លោក សុខ រ៉ាដែន ៖ កសិដ្ឋានចិញ្ចឹមត្រីធំៗពីរ​ផ្អាកដំណើរការព្រោះខ្វះទីផ្សារលក់ចេញ

កសិដ្ឋានចិញ្ចឹមត្រីធំៗចំនួនពីរ នៅស្រុកកំពង់ថ្ម ខេត្តកំពង់ធំ បានផ្អាកដំណើរការចិញ្ចឹម ដោយសារខ្វះទីផ្សារ ខណៈដែលតម្លៃចំណីឡើងថ្លៃខ្ពស់។  

លោក សុខ រ៉ាដែន ប្រធានក្រុមប្រឹក្សាសមាគមវារីវប្បករកម្ពុជា បានថ្លែងប្រាប់កម្ពុជាថ្មីថា ការចិញ្ចឹមត្រីបច្ចុប្បន្នមាន​ការរអាក់រអូលច្រើន ទីផ្សារចង្អៀត និងចំណីឡើងថ្លៃ នាំឱ្យអ្នកចិញ្ចឹមបោះបង់ជាបន្តបន្ទាប់ និងអ្នកខ្លះក៏កាត់បន្ថយ​ការចិញ្ចឹមជាដើម។

លោកបន្តដូច្នេះថា «វត្ថុធាតុដើមមានតម្លៃខ្ពស់ ទីផ្សារទាប ធ្វើឱ្យសង្វាក់ផលិតកម្មនៃការផលិតរអាក់រអួល កសិករកាត់បន្ថយការចិញ្ចឹមច្រើន អ្នកខ្លះទៀត ក៏ឈប់ចិញ្ចឹមជាដើម។ ជាក់ស្តែងកសិដ្ឋានចិញ្ចឹមត្រីធំៗចំនួនពីរទី​តាំងសរុប​លើផ្ទៃដីមានទំហំជាង ១០០ហិកតា នៅស្ទឹងជីនិត ស្រុកកំពង់ថ្ម បានផ្អាកការចិញ្ចឹម ដោយសារ​បញ្ហាខ្វះទីផ្សារនេះ»។

លោកបានបន្ថែមថា កសិករ មានការត្អូញត្អែរអំពីចំនួននៃការទិញធ្លាក់ចុះ ដោយសារការហូរចូលត្រីពីក្រៅប្រទេស ដែលមានតម្លៃធូរថ្លៃ បង្កជាវិបត្តិដល់អ្នកចិញ្ចឹមក្នុងស្រុក។

ប្រធានសមាគមរូបនេះ បានគូសបញ្ជាក់ថា ដើម្បីឱ្យវិស័យចិញ្ចឹមត្រី ក្នុងស្រុករីកចម្រើន, ទី១ ត្រូវផលិតពូជខ្លួនឯង, ទី២ ទាក់ទាញអ្នកវិនិយោគឱ្យមកផលិតចំណីនៅក្នុងស្រុក, ទី៣ ប្រព័ន្ធហេដ្ឋារចនាសម្ព័ន្ធទឹក ត្រូវរៀបចំឱ្យបានត្រឹមត្រូវ ពិសេសភ្លើងគួរបញ្ចុះតម្លៃ និងត្រូវត្រួតពិនិត្យពន្ធនាំចូល ឱ្យបានច្បាស់លាស់ ជាពិសេសលើគុណភាព ទើបយើងអាច​ប្រកួត​ប្រជែងទីផ្សារបាន។ លោកសង្កត់ធ្ងន់ថា ត្រីនាំចូលគឺមិនសូវមានគុណភាពល្អនោះទេ ពោលគឺសម្បកក្រៅមើល​ទៅដូចគ្នា តែសាច់ខាងក្នុងអាចមានសាធាតុថ្នាំហាមឃាត់ និងមេរោគ​ បង្កផលប៉ះពាល់សុខភាពដល់អ្នកបរិភោគ។

ដោយឡែក ការចិញ្ចឹមក្នុងស្រុក គឺមានគុណភាពស្តង់ដារច្បាស់លាស់ និងសុវត្ថិភាពខ្ពស់។ លោកថា ការចិញ្ចឹមក្នុង​ស្រុក គឺមិនមានសារធាតុអ័រម៉ូន ដែលបង្កឱ្យប៉ះពាល់ដល់សុខភាពអ្នកទទួលទានឡើយ។

ពាក់ព័ន្ធនឹងបញ្ហាទីផ្សារនេះ កសិករ ចាប់ផ្តើមបាក់ទឹកចិត្តក្នុងការចិញ្ចឹម ដោយសារ មិនមានការត្រូតពិនិត្យការនាំចូល ពិបាកក្នុងការប្រកួតប្រជែងលើតម្លៃ ប្រមូលផលបានខ្វះទីផ្សារ អស់ដើមទុនសម្រាប់ចិញ្ចឹមបន្តទៀត។​

បើតាមលោក សុខ រ៉ាដែន វារីវប្បករនៅកម្ពុជា អាចចិញ្ចឹមត្រីមានគុណភាពល្អ ផ្គត់ផ្គង់ទីផ្សារក្នុងស្រុក បាន១០០ភាគរយ និងអាចសល់ត្រីសម្រាប់នាំចេញទៀតផង ប្រសិនបើមានការទប់ស្កាត់ការនាំចូលបានទាំងស្រុង។

បច្ចុប្បន្ន វារីវប្បករក្នុងស្រុកភាគច្រើន មានចិញ្ចឹមត្រី ដូចជា ត្រីប្រា ត្រីអណ្តែង ត្រីក្រាញ់ ត្រីឆ្ពិន ត្រីពោ ត្រីទីឡាបព្យា​ជាដើម។ ចំណែកតម្លៃត្រីប្រាទិញចេញពីកន្លែងចិញ្ចឹម ១គីឡូ ៤១០០រៀល និងត្រីដទៃទៀត មានតម្លៃប្រហាក់ប្រហែល​គ្នានេះដែរ៕