មន្ត្រីជាន់ខ្ពស់៖ការអប់រំកុមារតូចៗជាមូលដ្ឋានគ្រឹះដ៏សំខាន់សម្រាប់សិស្សទទួលបានការសិក្សាពេញមួយជីវិត

មន្ត្រីជាន់ខ្ពស់នៃក្រសួងអប់រំ យុវជន និងកីឡា បានលើកឡើងថាការអប់រំកុមារតូចៗ គឺជាមូលដ្ឋានគ្រឹះដ៏សំខាន់សម្រាប់សិស្សានុសិស្សឱ្យទទួលបានទាំងជំនាញរឹង និងជំនាញទន់ ការសិក្សាពេញមួយជីវិត និងបំណិនសតវត្សទី២១។

ថ្លែងក្នុងវេទិកាអប់រំស្តីពី បរិស្ថានបៃតងក្នុងសាលារៀន និងសហគមន៍អន្តរជាតិ និងការអប់រំបែបសតវត្សទី២១ដើម្បីធ្វើឱ្យយុវជនជំនាន់ថ្មី ទទួលបានជោគជ័យក្នុងពិភព ប្រកួតប្រជែងខ្ពស់កាលពីរសៀលថ្ងៃទី១៧កក្តដា លោកស្រី គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា ការបណ្តុះកុមារពីតូច ធ្វើឱ្យសិស្សានុសិស្សចេះគិតស៊ីជម្រៅ និងជំនាញដោះស្រាយបញ្ហាជាដើម ដែលទាំងអស់នេះគឺជាស្ពានដើម្បីឱ្យក្មួយៗត្រៀមខ្លួនរួចរាល់ក្នុងដំណើរសិក្សាបន្តបន្ទាប់ទៀត។

លោកស្រីរដ្ឋលេខាធិការប្រចាំការ បានលើកឡើងពីវិធីសាស្ត្របង្រៀនកុមារតូចគឺ “ការរៀនតាមរយៈការលេង” ដោយការលេងនេះគឺគោរពទៅតាមគោលការណ៍នៃការអភិវឌ្ឍកុមារទាំងប្រាជ្ញា បំណិនសង្គម និងការអភិវឌ្ឍរាងកាយជាដើមដើម្បីជួយឱ្យពួកគាត់ មានបំណិនក្នុងការសិក្សាពេញមួយជីវិត និងបំណិន​សង្គម ដូចជាមានភាពក្លាហាន ចេះចែករំលែក ចេះធ្វើការងារជាក្រុម ឈានទៅរកភាពជោគជ័យក្នុងការសិក្សាបន្តបន្ទាប់ទៀត ទាំងក្នុងកម្រិតថ្នាក់បឋមសិក្សា មធ្យមសិក្សា ឧត្តមសិក្សា ក៏ដូចជាការសិក្សាពេញមួយជីវិតផងដែរ។

ជាមួយគ្នានេះលោកស្រី បានថ្លែងអំណរគុណដល់ ឪពុកម្តាយ អ្នកអាណាព្យាបាលដែលបានខិតខំប្រឹងប្រែងក្នុងការវិនិយោគលើវិស័យអប់រំដល់កុលបុត្រកុលធីតាតាំងពីមេត្តយ្យសិក្សាដល់មធ្យមសិក្សាទុតិយភូមិ ហើយលទ្ធផលនេះបានឆ្លុះបញ្ចាំងពីការខិតខំប្រឹងប្រែងរួមគ្នា ក្នុងការបណ្តុះបណ្តាលមនុស្សជំនាន់ក្រោយ ដែលជាទំពាំងស្នងឫស្សី និងជាអ្នកបន្ដវេនដឹកនាំដ៏មានសក្ដានុពលសម្រាប់ប្រទេសជាតិយើងនាពេលអនាគត។

លោកស្រី ក៏បានលើកឡើងអំពីប្រសាសន៍របស់សម្តេចអគ្គមហាសេនាធិបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា និងបច្ចុប្បន្នជាប្រធានព្រឹទ្ធសភាថា កម្ពុជាមិនដែលទម្លាក់ដៃចុះក្នុងការអភិវឌ្ឍវិស័យអប់រំបណ្តុះបណ្តាលនោះទេ ផ្ទុយទៅវិញរាជរដ្ឋាភិបាលបានផ្ដល់ការលើកទឹកចិត្តតាមរយៈការអនុគ្រោះពន្ធជាច្រើនជូនដល់គ្រឹះស្ថានអប់រំ និងបណ្តុះបណ្តាល ដើម្បីពង្រឹងខ្លួនបន្ថែម និងបន្តរួមចំណែកអភិវឌ្ឍគុណភាពអប់រំនៅកម្ពុជា។ ក្នុងន័យនេះយុទ្ធសាស្ត្ររបស់រាជរដ្ឋាភិបាលកម្ពុជាតាំងពីអាណត្តិមុនៗ រហូតមកដល់យុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលអាណត្តិថ្មីនេះ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជណាចក្រកម្ពុជា វិស័យអប់រំតែងតែត្រូវបានយកចិត្តទុកដាក់ ជាពិសេសការអប់រំក្នុងកម្រិតមត្តេយ្យសិក្សា៕

អត្ថបទ៖ សំអឿន