ទង់ជាតិ ៧៥ ប្រទេស​ នៅមុខព្រះបរមរាជវាំង​ អបអរ​កិច្ច​ប្រជុំកំពូល​អាស៊ាន​ កម្ពុជា​ ជា​ម្ចាស់​ផ្ទះ

ភ្នំពេញ៖ រយៈ​ពេល​ជា​ច្រើន​ឆ្នាំ​កន្លង​មកហេីយ​ដែល​ព្រះ​រាជា​ណាចក្រ​កម្ពុជា​​ បានចងទង់ជាតិនៃបណ្តាប្រទេសជាមិត្តនានា ​នៅសួនច្បារមាត់ទន្លេមុខព្រះបរមរាជវាំង​ ដេីម្បីបង្ហាញជាចំណង​មិត្តភាព​ និង​ជួយ​លេីកកម្ពស់​សោភណ្ឌ​ភាព​រាជធានីភ្នំពេញ​។​ នៅពេលនេះ គេសង្កេតឃេីញទង់ជាតិជាច្រេីន​ប្រទេស​ត្រូវ​បាន​ចង ​និង​បង្ហូត​ឡើង​លេីជាថ្មីម្តងទៀតនៅ​លេីសួនច្បារ​ស្របមាត់ទន្លេ​មុខ​ព្រះ​បរមរាជវាំង​ ចាប់​ពី​សាលសន្និសីទ​ចតុមុខ​ រហូត​ដល់​រូប​សំណាក​ តេជោ​មាស​ និង​តេជោយ៉ត​ រួមជាមួយការតុបតែងលម្អទាំងសួនច្បារ​ និងភ្លេីងពណ៌ផ្សេងៗទៀត​​។

មន្ត្រី​រដ្ឋបាល​រាជធានីភ្នំពេញ​ បានឱ្យ​​ដឹង​នៅ​ថ្ងៃ​ទី​២១ ខែ​មីនា​នេះថា​ ដោយ​មាន​ការ​ណែនាំ​ពី​អភិបាល​រាជ​ធានី​ភ្នំពេញ​ កាលថ្ងៃទី១៩ ខែមីនា ឆ្នាំ២០២២ រដ្ឋបាលរាជធានីភ្នំពេញបានរៀបចំដាក់បង្ហាញទង់ជាតិតំណាង​ ប្រទេសជាមិត្តនានាចំនួន ៧៥ ប្រទេស ពីទ្វីបអាស៊ី ទ្វីបអឺរ៉ុប ទ្វីបអាមេរិកខាងជើង ខាងត្រូង ទ្វីបអាហ្វ្រិក ទ្វីបអូសេអានី ជាដើម។ ទង់ជាតិទាំងនោះត្រូវបានដាក់នៅសួនច្បារមាត់ទន្លេ បន្ទាប់ពីបានផ្លាស់ប្តូរមួយរយៈ ដើម្បីដាក់ជំនួសដោយទង់អាស៊ានក្នុងអំឡុងពេលកម្ពុជាធ្វេីជាម្ចាស់ផ្ទះទទួលរៀបចំកិច្ចប្រជុំអាស៊ាននាពេលខាងមុខ។

គួររំលឹកថា​ រយៈពេលជាង ៤០ ឆ្នាំកន្លងមកនេះ​ ផ្តើមចេញពីនយោបាយ​ឈ្នះ​ឈ្នះ​ ដែល​ដឹកនាំ​ដោយ​ សម្តេច​អគ្គ​មហា​សេនាបតី​តេជោ​ ហ៊ុន​ សែន ​បានធ្វេីឱ្យ​ប្រជាជនកម្ពុជាសម្រេចនូវការផ្លាស់ប្តូរសង្គមយ៉ាងធំធេង ដែលនឹកស្មានដល់។​ កម្ពុជាបានប្រែក្លាយពីវាលពិឃាដនៃរបបប្រល័យពូជសាសន៍, ពីសមរភូមិនៃសង្គ្រាមដ៏រាំរ៉ៃ ពីការបែកបាក់ជាតិ និងការបែងចែកទឹកដី ក្លាយជាប្រជាជាតិមួយដែលមានសុខសន្តិភាព សេរីភាព ឯកភាព ស្ថេរភាព និងអភិវឌ្ឍន៍លើគ្រប់វិស័យ៕

អត្ថបទ៖ ស្រីរ័ត្ន