ព័ត៌មានអន្ដរជាតិ

ហ្សេលេនស្គី៖ គ្មានការធានាសុវត្ថិភាពដល់ប្រតិភូបរទេសចូលរួមក្បួនព្យុហយាត្រាក្នុងថ្ងៃជ័យជម្នះរុស្ស៊ីទេ

បានផុស

១ year មុន

នៅ

ថ្ងៃអាទិត្យ ៤ ឧសភា ២០២៥

ដោយ

សារព័ត៌មាន Interfax Ukraine បានរាយការណ៍នៅថ្ងៃទី៣ខែឧសភា ឲ្យដឹងថា ប្រធានាធិបតីអ៊ុយក្រែនលោក Volodymyr Zelensky បាននិយាយថា អ៊ុយក្រែនមិនអាចធានាសុវត្ថិភាពរបស់មន្ត្រីបរទេសដែលគ្រោងនឹងចូលរួមក្បួនដង្ហែរទិវាជ័យជំនះរបស់រុស្ស៊ីនៅទីក្រុងមូស្គូនៅថ្ងៃទី៩ខែឧសភា ដោយព្រមានថាឧប្បត្តិហេតុណាមួយនៅលើទឹកដីរុស្ស៊ីស្ថិតក្រោមការគ្រប់គ្រងរបស់វិមានក្រឹមឡាំងតែប៉ុណ្ណោះ។

ប្រធានាធិបតីអ៊ុយក្រែន លោក ហ្សេលេនស្គីប្រជុំជាមួយមេទ័ព។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីរុស្ស៊ី លោក វ៉្លាឌីមៀរ ពូទីន បានស្នើបទឈប់បាញ់រយៈពេល៣ថ្ងៃនៅថ្ងៃដែលរុស្ស៊ីគ្រោងរៀបចំធ្វើព្យុហយាត្រាយោធាទ្រង់ទ្រាយធំចំទិវាជ័យជម្នះ៩ឧសភាក្នុងសង្គ្រាមលោកលើកទី២ ប៉ុន្តែភាគីអ៊ុយក្រែនបានបដិសេធការដាក់ចេញបទឈប់បាញ់រយៈពេល៣ថ្ងៃជាឯកតោភាគីរបស់ភាគីរុស្ស៊ី។

យោងសេចក្តីរាយការណ៍នោះ ប្រធានាធិបតីអ៊ុយក្រែន លោក Zelensky បាននិយាយក្នុងអំឡុងសន្និសីទកាសែតជាមួយអ្នកកាសែតថា៖«ជំហររបស់យើងគឺសាមញ្ញណាស់សម្រាប់ប្រទេសទាំងអស់ដែលធ្វើដំណើរទៅកាន់ប្រទេសរុស្ស៊ីនៅថ្ងៃទី៩ខែឧសភា៖ យើងមិនអាចទទួលខុសត្រូវចំពោះអ្វីដែលកើតឡើងនៅលើទឹកដីនៃសហព័ន្ធរុស្ស៊ីបានទេ។ ពួកគេទទួលខុសត្រូវចំពោះសុវត្ថិភាពរបស់អ្នក។ យើងនឹងមិនផ្តល់ការធានាណាមួយឡើយ ពីព្រោះយើងមិនដឹងថា តើរុស្ស៊ីអាចធ្វើអ្វីនៅថ្ងៃទាំងនោះ»។

ការព្រមានរបស់ភាគីអ៊ុយក្រែន កើតឡើងនៅក្រោយពេលដែលភ្នាក់ងារស៊ើបការណ៍បរទេសរបស់អ៊ុយក្រែន (SZRU) និងភ្នាក់ងារសន្តិសុខអ៊ុយក្រែន (SBU) ត្រូវបានរាយការណ៍ថា បានសម្លាប់យោធាជាន់ខ្ពស់រុស្ស៊ី គឺឧត្តមសេនីយទោ Yaroslav Moskalik អនុប្រធាននាយកដ្ឋានប្រតិបត្តិការសំខាន់នៃកងទ័ពរុស្ស៊ី ក្នុងការបំផ្ទុះរថយន្តនៅក្នុងទីធ្លានៃអគារលំនៅដ្ឋានមួយក្នុងទីក្រុង Balashikha តំបន់មូស្គូកាលពីថ្ងៃទី២៥ខែមេសា។

ការបំផ្ទុះរថយន្តសម្លាប់ឧត្តមសេនីយទោរុស្ស៊ី លោក Yaroslav Moskalik។ Ostorozhno Moskva /Telegram channel

ក្នុងរយៈពេលប៉ុន្មានថ្ងៃថ្មីៗនេះ ជនជាតិរុស្សីដែលមានឋានៈខ្ពស់ពីរនាក់ដែលមានទំនាក់ទំនងនឹងសង្គ្រាមទ្រង់ទ្រាយធំនៅអ៊ុយក្រែនត្រូវបានគេរាយការណ៍ថាបានស្លាប់នៅក្នុងការបំផ្ទុះរថយន្ត។

ប៉ុន្តែសម្រាប់ហេតុការណ៍ណាមួយដែលកើតនៅលើទឹកដីនៅប្រទេសរុស្ស៊ីនៅថ្ងៃហែរក្បួនព្យុហយាត្រាកងទ័ពនៅថ្ងៃជ័យជម្នះនោះ អ៊ុយក្រែនចាត់ទុកថា រុស្ស៊ីជាអ្នកបង្កហេតុដើម្បីទម្លាក់កំហុសមកលើភាគីអ៊ុយក្រែនទៅវិញ។

យោងសារព័ត៌មាន Kyiv Independent របស់អ៊ុយក្រែន ប្រធានាធិបតីអ៊ុយក្រែន លោក ហ្សេលេនស្គី បានព្រមានថា រុស្ស៊ីអាចរៀបចំការបង្កហេតុ រួមមាន «ការដុតអាវុធ ការបំផ្ទុះ ឬសកម្មភាពផ្សេងទៀត» ហើយបន្ទាប់មកព្យាយាមបន្ទោសអ៊ុយក្រែន។ លោកបានមានប្រសាសន៍ថា ក្រុងកៀវបានណែនាំគណៈប្រតិភូមកបំពេញទស្សនកិច្ចតាមនោះ។

រដ្ឋាភិបាលរបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន តាមសេចក្តីរាយការណ៍ បានអញ្ជើញមេដឹកនាំបរទេសជាច្រើន ដើម្បីចូលរួមព្រឹត្តិការណ៍រំលឹកខួបលើកទី៨០នៃជ័យជម្នះរបស់សហភាពសូវៀតលើពួកណាស៊ីអាល្លឺម៉ង់។ ក្នុងចំណោមគណៈប្រតិភូកត្តិយសដែលបានអញ្ជើញមានមេដឹកនាំមកពីសមាជិកសហភាពអឺរ៉ុប គឺប្រទេសស្លូវ៉ាគី បេក្ខភាពសហភាពអឺរ៉ុប ស៊ែប៊ី ព្រមទាំងចិន ឥណ្ឌា និងប្រេស៊ីល ផងដែរ។

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ក៏បានច្រានចោលរួចទៅហើយអំពីការប្រកាសបទឈប់បាញ់ឯកតោភាគីរបស់រុស្ស៊ី ហើយភាគីរុស្ស៊ីវិញ ចាត់ទុកការប្រកាសនោះជាការធ្វើតេស្តចេតនារបស់អ៊ុយក្រែនថាតើចង់ចរចាសន្តិភាពពិតប្រាកដដែរទេ៕

ដោយ រ៉ាន់ រើយ