អង្គការ UNIDO ផ្ដល់ការគាំទ្រផ្នែកហិរញ្ញវត្ថុ និងបច្ចេកទេស ដល់អ្នកចិញ្ចឹមត្រីកម្ពុជា

ភ្នំពេញ៖ អង្គការសហប្រជាជាតិសម្រាប់ការអភិវឌ្ឍឧស្សាហកម្ម (UNIDO) សហការជាមួយក្រសួងកសិកម្មបានផ្ដល់ការគាំទ្រផ្នែកហិរញ្ញវត្ថុដល់សហគ្រិនកម្ពុជា ផ្នែកសេវាកម្ម​មានឈ្មោះថា “ការវិនិយោគខ្សែសង្វាក់” ដែលអាចផ្តល់ឱ្យវារីវប្បករកម្ពុជាអាចទទួលបានការគាំទ្រជាទឹកប្រាក់ចន្លោះពី ២,៥ម៉ឺន ទៅ ១០ ម៉ឺនដុល្លារអាមេរិក ចំពោះសហគ្រាសតូចមធ្យម និងធំនៅកម្ពុជា។

លោក ចៅ សួស្តី នាយកប្រតិបត្តិនិងជាអ្នកគ្រប់គ្រងកសិដ្ឋាន CAMBODIA FRESH FARM (RAINBOW PROGRESS ENTERPRISE CO.LTD) បានថ្លែងឱ្យដឹងនៅថ្ងៃទី០៤​ ខែសីហានេះថា ការផ្ដល់ជំនួយបដិភាគថ្មីៗរបស់អង្គការសហប្រជាជាតិសម្រាប់ការអភិវឌ្ឍឧស្សាហកម្ម គឺជាការលើកទឹកចិត្តដល់វារីវប្បករក្នុងប្រទេសកម្ពុជាឱ្យមានផ្លូវដើរថ្មីក្នុងបរិបទកូវីដ-១៩។

លោក ចៅ សួស្តី បានបន្ថែមថា សម្រាប់ការចិញ្ចឹមត្រីនៅលើទីផ្សារបច្ចុប្បន្នប្រឈមនឹងការបាត់បង់ចំណូលខ្ពស់ ក៏ប៉ុន្តែកម្មវិធី “ការវិនិយោគខ្សែសង្វាក់” នឹងធ្វើឱ្យប្រសើរឡើងនូវលទ្ធផលមួយស្របតាមស្តង់ដាររបស់អង្គការសហប្រជាជាតិសម្រាប់ការអភិវឌ្ឍឧស្សាហកម្ម។

លោក ចៅ សួស្តី បានឱ្យដឹងថា សម្រាប់ការគាំទ្ររបស់អង្គការ គឺផ្តល់ឱ្យវារីវប្បករអាចទទួលបានថវិកាបដិភាគចំនួន៧០ភាគរយ មានតម្លៃទឹកប្រាក់ចំនួន ២៥,០០០ ដុល្លារអាមេរិក ចំពោះការកែច្នៃខ្នាតតូច ចំពោះខ្នាតមធ្យម និងធំមានទឹកប្រាក់បដិភាគចំនួន ៥០ភាគរយ គឺមានទឹកប្រាក់រហូតដល់ ១0 ម៉ឺនដុល្លារអាមេរិក។

លោក ចៅ សួស្តី​ បានបន្តថា ការគាំទ្ររបស់អង្គការសហប្រជាជាតិសម្រាប់ការអភិវឌ្ឍឧស្សាហកម្មគឺចង់ជំរុញឱ្យវារីវប្បករកម្ពុជាចិញ្ជឹមត្រី ហើយមិនមែនដើម្បីតែលក់នៅលើទីផ្សារនោះទេ គឺត្រូវចេះកែច្នៃផលត្រីរបស់ខ្លួនផងដែរដើម្បីលក់បានតម្លៃខ្ពស់។

លោក ចៅ សួស្តី មានប្រសាសន៍ថា ជាធម្មតាការចិញ្ចឹមត្រីនៅក្នុងប្រទេសកម្ពុជា បើសិនជាវារីវប្បករចិញ្ចឹមត្រីគ្រាន់តែលក់នៅទីផ្សារផ្ទាល់ នឹងមានការខាត បង់ច្រើនណាស់។ ហេតុដូចនេះហើយទើបមានការបង្កើតគម្រោងនេះឡើងដើម្បីជួយដល់វារីវប្បករខ្មែរ។ នៅពេលគម្រោងនេះកើតឡើងវានឹងធ្វើឱ្យមានផ្លូវថ្មីសម្រាប់ វារីវប្បករទាំងឡាយនៅក្នុងប្រទេសកម្ពុជា ពួកគាត់អាចមានគំនិតមួយគាត់អាចចិញ្ចឹមត្រីហើយគាត់អាចកែច្នៃផលត្រីដោយខ្លួនឯងបានដោយមានគុណភាពល្អស្រប តាមលក្ខណៈបច្ចេកទេសរបស់អង្គការ UNIDO ដែលអាចបង្កើនប្រាក់ចំណេញបានច្រើន។

លោកបន្តថា បច្ចុប្បន្ននេះដោយសារជំងឺកូវីដ-១៩ កើតឡើងផង ហើយមុននេះបន្តិចក៏មានផលប៉ះពាល់ច្រើនដែរចំពោះវារីវប្បករនៅក្នុងប្រទេសកម្ពុជា បានបាត់បង់ចំណូលពី៤០ទៅ ៥០ភាគរយ ដោយសារនៅពេលពួកគាត់ប្រមូលផលត្រី​មកវិញ ប្រាក់ចំណូលតិចជាងការចំណាយក្នុងការចញ្ចឹម ធ្វើឱ្យពួកគាត់ កាត់ចិត្តឈប់ធ្វើអាជីវកម្មមួយនេះ។ ប៉ុន្តែនៅពេលដែលគាត់ទទួលព័ត៌មានអំពីអង្គការ UNIDO ពួកគាត់បានតាំងចិត្តថានឹងចិញ្ចឹមឡើងវិញ ពេលដែលចិញ្ចឹមហើយ ពួកគាត់អាចកែច្នៃដោយមានការគាំទ្រទាំងបច្ចេកទេស និងដើមទុនផងនោះ ធ្វើឱ្យវារីវប្បករកម្ពុជាបង្កើតនូវចំណង់ក្នុងការចិញ្ចឹមត្រីនេះឡើងវិញ៕

អត្ថបទ៖ ណារី