ក្នុងទិវាអន្តរជាតិក្មេងស្រី ក្រសួងកិច្ចការនារី និងដៃគូរៀបចំកម្មវិធីរត់ ដើម្បីក្មេងស្រីនៅកោះពេជ្រ ខែក្រោយនេះ

ក្រសួងកិច្ចការនារី សហការជាមួយអង្គការភ្លែនអន្តរជាតិ និងក្រុមហ៊ុនកូកាកូឡា នឹងរៀបចំកម្មវិធីរត់ដើម្បីក្មេងស្រី ដើម្បីទាំងអស់គ្នា (Run for Girl Run for All) ដែលធ្វើឡើងថ្ងៃទី៨ ខែតុលា ឆ្នាំ២០២៣ នៅទីក្រុងកោះពេជ្រ ម៉ោង ៥៖ ៣០នាទីព្រឹក ក្រោមប្រធានបទ៖ ការលើកកម្ពស់ភាពជាអ្នកដឹកនាំរបស់ក្មេងស្រីក្នុងយុគសម័យឌីជីថល។ នេះបើតាមការផ្សព្វផ្សាយរបស់ក្រសួងកិច្ចការនារីតាមបណ្តាញសង្គមនៅថ្ងៃទី ១៩ ខែកញ្ញា ឆ្នាំ២០២៣ នេះ។

កម្មវិធីនេះ ធ្វើឡើងក្នុងគោលបំណងរត់ ដើម្បីគុណតម្លៃនៃការយកចិត្តទុកដាក់លើការលើកកម្ពស់សមភាព ក្នុងការចូលរួមរបស់ក្មេងស្រី នៅក្នុងការអភិវឌ្ឍលើគ្រប់វិស័យ រួមទាំង វិស័យឌីជីថល និងភាពជាអ្នកដឹកនាំរបស់ពួកគេ។ ទន្ទឹមនោះ ក៏ចង់រំលេចពីគុណតម្លៃនៃសិទ្ធិ សក្តានុពល និងកាលានុវត្តភាពរបស់ក្មេងស្រី ក្នុងការចូលរួមក្នុងវិស័យឌីជីថល និងការធ្វសេចក្តីសម្រេច ដើម្បីធ្វើឱ្យគុណភាពជីវិតរបស់ពួកគេកាន់តែប្រសើរឡើង។

ក្នុងកម្មវិធីនេះ មិនមែនមានតែរត់ប៉ុណ្ណោះទេ ក៏មានការលេងហ្គេមយករង្វាន់ និងការផ្តល់ប្រឹក្សាសម្រាប់ការសិក្សាមុខវិជ្ជាធីជីថលសម្រាប់អ្នកចូលរួមផងដែរ។ កម្មវិធីនេះ គឺតម្រូវឱ្យមានការចុះឈ្មោះទុកជាមុន ហើយសំបុត្រផ្តល់ជូនឥតគិតប្រាក់សម្រាប់តែ ២០០នាក់ដំបូងប៉ុណ្ណោះ ហើយផុតកំណត់ចុះឈ្មោះថ្ងៃទី០១ ខែតុលា ឆ្នាំ២០២៣។ កម្មវិធីនេះ គឺធ្វើនៅទីក្រុងកោះពេជ្រ រត់ចម្ងាយ៥គីឡូម៉ែត្រ។

សម្រាប់អ្នកដែលមានចំណាប់អារម្មណ៍ អាចចុះឈ្មោះតាមរយៈតំណភ្ជាប់នេះ https://docs.google.com/…/1FAIpQLSejZ1XhjJpKz0…/viewform ៕