នាយ ព្រីង ក្រុមកំប្លែង​នាយកុយ​ធ្លាក់ខ្លួនឈឺ ជីវភាពក៍ខ្វះខាត

ភ្នំពេញ៖ តារាកំប្លែងជើងចាស់ស្ថិតក្នុងក្រុមនាយ កុយ គឺនាយ ព្រីងទុំ បន្ទាប់ពីឃ្លាតឆ្ងាយពីវិថីសិល្ប:យូរឆ្នាំ ស្រាប់តែឮដំណឹងថាបានធ្លាក់ឈឺជំងឺរ៉ាំរ៉ៃជាច្រើនមុខនិងជួបការខ្វះខាតខ្លាំង។

ប្រភពបានបញ្ជាក់ថា អតីតតារាកំប្លែងនាយព្រីង បច្ចុប្បន្នមិនត្រឹមតែមានការរួមរឹតដោយសារជំងឺប្រចាំកាយ​ច្រើនមុខនោះទេគឺនាយ ព្រីងទុំ ក៏មានការលំបាក​លើជីវភាព ខណ:ពេលខ្លះអ្នកសិល្ប:ជើងចាស់រូបនេះគ្មានលុយដើររើសក្តាមខ្យង​យក​មក​ហូបផងដែរ។

តាមរយ:កិច្ចសម្ភាសន៍នាយ ព្រីងបានរៀបរាប់ខ្សែជីវិតកម្សត់សព្វថ្ងៃថា បានធ្លាក់ខ្លួនឈឺគឺមានរយ:ពេល៤ឬ៥ឆ្នាំហើយដោយមានជំងឺដូចជា,ទឹកនោមផ្អែម, លើសឈាម ,បេះដូង ,ឡើងជាតិអាស៊ីតនិងសន្លាក់ដៃជើងជាដើម។ លោកថាដោយសារតែជំងឺប្រចាំកាយច្រើនមុខនេះហើយ ទើបបាត់មុខពីសិល្ប:។

ស្ថិតក្នុងវ័យ៦១ឆ្នាំ តារាកំប្លែងលោកងែតជី ហៅនាយ ព្រីងទុំ កំពុងជួបការលំបាកខ្លាំង​លើ​ជីវភាពគ្រួសារ ខណ:ភរិយាក៏បានទទួលមរណភាពដោយសារជំងឺច្រើនមុខដូចជា, លើសឈាមនិងខូចក្រលៀនផងដែរ។ បច្ចុប្បន្នលោក​ក៏ត្រូវចិញ្ចឹម​កូនប្រុសម្នាក់ដែលមានសតិមិនសូវល្អផងដែរ៕

អត្ថបទ៖ ចាន់រ៉ា