ព័ត៌មានជាតិ

សហគមន៍កសិកម្ម«តាសីសាមគ្គី»ទទួលបាន ហិរញ្ញប្បទានឥតសំណងវិនិយោគបន្ថែមជិត ១,៨៩លានដុល្លារ

បានផុស

១ year មុន

នៅ

ថ្ងៃអង្គារ ២៩ មេសា ២០២៥

ដោយ

សហគមន៍កសិកម្ម«តាសីសាមគ្គី»នៅខេត្តបាត់ដំបង ទទួលបានការចុះកិច្ចព្រមព្រៀងហិរញ្ញប្បទានឥតសំណងពីគម្រោងពិពិធកម្មកសិកម្មកម្ពុជា(CASDP)ក្នុងទំហំជិត ១,៨៩លានដុល្លារ សម្រាប់ការសាងសង់ផ្ទះសំណាញ់ និងហេដ្ឋារចនាសម្ព័ន្ធផ្សេងៗ។ នេះបើយោងតាមលោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម នៅថ្ងៃទី២៨ ខែមេសា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក ឃឹម ហ្វីណង់ ការចុះហត្ថលេខានេះគឺជា ការផ្តល់ជំនួយហិរញ្ញប្បទានបន្ថែមសម្រាប់ការសាងសង់ផ្ទះសំណាញ់ចំនួន ២២៥ខ្នង ក៏ដូចការផ្តល់ជូននូវហេដ្ឋារចនាសម្ព័ន្ធផ្សេងៗមួយចំនួនដែលជាកម្មវិធីគាំទ្រថវិកាហិរញ្ញប្បទានដោយធនាគារពិភពលោក សម្រាប់ជាទុនបំពេញបន្ថែមលើការវិនិយោគផ្ទះសំណាញ់ផ្លូវលំជនបទ ៧,៥គីឡូម៉ែត្រ ប្រព័ន្ធស្រោចស្រព និងឧបករណ៍សម្ភារៈជាច្រើនទៀត។

លោក បានបញ្ជាក់ដែរថា ការចុះហត្ថលេខាលើកនេះគឺជាលើកទី២ ដែលគម្រោងបានចុះហត្ថលេខាជាមួយសហគមន៍តាសីសាមគ្គី ស្ថិតនៅក្នុងស្រុកថ្មគោល ខេត្តបាត់ដំបង។ ក្នុងនោះ កាលពីលើកទី១ បានចុះកិច្ចព្រមព្រៀងដែលមានទំហំទឹកប្រាក់ប្រហែលជា ១លានដុល្លារអាមេរិកម្តងរួចមកហើយ ដោយគម្រោងបានផ្តល់ជាផ្ទះសំណាញ់ចំនួន ១៤០ខ្នង និងផ្លូវថ្នល់ប្រហែលជា ៥គីឡូ ដែលមានជាផ្លូវកៅស៊ូផង និងជាផ្លូវក្រាលគ្រោះក្រហមផង។

ជាក់ស្តែង បើសិនជាបូកទំហំទឹកប្រាក់ចំពោះកិច្ចព្រមព្រៀងលើកទី១ និងលើកនេះ គម្រោងបានវិនិយោគដល់សហគមន៍ក្នុងទឹកប្រាក់ប្រមាណជិត ៣លានដុល្លារហើយ ដែលជាទំហំមួយធំបង្ហាញអំពីការឈរជើងរឹងមាំយូអង្វែងនៅទីនេះ ក៏ដូចជាបង្ហាញសក្តានុពលនៅតំបន់ថ្មគោល និងការរីកលូតលាស់របស់សហគមន៍ផ្ទាល់ផងដែរ។

បើតាមលោក ឃឹម ហ្វីណង់ សហគមន៍តាសីសាមគ្គីកំពុងស្ថិតនៅក្នុងដំណាក់កាលមួយដើម្បីប្រែក្លាយខ្លួនទៅជាសហគមន៍កសិកម្មទំនើបដែលជាយន្តការមួយផ្តល់ភាពច្បាស់លាស់ និងផ្តល់ភាពរឹងមាំខាងផ្នែកគ្រប់គ្រងទីផ្សារ ហើយងាយស្រួលដល់ក្រសួង ក៏ដូចជារាជរដ្ឋាភិបាលក្នុងការផ្តល់ការគាំទ្រដល់សមាជិករបស់សហគមន៍ក្នុងពេលអនាគតផងដែរ៕