ហែម វណ្ណឌី៖ការជំរុញនវានុវត្តន៍ដែលនឹងបង្កើនភាពប្រកួតប្រជែង​ និងទំនាក់ទំនងក្នុងតំបន់

រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍(MISTI) និងជារដ្ឋមន្ត្រីវិទ្យាសាស្ត្រ បច្ចេកវិទ្យា និងនវានុវត្តន៍ សម្រាប់កម្ពុជាក្នុងអាស៊ាន លោក ហែម វណ្ណឌី បានលើកឡើងថាបណ្តាប្រទេសជាសមាជិកអាស៊ានត្រូវធ្វើការរួមគ្នាដើម្បីជំរុញនវានុវត្តន៍ដែលនឹងបង្កើនភាពប្រកួតប្រជែង​ និងទំនាក់ទំនងក្នុងតំបន់ឱ្យកាន់តែមានភាពប្រសើរឡើងនិងរស់រវើក។

ការលើកឡើងរបស់លោក ហែម វណ្ណឌីធ្វើឡើងកាលពីថ្ងៃទី៣០ ខែមេសា ឆ្នាំ២០២៥ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំកិច្ចប្រជុំគណៈកម្មាធិការផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ (COSTI) ជាតិលើកទី៦ ស្របពេលនឹងខួបលើកទី ២៦ ដែលកម្ពុជាបានចូលជាសមាជិកអាស៊ាន។  កិច្ចប្រជុំ​ក៏មានការចូលរួមពីសមាជិកគណៈកម្មាធិការជាតិ និងអនុគណៈកម្មាធិការទាំង៩ សមា​ជិកគណៈប្រឹក្សាយោបល់ ក្រុមការងារលេខា​ធិការដ្ឋាន COSTI ជាតិ និងភាគីពាក់ព័ន្ធប្រមាណ ១០០ នាក់។

បើយោងតាម MISTI អង្គប្រជុំបានពិភាក្សាអំពីការពង្រឹងតួនាទីកម្ពុជា ក្នុងការលើកកម្ពស់របៀបវារៈវិទ្យាសាស្ត្រ បច្ចេកវិទ្យា និងនវានុវត្តន៍ (វ.ប.ន.) របស់អាស៊ាន ដោយផ្តោតលើការបង្កើនការយល់ដឹងអំពីគោលដៅ និងយន្តការអាស៊ានក្នុងការផ្តល់មូលនិធិសម្រាប់គម្រោងក្នុងវិស័យ វ.ប.ន. ការជំរុញការកសាងបណ្តាញថ្នាក់ជាតិនិងតំបន់ ព្រមទាំងការពង្រឹងសមត្ថភាពក្នុងការរៀបចំសំណើ និងការគ្រប់គ្រងគម្រោង។

អង្គប្រជុំក៏បានពិនិត្យការអនុវត្តផែនការសកម្មភាពអាស៊ានស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០១៦-២០២៥ (APASTI 2016-2025) និងផ្តល់ធាតុចូលសម្រាប់ការរៀបចំសេចក្តីព្រាងផែនការសកម្មភាព APASTI ឆ្នាំ២០២៦-២០៣៥ ផងដែរ។

លោក ហែម វណ្ណឌី បានលើកឡើងពីតួនាទីដ៏សំខាន់របស់ COSTI ក្នុងការធ្វើឱ្យគោលនយោបាយ និងយុទ្ធសាស្ត្រ វ.ប.ន. ជាតិ មានសង្គតិភាពជាមួយបណ្តាប្រទេសសមាជិកអាស៊ាន, ការពិនិត្យតាមដានការ អនុវត្តគម្រោងរបស់អនុគណៈកម្មាធិការ, និងការគាំទ្រសសរស្តម្ភនៃសហគមន៍សេដ្ឋកិច្ចអាស៊ាន តាមរយៈការជំរុញនវានុវត្តន៍ដែលនឹងបង្កើនភាពប្រកួតប្រជែង​ និងទំនាក់ទំនងក្នុងតំបន់។

លោក ហែម វណ្ណឌីបានថ្លែងបញ្ជាក់អំពីសារៈសំខាន់នៃបញ្ញាសិប្បនិម្មិត (AI) ដោយលើកឡើងថា៖ “ផ្អែកតាមការព្យាករ បញ្ញាសិប្បនិម្មិតនឹងរួមចំណែកដល់សេដ្ឋកិច្ចអាស៊ាននៅឆ្នាំ២០៣០  ប្រមាណ ១ ទ្រីលានដុល្លារអាមេរិក ស្មើនឹង ១០ ទៅ ១៨ ភាគរយ នៃផលិតផលក្នុងស្រុកសរុបរួមគ្នាក្នុងតំបន់។ ការណ៍នេះបញ្ជាក់យ៉ាងច្បាស់អំពីភាពចាំបាច់នៃគោលនយោបាយ យុទ្ធសាស្ត្រ និងចក្ខុវិស័យវែងឆ្ងាយ ដើម្បីបង្កើនការស្រាវជ្រាវ និងការអភិវឌ្ឍបច្ចេកវិទ្យានេះសម្រាប់ផលប្រយោជន៍នៃសមាជិកអាស៊ានទាំងអស់។”

បើយោងតាម MISTI ចាប់តាំងពីក្លាយជាសមាជិកអាស៊ានក្នុងឆ្នាំ១៩៩៩ កម្ពុជាបានចូលរួមយ៉ាងសកម្មក្នុងគំនិតផ្តួចផ្តើមផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ក្រោមក្របខណ្ឌនៃណៈកម្មាធិការ COSTI និងផែនការសកម្មភាព APASTI ៕