​ណាស់ តែមិនហ៊ានសួរ​!

ចុចអាន៖ ១០ ចំណុចអស្ចារ្យនៃរាងកាយមនុស្សស្រីដែលបុរសៗមិនដែលដឹង