អូត្រែល​ធ្លាប់តែឆ្លងទូក ​ឥឡូវ​ស្ពានថ្មលេចឡើង​ត្រដែត​ បញ្ចប់​អាជីពរត់ទូកដ​ ពលរដ្ឋមានសុវត្ថិភាព

ដៃព្រែកដងទន្លេមេគង្គអូត្រែល​ដែលជួបហានិភ័យខ្ពស់​សម្រាប់សិស្សានុសិស្ស​រួមនិងប្រជាពលរដ្ឋ​ឆ្លងកាត់នៅរដូវទឹកឡើង​តាមទូកដ នៅក្នុងភូមិអូរត្រែល ឃុំថាឡា ស្រុកថាឡាបរិវ៉ាត់ ត្រូវបានអាជ្ញាធរខេត្ត ស្ថាបនាស្ពានបេតុង​ថ្មីជំនួសវិញ។ 

​លោកហាំ ម៉ុល អ្នកបច្ចេកទេសសាងសង់ស្ពានបានបញ្ជាក់ថា៖ ក្រុមការងារកំពុងពន្លឿន​ការស្ថាបនាស្ពាននេះ​ឱ្យហើយនៅចុងខែមិថុនាខាងមុខនេះ ដើម្បីឲ្យប្រជាពលរដ្ឋធ្វើដំណើរឆ្លងកាត់ទៅមកបានងាយស្រួល​ពីភូមិឃុំ​មួយទៅភូមិឃុំមួយទៀតដោយមិនចាច់ឆ្លងទូកដូចពីមុននោះទេ។

​លោកបន្តថា៖ គិតមកដល់ថ្ងៃ ៨ មិថុនានេះក្រុមបច្ចេកទេសសម្រចការស្ថាបនាបាន៩៥%ហើយ ចំណែកការ​ងារ​នៅ​សេសសល់ ដូចជាបង្កាន់ដៃស្ពាន-ការចាក់សាប់ជម្រាលក្បាលស្ពានទាំងសងខាង-និងការរៀប​ចំរចនា​បទ​ផ្សេងៗ ដើម្បីតុបតែងលំអរ និងធ្វើឱ្យហើយនៅចុងខែមិថុនានេះតែម្តង។

​លោកសេកសំអុលប្រជាពលរដ្ឋនៅភូមិអូរត្រែលឃុំថាឡាបរិវ៉ាត់ ​បានទទួលស្គាល់ថា៖ នៅពេលមាន​ស្ពានឆ្លង​កាត់ ប្រជាពលរដ្ឋយើងងាយស្រួលក្នុងការដឹកកសិផលចេញចួល កូនចៅទៅសាលារៀន បានទាន់ពេលវេលា​នឹងមិនភ័យព្រួយពីការឆ្លងទូកដរជួបហានិភ័យទៀតនោះទេ។

​លោកបន្តថា៖​នេះជាការយកចិត្តទុកដាក់របស់រាជរដ្ឋាភិបាល ​ជាពិសេសថ្នាក់ដឹកនាំខេត្ត ស្រុក ​បានគិតគូរ​ដោះស្រាយ​ភាពលំបាកជូនប្រជាពលរដ្ឋទោះបីយូរកន្លងមកមិនបានធ្វើ  តែឥឡូវនេះទទួល​បានសមិទ្ធផល​ថ្មីស្រួលធ្វើចរាចរណ៍ទៅមក ​បើគេធ្វើឯកជនគេយកលុយពេលចុះឡើងឥឡូវនេះយើងអត់ពិបាកទេវាស្រួលសប្បាយចិត្តពីមុនមកពិបាកណាស់កូនចៅទៅរៀនខកខានពេលទឹកជនមួយថ្ងៃ២ថ្ងៃសិស្សអត់បានទៅរៀនឥឡូវស្រួលហើយបានអំណោយរាជរដ្ឋាភិបាលបានជួយប្រជាពលរដ្ឋយើងខ្ញុំទាំងអស់គ្នា។

​សូមបញ្ជាក់ថា៖ ស្ពានបេតុងថ្នីនេះមានប្រវែង៩០ម៉ែត្រ ទទឹង៨ម៉ែត្រ ​តភ្ជាប់គ្នាផ្លូវគ្រួសក្រហមទៅឃុំចំនូន៣​ មានឃុំអូររៃ -ឃុំកាំងចាមទៅឃុំសៀមបូករហូតដល់ព្រំប្រទល់ទឹកដីខេត្តក្រចេះ​ នឹងមួយផ្នែកទៀត​តភ្ជាប់ទៅ​ឃុំថា​ឡាបរិវ៉ាត់ មកទីរួមស្រុកតាមផ្លូវបេតុងក្នុងចំងាយផ្លួវប្រវែងជាង៥គីឡូម៉ែត្រទើបសាងសង់ថ្មី ដែលបានផ្តល់​ផលប្រយោជន៍សំខាន់សម្រាប់ប្រជាពលរដ្ឋដឹកផលកសិកម្មនិងទំនិញផ្សេងៗយកទៅដោះដូរនៅទីផ្សាររួមខេត្តស្ទឹងត្រែងជាលក្ខណៈសេដ្ឋកិច្ចគ្រូសារផងដែរ៕

អត្ថបទ៖ ងិនលីម