​បាតុករថៃ​ចេញ​តវ៉ា ខណៈ​គណៈ​កម្មាធិការ​ព្រំដែន​ទូទៅ​កម្ពុជា-ថៃ​​ជួប​ប្រជុំ​​​នៅ​បាងកក​

​ខណៈ​ពេល​ដែល​​គណៈកម្មាធិការ​ព្រំដែន​ទូទៅ (GBC) ​រវាង​កម្ពុជា​និង​​ថៃ​​ បាន​បើកកិច្ច​ប្រជុំ​​នៅ​​​ទីក្រុង​បាងកក បាតុករថៃ​មួយក្រុមបានប្រមូលផ្តុំគ្នានៅជិត​ទី​តាំង​​ដែល​រៀប​ចំ​​កិច្ចប្រជុំ GBC ដោយ​​​បង្ហាញ​ចេតនា​តាមឃ្លាំមើលលទ្ធផលនៃការចរចាតំបន់ត្រួតស៊ីគ្នារវាងថៃនិងកម្ពុជា​​ និង​ដាក់​ញត្តិបង្ហាញ​ពី​ការ​ព្រួយ​បារម្ភរបស់​ពួកគេ​​។

សារព័ត៌មានថៃ matichon បានរាយការណ៍ថា ក្រុមបាតុករបណ្តាញនិស្សិតប្រជាជនដើម្បីកំណែទម្រង់ប្រទេសថៃដែល​ដឹកនាំដោយ លោក Phichit Chaiyamongkol នៅព្រឹកថ្ងៃទី១ ខែឧសភា ឆ្នាំ២០២៥ បានដឹកនាំការប្រមូលផ្តុំនៅមុខសណ្ឋាគារ Royal Orchid Sheraton Riverside ក្នុងទីក្រុងបាងកក ជា​ទីកន្លែងដែលរៀបចំកិច្ចប្រជុំគណៈកម្មាធិការ​ព្រំដែន​ទូទៅ (GBC) រវាងថៃនិងកម្ពុជា ដើម្បីឃ្លាំមើលអំពីលទ្ធផលនៃការចរចា​តំបន់​ត្រួតស៊ីគ្នាប្រទេសទាំងពីរពីកិច្ចប្រជុំនេះ​។

​សេចក្តី​រាយការណ៍​ដដែល បាន​ស្រង់សម្តី​​មេដឹកនាំក្រុមបាតុករ លោក Phichit ដែល​និយាយថា ការដែលពួកគេធ្វើ​ដំណើរមកកាន់កន្លែងកិច្ចប្រជុំ (GBC) រវាងថៃនិងកម្ពុជានៅថ្ងៃនេះ ដើម្បី​ដាក់ញត្តិបង្ហាញ​ពី​ជំហរ​របស់ប្រជាជនថៃមិនឱ្យមានការបាត់​បង់​ទឹក​ដី ដាក់​ជូន​លោកឧត្តម​សេនីយ៍ Songwit Noonpakdee អគ្គ​មេ​បញ្ជាការកងទ័ពថៃ ដើម្បី​ឱ្យ​កង​កម្លាំង​ប្រដាប់​អាវុធគ្រប់ប្រភេទទាំងអស់​មាន​ជំហរ​រឹង​មាំ​ក្នុង​ការ​រក្សា​អធិបតេយ្យភាពជាតិរបស់ថៃ។

លោក Phichit បានបន្តថា កន្លងទៅ លោក Phumtham Wechayachai រដ្ឋមន្ត្រីក្រសួងការពារជាតិថៃធ្លាប់បានបញ្ជាក់ថា នៅតំបន់ត្រួតស៊ីគ្នារវាងថៃនិងកម្ពុជា យើងនឹងផ្តោតលើការស្វែងរកផលប្រយោជន៍មុន​ការ​ចរចាអំពីបញ្ហា​ព្រំដែនត្រួតស៊ីគ្នា​ ដែល​ស្របជាមួយលោក ​ថាក់ស៊ីន ស៊ីណាវ៉ាត្រ អតីត​នាយក​រដ្ឋមន្ត្រីដែលធ្លាប់​បាន​លើកឡើង។ ដូច្នេះ​ការដែលរដ្ឋាភិបាល​ថៃ​ផ្តោតលើ​ផលប្រយោជន៍នោះ តើហេតុ​អ្វីបាន​ជា​មាន​កិច្ច​ប្រជុំ GBC ​នៅថ្ងៃនេះ?៕

ដោយភ្នាក់ងារ​