​​ផ្លូវ​កៅស៊ូ និង​បេតុង​ប្រវែង​ ៤១ គីឡូម៉ែត្រ បើកការដ្ឋាន​​សាងសង់​តភ្ជាប់​តំបន់​ទេសចរណ៍ ៣ កន្លែង ​ក្នុង​ខេត្ត​កំពង់ឆ្នាំង

ក្រោម​ក្របខ័ណ្ឌគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) ផ្លូវជនបទក្រាល​ដោយ​កៅស៊ូ​ពីរជាន់ (DBST) និងក្រាលបេតុងចំនួន ៣ ខ្សែ ប្រវែងសរុប ៤១,១០ គីឡូម៉ែត្រ បានប្រកាស​បើក​ការដ្ឋាន​សាង​សង់​ ដើម្បីតភ្ជាប់តំបន់រមណីយដ្ឋានទឹកធ្លាក់ថ្មក្រាល រមណីយដ្ឋានទឹកធ្លាក់ស្រែអំពិល និងរមណីដ្ឋានអន្លង់ស្វាយ ស្ថិតនៅស្រុកទឹកផុស ខេត្តកំពង់ឆ្នាំង។

ពីធីបើកការដ្ឋានសាងសង់ផ្លូវជនបទ​ក្រាលកៅស៊ូពីរជាន់ (DBST) និងក្រាលបេតុងចំនួន ៣ ខ្សែ ប្រវែងសរុប ៤១,១០ គីឡូម៉ែត្រនេះ បាន​ធ្វើឡើង​កាលពី​ព្រឹក​ថ្ងៃទី ៣០ ខែមិថុនា ឆ្នាំ២០២៥ ក្រោម​វត្តមាន​លោក ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ លោក ហួត ហាក់ រដ្ឋមន្ដ្រីក្រសួងទេសចរណ៍ ​រួមទាំង​វត្តមាន​ប្រធាន​ក្រុម​ប្រឹក្សាខេត្ត​ និង​​អភិបាល​ខេត្តកំពង់ឆ្នាំង។

លោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ​មើលឃើញ​ថា តាមរយៈ​ការ​បើកការដ្ឋាន​សាងសង់ផ្លូវជនបទប្រវែងសរុប ៤១,១០ គ.ម នាពេលនេះ នឹងផ្តល់​ផលប្រយោជន៍ដល់ប្រជាជនចំនួន ៦៨៨២ គ្រួសារ ស្មើនឹង ២៨ ៥៩៨​នាក់ រស់នៅក្នុងភូមិចំនួន ១២ ឃុំចំនួន ៤ គឺ ឃុំក្តុលសែនជ័យ ខ្លុងពពក ជៀប និងឃុំក្បាលទឹក នៃស្រុកទឹកផុស ខេត្តកំពង់ឆ្នាំង ហើយក៏​នឹង​ជួយជំរុញកំណើនភ្ញៀវទេសចរចូលមកទស្សនាកម្សាន្តនៅតំបន់សហគមន៍អេកូទេសចណ៍ទាំង ៣ ដែលជាការអភិវឌ្ឍសេដ្ឋកិច្ចនៅតំបន់ទេសចរណ៍ធម្មជាតិ ឱ្យកាន់តែរីកចម្រើនថែមទៀត។

លោក​រដ្ឋមន្រ្តី​បានលើកឡើង​ពី​កិច្ចសហការជាមួយក្រសួងទេសចរណ៍ ក្នុងការចូលរួមតភ្ជាប់និងលើកកម្រិតផ្លូវជនបទទៅ​ដល់​តំបន់គោលដៅទេសចរណ៍ ដើម្បីចូលរួមលើកស្ទួយវិស័យទេសចរណ៍ឱ្យក្លាយជាឆ្អឹងខ្នងនៃសេដ្ឋកិច្ចជាតិ។

បើតាមរដ្ឋមន្រ្តីក្រសួងអភិវឌ្ឍន៍​ជនបទ បច្ចុប្បន្ននេះផ្លូវជនបទនៅទូទាំងប្រទេសមានប្រវែងសរុបជាង ៥ ម៉ឺនគ.ម ដោយក្នុងនោះផ្លូវក្រាលកៅស៊ូនិងបេតុង ដែលធន់នឹងការប្រែប្រួលអាកាសធាតុ និងអាចប្រើប្រាស់បានគ្រប់រដូវកាល មានប្រវែង ៨ ៥២៧ គ.ម ស្មើប្រមាណ ជិត ២០%ប៉ុណ្ណោះ។

លោក ហួត ហាក់ រដ្ឋមន្ត្រីក្រសួងទេសចរណ៍បានថ្លែងបញ្ជាក់ថា ការគាំទ្រ​ហេដ្ឋារចនាសម្ព័ន្ធរូបវន្តមានសារៈសំខាន់ណាស់ ដើម្បី​ជួយសម្រួលដល់ការធ្វើដំណើររបស់ប្រជាពលរដ្ឋផង និងជំរុញការទាក់ទាញភ្ញៀវទេសចរជាតិ និងអន្តរជាតិ ឱ្យកាន់តែច្រើន​ផង​ដែរ។

លោក សួស គង់ រដ្ឋលេខាធិការ និងជានាយកគម្រោង CSLEP បានធ្វើរបាយការណ៍បញ្ជាក់ថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា មានរយៈពេល ៨ ឆ្នាំ ដោយគិតចាប់ពីថ្ងៃទី១៧ ខែតុលា ឆ្នាំ២០១៩ រហូត ដល់ថ្ងៃទី៣១ ខែធ្នូ ឆ្នាំ២០២៧ ក្រោមហិរញ្ញប្បទានកិច្ចសហប្រតិបត្តិការរបស់រាជរដ្ឋាភិបាលកម្ពុជា, មូលនិធិបរិស្ថានសកល និងធនាគារពិភពលោកក្នុងគោលបំណងគ្រប់គ្រងតំបន់ការពារធម្មជាតិ ការអភិវឌ្ឍទេសចរណ៍ធម្មជាតិ និងខ្សែច្រវ៉ាក់តម្លៃអនុផលព្រៃឈើ ដោយក្រសួងអភិវឌ្ឍន៍ជនបទ ទទួលការងារ​សាងសង់​ផ្លូវជនបទក្រាលកៅស៊ូពីរជាន់ (DBST) និងផ្លូវក្រាលបេតុង សរុបប្រវែងប្រមាណ ១០០ គីឡូម៉ែត្រ ដើម្បីតភ្ជាប់គោលដៅទេសចរណ៍ក្នុងតំបន់ការពារធម្មជាតិ និងការសាងសង់ប្រព័ន្ធទឹកស្អាត និងបង្គន់អនាម័យដល់សហគមន៍អេកូទេសចរណ៍ នៅក្នុងខេត្តគោលដៅចំនួន ៦ គឺ ខេត្តកំពង់ស្ពឺ កំពង់ឆ្នាំង សៀមរាប ពោធិ៍សាត់ កោះកុង និងខេត្តបាត់ដំបង៕