អាកាសធាតុក្ដៅស្នងការខេត្តបាត់ដំបងដាក់ចេញវិធាន​ការ​ ១០ ចំណុច

មន្ត្រីនៃស្នងការខេត្តបាត់ដំបងបានលើកឡើងថា បច្ចុប្បន្នស្ថានភាពនៃអាកាសធាតុមានសភាពក្តៅហួតហែងខ្លាំងជាងឆ្នាំកន្លងទៅហេីយគ្រោះអគ្គិភ័យក៏បានកេីតឡេីងជាបន្តបន្ទាប់​ដោយសារតែកម្តៅធម្មជាតិអាចបង្កជាលក្ខណៈងាយស្រួលដល់ ការឆាបឆេះ បង្ករជាមហ​ន្តរាយធ្ងន់ធ្ងរដល់លំនៅដ្ឋាន​ និងទ្រព្យសម្បត្តិ​ ឬដល់អាយុជីវិត មនុស្ស​ សត្វ ផងដែរ។

មន្ត្រីរដ្ឋបាលខេត្តប្រាប់ថា ការពង្រឹងសមត្ថភាពទាំង ១០ ចំណុចនេះគឺពិតជាល្អប្រសើរចំពោះសុវត្ថិភាពសម្រាប់ប្រជាពលរដ្ឋទូទៅ ឬក្រុមហ៊ុនផ្សេងៗ ខណៈបច្ចុប្បន្ននេះប្រទេសថៃក៏កំពុងទទួលសម្ពាធកម្តៅខ្លាំងពីធម្មជាតិផងដែរ ហើយយើងទាំងអស់គ្នាគួតែមានការ ប្រុងប្រយ័ត្ន ទើបជាការល្អ នឹងមិនខាតបង់ទ្រព្យសម្បត្តិ។

មន្ត្រីស្នងការខេត្តបន្តថា:ពាក់ព័ន្ធនិងការបង្ការទប់ស្កាត់គ្រោះមហន្តរាយដោយសារអគ្គិភ័យនេះ កាលពីថ្ងៃទី២១ ខែមេសា លោកឧត្តមសេនីយ៍ទោ​ សាត​ គឹមសាន​ ស្នង​ការ​នៃស្នងការដ្ឋាននគរបាលខេត្តបាត់ដំ​បង​ បានណែនាំដល់ថ្នាក់ដឹកនាំគ្រប់ អង្គ​ភាពចំណុះស្នងការដ្ឋាននគរបាលខត្តបាត់ដំបង នូវវិធានការចំនួន១០ចំណុចដូចខាង​ក្រោម៖

១-ត្រូវត្រួតពិនិត្យប្រព័ន្ធលក្ខណៈ បច្ចេកទេសដូចជា ហ្វ្រាំង ខ្យល់កង់ ភ្លើង ឧបករណ៍បំពាក់ ប្រព័ន្ធបូម។

២-ត្រូវធ្វើការបញ្ឆេះ ម៉ាស៊ីនជាប្រចាំធ្វើការប្តូរប្រេងម៉ាស៊ីនទៅតាមលក្ខណៈបច្ចេកទេសដែលបានកំណត់។

៣-ត្រូវធ្វើការលាងសម្អាតរថយន្តអគ្គិ ភ័យជាប្រចាំជួសជុលជាបន្ទាន់រាល់ចំណុចដែលមានបញ្ហាចៀសវាងមានបញ្ហារអាក់ រអួលពេលចេញប្រតិបត្តិការ។

៤-គ្រប់រថយន្តពន្លត់អគ្គិភ័យទាំងអស់ត្រូវតែមានប្រេងឥន្ធនៈក្នុងធុងរួចជាស្រេចនិងមានទឹកក្នុងស៊ីទែនគ្រប់គ្រាន់ដើម្បីត្រៀ មប្រតិបត្តិការគ្រប់ពេល។

៥-ត្រូវម្ចាស់ការត្រៀមបម្រុងឯកសណ្ឋាន មធ្យោបាយ ឧបករណ៍ កាប់ គាស់ ទម្លុះឧបសគ្គ ដើម្បីចូលពន្លត់អគ្គិភ័យ និង ដើម្បីសង្គ្រោះជនរងគ្រោះពីកន្លែងកើតហេតុ។

៦-ត្រូវមានវេណប្រចាំការ ២៤លើ ២៤ម៉ោង ដើម្បីធានាការឆ្លើយតបតម្រូវការបានទាន់ពេលវេលាសម្រាប់ប្រជាពលរដ្ឋ។ ៧-ត្រូវចេញប្រតិបត្តិការឱ្យបានរួស រាន់បំផុតនៅពេលទទួលបានពត៌មានអំពីគ្រោះថ្នាក់អគិភ័យ។

៨-រថយន្តអគ្គិភ័យ ក្នុងករណីមានការ​ស្នើសុំពីអង្គភាពខាងក្រៅ ត្រូវសុំការអនុញ្ញាតពីថ្នាក់ដឹកនាំស្នងការជាមុនក្រៅពីករណីអគ្គិភ័យ។

៩-មិនអនុញ្ញាតឱ្យយករថយន្តអគ្គិភ័យទៅប្រើប្រាស់ ខុសគោលការកំណត់របស់អង្គភាពជាដាច់ខាត។

១០-ត្រូវផ្សព្វផ្សាយដល់ប្រជាពលរដ្ឋនូវលេខទូរសព្ទទាន់ហេតុការណ៍ សង្គ្រោះអគ្គិភ័យដើម្បីប្រជាពលរដ្ឋអាចទំនាក់ទំនងសុំ ជំនួយពេលមានអាសន្ន។

ក្រៅពីនេះ សមត្ថកិច្ចតាមមូលដ្ឋានក៏ត្រូវមានការដាស់តឿនដល់បងប្អូនប្រជាពលរដ្ឋ ឬក្រុមហ៊ុនផ្សេងៗត្រូវមានការប្រុងប្រយ័ត្នចំពោះការប្រើប្រាស់ ភ្លើង ជើងក្រាន  ភ្លើងទៀន ធូប និងខ្សែអគ្គិសនីដែលមានចរន្ត ក្នុងនោះក៏ត្រូវត្រៀមបម្រុងនូវឧបករណ៍ចាំបាច់មួយចំនួនក្នុងការពន្លត់អគ្គិភ័យជាបឋមផងដែរមុនពេលរថយន្តអគ្គិភ័យរបស់សមត្ថកិច្ចចេញអន្តរាគមន៍ទៅដល់៕

អត្ថបទ៖ សៅ សារិទ្ធ