ព័ត៌មានជាតិ

អភិបាលខេត្តកំពង់ឆ្នាំង៖ ប្រជាពលរដ្ឋដែលបានប្តូរមកឱ្យនៅលើគោក លែងចង់ចុះទឹកវិញ

បានផុស

៤ years មុន

នៅ

ថ្ងៃអង្គារ ២៥ មករា ២០២២

ដោយ

លោក ស៊ុន សុវណ្ណារិទ្ធិ អភិបាល នៃគណៈអភិបាលខេត្តកំពង់ឆ្នាំង បានអះអាងថា ការផ្លាស់ប្តូរលំនៅដ្ឋានរបស់ប្រជាពលរដ្ឋ ពីក្នុងទឹកមកលើគោក ធ្វើឡើងដោយគោលការណ៍ស្ម័គ្រចិត្ត និងម្ចាស់ការ ហើយមកដល់ពេលនេះ ពួកគាត់លែងចង់ចុះទឹកវិញហើយ ដោយសារតែនៅលើគោកផ្តល់ភាពងាយស្រួលជាងនៅក្នុងទឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងនេះ ធ្វើឡើងនៅក្នុងសន្និសីទសារព័ត៌មាន ស្ដីពី “វឌ្ឍនភាពមូលដ្ឋានឃុំ សង្កាត់ និងទិសដៅការងារបន្ដ របស់រដ្ឋបាលខេត្តកំពង់ឆ្នាំង” ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល នាព្រឹកថ្ងៃទី ២៥ ខែមករា ឆ្នាំ ២០២២។

លោក ស៊ុន សុវណ្ណារិទ្ធិ មានប្រសាសន៍ថា ការផ្លាស់ប្ដូរប្រជាពលរដ្ឋពីក្នុងទឹកឡើងលើគោគ សម្រាប់ប្រជាពលរដ្ឋខ្មែរ តាមគោលការណ៍រាជរដ្ឋាភិបាល គឺបែងចែកផ្ដល់ដី ដែលមានប្រជាពលរដ្ឋទាំងខ្មែរ វៀតណាម និងឥស្លាម។ ជំនាញរបស់គាត់មានតែមួយ គឺការចិញ្ចឹមត្រី ប៉ុន្តែនៅពេលមករស់នៅលើគោក អាជ្ញាធរក៏នៅតែរក្សាជំនាញរបស់គាត់ គឺការចិញ្ចឹមត្រីនេះដដែល គ្រាន់តែតាមផែនការរបស់អាជ្ញាធរ ត្រូវធ្វើឱ្យការចិញ្ចឹមត្រីរបស់គាត់មានទិន្នផលខ្ពស់ ហើយរយៈពេលខ្លីជាងមុន និងមិនប៉ះពាល់បរិស្ថាន។

លោក ស៊ុន សុវណ្ណារិទ្ធិ បញ្ជាក់ដែរថា ដើម្បីឱ្យពួកគាត់មានជំនាញបន្ថែម អាជ្ញាធរមានគម្រោងសហការជាមួយជំនាញ ដើម្បីបណ្ដុះបណ្ដាលពួកគាត់ ដោយត្រូវសាងសង់សាលាបណ្ដុះបណ្ដាលវិជ្ជាជីវៈនៅទីនោះ ប៉ុន្តែត្រូវស្ទះដោយសារតែវិបត្តិកូវីដ-១៩។ លោកបានបញ្ជាក់បន្ថែមថា មកដល់ពេលនេះ បើទោះបីជាមិនទាន់បានបណ្ដុះបណ្ដាលក៏ដោយ ក៏ពួកគាត់ចេះលក់កាហ្វេ ចេះបើកភោជនីយដ្ឋាន លក់គ្រឿងទេស លក់សំភារៈផ្សេងៗជាដើម ហើយពេលនេះបើចង់ឱ្យពួកគាត់ចុះទៅក្នុងទៅវិញ ក៏ពួកគាត់មិនទៅដែរ ដោយសារតែនៅលើគោក គាត់ដើរបានឆ្ងាយ ទៅណាមកណាស្រួលជាងនៅក្នុងទឹក បូករួមទាំងការទៅសាលារបស់កូនៗ ទៅផ្សារ ដើរលេង ជិះម៉ូតូ ជិះឡាន តាមត្រូវការ និងទៅមន្ទីរពេទ្យជាដើម ហើយពួកគាត់ក៏អាចប្រកបរបរផ្សេងៗទៀតក្រៅពីចិញ្ចឹមត្រី។

ក្នុងនាមអាជ្ញាធរខេត្ត លោក ស៊ិន សុវណ្ណារិទ្ធ បានអះអាងថា ការចាកចេញ ឬការផ្លាស់ប្តូរលំនៅដ្ឋានរបស់ប្រជាពលរដ្ឋទាំងអស់នោះ គឺគាត់ស្ម័គ្រចិត្តចាកចេញ ដោយមិនមានការបង្ខិតបង្ខំ ហើយពួកគាត់ម្ចាស់ការក្នុងការផ្លាស់ប្ដូរទីលំនៅខ្លួនឯងផងដែរ ហើយផលដែលពួកគាត់ទទួលបានច្រើនជាងមុន គឺកូនគាត់ទៅរៀនដោយមិនបាច់ជិៈទូក មិនប្រឈមលិចទឹក មិនប្រឈមខ្យល់ព្យុះ នឹងមិនស្ទះចរាចរណ៍កំប្លោក។

គួររំលឹកថា ផ្ទះបណ្តែតទឹករាប់ពាន់ខ្នង ដែលរស់នៅលើដងទន្លេផ្សារក្រោម ក្នុងខេត្តកំពង់ឆ្នាំង ត្រូវបានគេពិនិត្យឃើញថា បានបង្កឱ្យមានផលបះពាល់ធ្ងន់ធ្ងរដល់បិរស្ថាន និងស្ទះចរាចរណ៍ផ្លូវទឹក នៅពេលដែលទឹកទន្លេកំពុងរីងរាក់ និងផ្លូវរួមតូច ហើយក៏ធ្វើឱ្យបះពាល់ការចរាចរណ៍មច្ឆាជាតិ និងធ្វើឱ្យបាត់បង់សណ្តាប់ធ្នាប់ សោភណ្ឌ័ភាព បះពាល់លើវិស័យទេសចរណ៍ជាតិ៕

អត្ថបទ៖ កោះកែវ