ព័ត៌មានជាតិ

ឥណ្ឌា ផ្តល់អាហារូបករណ៍ដល់និស្សិតកម្ពុជា ៤១ នាក់ ទៅបន្តការសិក្សាថ្នាក់ឧត្តម និងក្រោយឧត្តមសិក្សា នៅប្រទេសឥណ្ឌា

បានផុស

១២ ខែ មុន

នៅ

ថ្ងៃសុក្រ ១៨ កក្កដា ២០២៥

ដោយ

រដ្ឋាភិបាលឥណ្ឌា បានផ្តល់អាហារូបករណ៍ដល់និស្សិតកម្ពុជាចំនួន ៤១ នាក់ ទៅបន្តការសិក្សាថ្នាក់ឧត្តមសិក្សា និងក្រោយឧត្តមសិក្សា នៅប្រទេសឥណ្ឌា សម្រាប់ឆ្នាំសិក្សា ២០២៥–២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីប្រគល់អាហារូបករណ៍ ICCR ដល់និស្សិតកម្ពុជាចំនួន ៤១ នាក់នេះ ត្រូវបានធ្វើឡើងកាលពីពេលថ្មីៗ នេះ ដោយមានការចូលរួមពី លោកបណ្ឌិត សោម រតនា អនុរដ្ឋលេខាធិការក្រសួងអប់រំ យុវជន និងកីឡា និងលោក VANLALVAWNA BAWITLUNG ឯកអគ្គរដ្ឋទូតឥណ្ឌាប្រចាំប្រទេសកម្ពុជា នៅស្ថានទូតឥណ្ឌាប្រចាំនៅកម្ពុជា។

នាឱកាសនោះ លោកឯកអគ្គរដ្ឋទូតឥណ្ឌា បានសម្តែងការអបអរសាទរចំពោះនិស្សិតដែលត្រូវបានជ្រើសរើសឱ្យទទួលបាននូវអាហារូបករណ៍ ICCR សម្រាប់បន្តការសិក្សានៅប្រទេសឥណ្ឌា សម្រាប់ឆ្នាំសិក្សា ២០២៥-២០២៦។

ក្រុមប្រឹក្សាទំនាក់ទំនងវប្បធម៌ឥណ្ឌា (ICCR) ផ្តល់អាហារូបករណ៍សម្រាប់និស្សិតកម្ពុជាបន្តការសិក្សាថ្នាក់ឧត្តមសិក្សា និងក្រោយឧត្តមសិក្សានៅប្រទេសឥណ្ឌាជារៀងរាល់ឆ្នាំ។ អាហារូបករណ៍ដែលទទួលបានទាំងនេះ គឺជាផ្នែកមួយ នៃគំនិតផ្ដួចផ្ដើមផ្នែកការទូតវប្បធម៌ដ៏លេចធ្លោរបស់ប្រទេសឥណ្ឌា ក្នុងគោលបំណងពង្រឹងទំនាក់ទំនងផ្នែកអប់រំ និងវប្បធម៌រវាងឥណ្ឌា និងកម្ពុជា។ អាហារូបករណ៍ទាំងនេះ គ្របដណ្តប់លើថ្លៃសិក្សា ការស្នាក់នៅ និងការចំណាយលើការរស់នៅក្រោមគម្រោងផ្សេងៗ ដូចជា Quad STEM, Mekong Ganga Cooperation និងគម្រោងអាហារូបករណ៍ទូទៅ Atal Bihari Vajpayee។

លោកឯកអគ្គរដ្ឋទូត បានធ្វើការលើកទឹកចិត្តនិស្សិតទាំងអស់ឱ្យបន្តខិតខំសិក្សារៀនសូត្រ ដើម្បីក្លាយជាអ្នករួមចំណែកវិជ្ជមានដល់សង្គម និងការរីកលូតលាស់ នៃទំនាក់ទំនងរវាងប្រទេសឥណ្ឌា និងប្រទេសកម្ពុជា។

លោកបណ្ឌិត សោម រតនា បានថ្លែងអំណរគុណចំពោះរដ្ឋាភិបាលឥណ្ឌា ក្រុមប្រឹក្សាទំនាក់ទំនងវប្បធម៌ឥណ្ឌា (ICCR) ស្ថានទូតឥណ្ឌាប្រចាំប្រទេសកម្ពុជា ដែលបានបន្តគាំទ្រក្នុងការពង្រឹងធនធានមនុស្សលើវិស័យអប់រំ ស្របទៅតាមគោលដៅដែលកម្ពុជាកំពុងខិតខំឱ្យក្លាយខ្លួនជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានចំណូលខ្ពស់នៅឆ្នាំ ២០៥០។

ការផ្តល់អាហារូបករណ៍នេះ ជាឱកាសដ៏ល្អដែលនិស្សិតកម្ពុជាអាចទៅបន្តការសិក្សានៅក្រៅប្រទេស ហើយក៏ជាឱកាសដែលនិស្សិតអាចសិក្សាស្វែងយល់ពីវប្បធម៌ អរិយធម៌បន្ថែមពីក្នុង និងក្រៅតំបន់ផងដែរ។ លើសពីនេះ ការផ្តល់អាហារូបករណ៍នេះ បានឆ្លុះបញ្ចាំងពីគោលដៅរួម នៃកំណើនកិច្ចសហប្រតិបត្តិការក្នុងតំបន់ និងការផ្លាស់ប្ដូរវប្បធម៌របស់ប្រទេសទាំងពីរ៕

អត្ថបទ ៖ សំអឿន